我的能量書

好快咁又睇完左沈嶸果本＂我的能量書＂，資料都有唔少，都係唔係太啱我睇，所以後半部我都飛住嚟睇。

佢入面有講咩叫制約數（即係你嘅出生日子再加月份），同生命靈數唔同嘅地方係，制約數字會影響到人的思考指令同處事態度，詳細可以睇佢本書。

另外佢都有講同人發生性關係，會間接產生共業，呢樣嘢之前alan都有講過。不過佢比較詳細，亦有教破解方法。我唔係鼓勵one night stand啊，不過都幾特別，其實都可以，當你同其他人嘅氣場，黐埋一齊嘅時候，用嚟分返開佢。幾時會黐埋？就係當你幫人做healing又唔記得cut返個關係嘅時候囉。

方法就係：－
１。選一個早上，開哂所有窗，等空氣流通。
２。準備一個圓柱形藍色蠟燭同線香（唔係用嚟拜神果d）。
３。開哂所有燈，揀一度清靜嘅地方，席地而坐。
４。將蠟燭同線香响面前點著，觀想某人走遠嘅畫面。
５。口中默念著：［我祝福某某某，並請某某某離開我嘅身體］。
６。一路念到個心感覺平靜為止。
７。起身將蠟燭移至桌上持續燃燒。
８。將燃燒嘅線香繞行身體四周，清除沾附的能量。

Thats it.

Last一樣我想講嘅就係命運，作者其實都識紫微斗數，佢話人嘅命格各有好壞，但係無一個人會全部都好嘅，好似有錢人咁，佢地嘅婚姻運多數都唔係太好。呢樣嘢我都信，個天係好公平嘅，唔會有人科科一百分。而且，一個人嘅命運骨架係無辦法改變，但係如果你可以了解你嘅命盤，咁就可以針對你嘅壞星（多數係你性格上面嘅弱點），如果改善到自己嘅弱點，自然可以創造命運，因為性格決定命運，呢句我都幾同意。

而呢一本書有一個我估唔到亦不明所以嘅特點，就係裡面好多作者嘅生活照，大概每五頁一張左右啦，真係諗極都唔明點解？係一個賣點？我又唔係好覺，因為佢又未至於話好sharp。。。定係想令到本書嘅厚度大大增架呢？？？

我個人就只係有一個感覺，就係唔＂環保＂。。。