曠野的聲音

正如同學仔講嘅一樣，呢本＂瑪洛摩根＂嘅＂曠野的聲音＂。真係幾好睇，唔怪得銷售千萬本咁勁啦，仲要有二十多種語言版本添。

故事大綱唔再重複，有興趣就自己上網search，或者可以去同學仔個blog度睇。

我想講嘅係，唔睇呢本書都唔知道澳洲土著：－
１。原來好似馬雅文明咁，都係古文明，仲有成五萬年歷史咁耐。
２。佢地自稱係＂真人＂，即係真正嘅人類，而我地城市人其實係＂變種人＂，因為無論體質同性格，我地d城市人都係同真正嘅人類唔同，詳細就自己借嚟睇吓啦。同意又唔係話唔同意，不過真係有dd唔知點講。
３。佢地個個都有唔同嘅技能，有d識分身術，有d又識解夢，個個都識得用心靈溝通，又識同大自然溝通，healing嘅技術簡直神乎其技。如果佢地可以將佢地呢d技術，流傳比我地呢d都市人，將佢發揚光大就very good喇。
４。佢地認為地球已經步向滅亡，所以唔再生育下一代，聽到有d難過。
５。佢地實在係環保先鋒，環保意識真係好勁，比我地講梗嘅所謂環保，不知環保多幾多倍。
６。有d土著嘅成年禮，你估都唔會估到係咩，真係好嚇人，我都要賣過關子先得，有機會睇一定唔可以miss。。。事先聲明，幾嘔心架。。。
７。佢地覺得口，並唔係用嚟講嘢嘅，係用嚟唱歌嘅。溝通其實係應該用心靈感應，好處之多，真係難以置信，其中一個好key嘅原因，就係原來唔會有癈話。。。哈哈，唔怪得我學極都咁屎啦（我指靈修），可能因為我癈話太多。。。
８。佢地一早就認識咩係人生，咩係真我，咩係永恆，真係好勁，即係個個都已經開悟哂。。。？

另外佢裡面提到四個point我覺得值得响呢度highlight出嚟同大家分享。
第一，通過任何考驗的唯一方法，就是面對考驗，這是無可避免的。
第二，靜坐係必要嘅，因為只有倚賴靜坐，我地先可以聽到大地／上天，比我地嘅指示，或者對我地祈禱嘅回應。
第三，我地都市人實在太過傻，整日都為左身外物而活，搞到壓力大到病。佢地雖然窮，但係就日日都生活得快快樂樂，因為活著嘅目的，根本就唔係為左錢。。。
Last，佢提到有d都市人，比左一d BB食物比一班土著，搞到果班土著媽媽奶水越來越少，到最後仲停埋奶添，差d搞到果班BB命仔都無埋。呢件事亦令到我諗起我地成日都講嘅，慈悲與同情，所以就算係幫，都要幫得其所，如果唔係好易幫人變左害人。因為每個人都有佢，作為生存嘅課題。咁樣搞到幫人越嚟越難，或者咁講，係要好小心，真係要諗清楚究竟幾時先可以，或者要出手幫人呢？

最後我想講嘅就係，如果佢邀請我去嘅話，我一定會死，而佢地全族人一樣都會死光光，你一定唔會估到，原來竟然係因為我無乳溝。哈哈。。。睇完你自然會明白點解架喇。。。