星期二, 12月 25, 2007

Fusion

尋晚發左兩個怪夢:-

第一個係廖啟智同陳敏兒話我聽死後嘅生活會係有幾咁開心。。。??之後就見到有燈,應該係BB夠鐘食奶,我真係醒左架,即係唔係發梗夢,今朝睇返BB食奶嘅記錄,時間大概四點半咁上吓。。。

第二個就仲奇怪,係有一個女人/仔(唔係好記得個樣,不過一定年紀唔大)教佛學,應該係無啦啦要上幾堂果隻,佢話佛學其實同數學差唔多,佢出左一條題目,佢問如果一個由四個三角型組成嘅四邊型嘅面積係點計???我當然唔識計and企左响度啦,望吓Terry(係啊,佢又出現响我個夢喇),佢就係咁劃,好似識計咁,但係睇唔明。而另外一個同學仔亦好R頭,但係好似都有劃劃吓咁。之後Miss當然話返比我地聽點計啦,但係個同學仔好似聽唔到,仲一路自己keep住劃劃吓,而Miss就叫我話比佢聽???到落堂嘅時候,Miss就過嚟同我單眼,之後仲同我講,叫我有問題記住搵佢喎,不過就淨係同我講咋???

鏡頭一轉,就所有同學仔一齊去左打badminton,不過唔見左Terry而多左幾個女同學仔???我只係企埋一邊睇,但係有一個同學仔個羽毛球拍斷左線,當然就輸啦,不過無啦啦有個三點式女仔出現,今朝醒左就有個feeling,個女仔其實係果個教佛學嘅Miss。。。真係fusion到唔fusion,搞到我有d亂,都唔知有無記錯個sequence添。

今次唔知點解,到左咁夜都仲記得個夢,可能真係太過估怪,又可能係有三點式啦。唔知幾時再發三點式嘅夢呢。嘩哈哈哈哈哈!!!

星期六, 12月 22, 2007

西藏生死書

其實老早就睇完,不過真係唔太明,所以就再去借多幾個唔同嘅版本嚟睇,好可惜我悟性原來真係唔高,所以所得有限。。。

我第一本睇嘅係1996年由鄭桭煌譯索甲仁波切1992著嘅西藏生死書(The Tibetan Book of Living and Dying),睇完都明明地,亦覺得好震撼。入面有幾點都好得意架,例如:

1。佢入面講到原來生男仔嘅話,個靈魂原來係鍾意媽媽而唔鍾意爸爸,咁我個仔仔咪。。。而如果係生女仔嘅話,個靈魂就鍾鍾意爸爸唔鍾意媽媽,真係幾得意。因為你地造佢出嚟嘅時候,原來佢一直都响左近睇住架。。。
2。佢又講到亡靈响中陰身,係要再次經歷同一樣嘅死亡過程七次,每七日一次,而中陰身嘅忘靈,敏感度係比生前强七倍,亦即係如果死嘅時候本來已經好痛嘅話,在中陰身就會再要痛多七次,每次就要痛多七倍。真係好金,所以真係唔好亂咁輕生,死真係唔可以解決問題架。
3。佢好簡單咁講原來個個人都可以超脫輪迴,不過要生平好好修練先得,meditate係其中之一,最好都係要打通中脈,所以我都真係唔可以再偷懶唔meditate喇。如果唔係嘅話就要請上師幫忙。不過以我嘅理解,都要睇你生平嘅業力,如果你作得太多惡業,死後就會被你作嘅業影响得好勁,試諗吓如果得一個人追你同比十九幾個人圍你嘅分別,邊個會易甩身d?
4。佢成日都話要搵一個朋友幫手念中陰聞教得度,不過佢就無講過呢編嘢係點,即係要自己去搵啦。。。

睇完之後就仲想知多d,於是就去借左本1993年由李毓昭譯河吧厚德同林由香里寫嘅大轉世--西藏度亡經(The Tibetan Book of the Dead),睇完真係無嘢寫,因為佢真係太短,唔明嘅就仲唔明,不過當係introduction都OK。

之後當然無放棄,繼續去借第二d版本啦。最後就比我借左2005年由張宏實歸納所有唔同嘅版本,再用上簡單易明文字輔以圖表說明,真係易明好多。

真係好值得花時間一睇再睇(不過我無咁嘅心機),裡面實在係教得太多有用嘅嘢喇,例如:-

1。佢好清楚咁講述左死亡嘅過程。
2。附錄入面有哂成編中陰聞教得度,淨係呢樣已經值得一睇。
3。除左死亡嘅過程,佢仲教你响唔同時候,用唔同嘅方法,去得到超脫。
4。佢將你响中陰有機會見到嘅所有佛父佛母嘅樣同特徵,都寫哂出嚟,到你真係見到時候,都唔駛打個突(因為原來有d都幾嚇人架)。
5。佢將唔同版本嘅生死書,做左個summary,睇完呢個簡介,你可以知道邊個版本比較啱你睇。
6。原來頭七唔係死後四十九日咁簡單架,因為臨終中陰同實相中陰中間係有段時間昏迷,長短因人而異,實相中陰開始先計四十九日架。而臨終中陰嘅時間亦然,但係臨終中陰中間,醫學上已經話死亡架喇,所以真係唔知點計。

不過佢無講到陰身要再次死亡七次,但係無講到唔代表唔駛喎,而且佢話中陰身嘅敏感度係九倍而唔係七倍,所以都係果夠,唔好輕生啊。

星期五, 12月 21, 2007

邊度又熱熱地

今日跟足師父嘅指示做healing,不過我當然無咁自私,梗係先幫哂我身邊嘅人做先啦。唔知係自己玩得個邊度多呢?好多時佢都會無啦啦熱熱地,好似今晚我幫屋企人做就係咁喇,無啦啦熱熱地,但係又唔係痛喎,一一陣一陣咁,真係神奇。其實自從上完level 2之後就已經少左玩邊度,因為太多DH要做,搞到無咩時間練其他嘢添。

Distant Healing後記

自從上完level 2,差唔多每兩日都會起碼send一次energy同心經,send嘅時候試過合埋眼又試過開眼,不過都係睇唔到嘢,亦無咩feel。但係就好多時都會有被send energy個人嘅感覺,例如佢頭暈我send完都會暈暈地,真係唔知係唔係心理作用呢。

好似近排咁,隻耳仔同個鼻都有少少痛,今日又收到Alan個email,所以就諗住由今晚起,做多d self healing。今晚我清左隻耳仔一陣(大概十分鐘左右),個湧泉就即刻好熱(其實唔明點解會咁),之後我就比energy隻耳仔,比左十分鐘左右個湧泉就開始無咩feel,之後隻耳仔就無咁痛,不過個鼻就唔知點搞好,事關好近隻天眼,又唔清得,比energy又怕佢會痛。Anyway,唯有今晚試吓玩吓邊度,睇吓會唔會好d啦。

星期一, 12月 17, 2007

人生的最後一堂課....

睇完Randy Pausch嘅"人生的最後一堂課"先知自己真係仲未識點樣做到慈悲,亦覺得自己原來都真係幾執著,唔怪得玩搭羅嘅時候都係咁叫我唔好執著啦,開頭仲諗,無理由架,但係而家我直情覺得自己可能真係好多嘢都無放底度,好可能係放左入心,就以為搞掂,但係其實只係將個問題拖得就拖啫。。。



人生的最後一堂課,該說什麼?

佢地好叻啊,我覺得好慘...但係佢地個個都behave得好啱好開心...慈悲原來真係好難...




Randy Pausch:如何實現兒時夢想 1/11



Randy Pausch:如何實現兒時夢想 2/11



Randy Pausch:如何實現兒時夢想 3/11



Randy Pausch:如何實現兒時夢想 4/11



Randy Pausch:如何實現兒時夢想 5/11



Randy Pausch:如何實現兒時夢想 6/11



Randy Pausch:如何實現兒時夢想 7/11



Randy Pausch:如何實現兒時夢想 8/11



Randy Pausch:如何實現兒時夢想 9/11

10



Randy Pausch:如何實現兒時夢想 10/11

11



Randy Pausch:如何實現兒時夢想 11/11


好感動啊,到我果時我唔知做唔做到"Focus on Other"果一點.

星期日, 12月 16, 2007

心輪同天眼都痛嘅??

自從經Terry師兄教左要用心輪睇而唔係用天眼睇之後,開頭天眼就無咩點痛,但係無耐之後個天眼又係咁陰d陰d痛,可能都係唔係做得太啱之估?


今日約左兩個同學仔上我屋企練習,練到最後就玩send心經,開頭我就send比同學P,發覺好得意,佢開頭又要一陣Energy,中間就好似唔係好要咁,到最後又再要過,真係好得意,從來無試過手感會轉得咁多,可能我send得少,不過隻中指就有少少咭。到send比同學S嘅時候就無咩大feel,不過就好似條氣唔順咁,又開始好似有胃氣咁。。。


之後我地就玩兩個send比一個,第一個就試send比同學P,feel就無咩,不過就好熱,係我地三個都好熱,我仲差d熱到出汗添,話時話,今日都幾凍,似乎佢真係有d嘢好激氣咁喎。第二個目標就係同學S,感覺都係差唔多,都係有胃氣咁。到佢地同我玩,同學S竟然發現我個心輪痛,果然好勁。不過唔知點解,其實有由一開始玩,我個心輪就已經開始痛。唔通我真係有心結?


不過都同佢地同我玩搭羅個結果都幾match,都係天眼同心輪唔太好,天眼係咩就唔記得喇,但係心輪就係有條友比人綁手綁腳,之後仲有好多把劍响周圖。。。唔通我收埋收埋左好多嘢連我自己都唔知?

星期六, 12月 15, 2007

直覺

講返朋友A,佢去學之前我都覺得佢會好好feel,因為佢直覺好勁,好多時佢見過一兩眼就可以好清楚一個人嘅性格特點。以前我唔係太信,不過有一次佢同我對同一個同事(同事1)有唔同嘅見解,我就覺得同事1幾smart幾nice又講道理,不過佢就話同事1有問題。我當然信自己多d,話哂我都叫做同同事1work過,而朋友A只係見過吓同事1,最多都係傾過幾句咁啫,又無公事上嘅來住。不過後來從同事2(同事1嘅下屬)嘅口中得知,原來同事1真係好有問題,重點唔係佢有咩問題,所以我唔會响呢度詳細講同事1嘅問題。主要係從呢件事之後,我就好相信朋友A嘅直覺,亦都唔敢再睇少女人嘅第六感。

Anyway,佢無論attunement,幫人做healing都好有feel,真係令到我好鬼死咁羨慕。不過都係果句,我唔會強求,只會平常心去面對。而家就習中精神,努力d練習,我想信遲早我都會到呢個level嘅。

不過唔知係唔係咁啱得咁Q呢,我本來應承左星期四send d心經比朋友A嘅老公,但係星期三晚突然有種感覺,覺得果日係要send心經,但係當我一send嘅時候,我就醒起原來send早左一日,本來想立即收工,但係唔知點解好似好想繼續send,於是就一路send,send左三編心經再加一編大悲咒先停,但係當send到大悲咒嘅時候,發覺手感突然間變左,變得好溫暖。初初以為有好轉添,但係原來朋友A老公啱啱飲梗熱湯。。。

呢次真係錯有錯着,佢地星期三晚原有一d好切身嘅問題要傾,朋友A本來覺得佢老公會好激動,但係佢老公出奇咁平淨。第二日同佢傾返,佢就覺得可能係因為我send左d心經比佢老公,所以佢老公先會係咁。不過點都好啦,都好開心聽到佢老公可以做到咁平淨,一來對佢嘅身體都會好d,二來朋友A都會開心d。

唔知今次係咪其實我嘅濳意識收到風,知道今晚佢有事發生,叫我早少少send心經呢?如果唔係我都唔知點解會無啦啦早左。

星期五, 12月 14, 2007

用錯左天眼都唔知

有一次同Terry師兄講開,先知原來我一路都用左天眼睇嘢都不自知。其實我不嬲都睇唔到咩,所以就以為自己無用到天眼,當然我都唔識用,但係有時合起雙眼都會陰d陰d痛。Terry師兄話我成日都想睇嘢,所以就好不自覺咁用左天眼自己都唔知,呢個亦係我合埋眼有少少痛嘅原因。

Terry師兄教我,同自己講要用心輪去睇嘢???我當然唔明再加返問就係咁簡單就得?佢教我話意念係好緊要,唔講唔信,自從跟Terry師兄教嘅方法去做之後,每次meditate/send energy同healing之後,天眼就無再痛喇,反而個心輪好似撻著左咁。雖然都仲係無嘢睇到,不過我唔強求,只要知道用啱左方法,就已經好滿足喇。有時唔一定要睇到,幫到人就已經達到目的啦,唔駛一定要有嘢睇到架,而且越強求越睇唔到,都係平常心啦,我ready嘅時候個天就自己會話我聽架喇。

分享

近日自從朋友A同alan學完reiki 1之後多左一個可以分享嘅朋友,你知啦,其他師兄師姐差太遠,又唔想成日煩住人,而家我同佢都差唔多,有傾有講開心好多。亦唔知係唔係我地都學左之後,就真係吸引左另一個朋友(朋友Z),不自覺咁成日都過嚟我地果邊,朋友A學之前朋友Z真係無咁成日過嚟架。朋友Z係一個我同朋友A都覺得佢學左會好勁嘅人,事關朋友Z識得睇氣息,佢亦都會有時聽到一d無人聽到嘅聲音,當然無人知點解,更唔好講知道係咩聲音啦。

不過朋友Z近排好唔OK,事源係朋友Z近排成日頭暈,醫生就話佢耳水不平衡,但係睇左兩次醫生都無咩好轉,佢就快又要去旅行,朋友A尋日終於都忍唔住,就咁响公司幫朋友Z做少少healing。朋友A就同朋友Z做膝頭,原因係朋友Z亦有少少膝頭痛,而且又唔想响公司做得咁大陣象,嚇親其他同事就唔好啦。不過當朋友A一路幫朋友Z做嘅時候,朋友Z話勞工穴係咁跳,我都睇到。而且做左幾分鐘,朋友Z就話好似聽到"pop"一聲,之後就聽得清楚左d。我就同朋友Z講,話佢可能個腎唔太好,因為腎唔好,膝頭就會差,而腎唔好,耳仔亦都可能會有問題,如果而家只係heal膝頭,但係連隻耳仔都好左,咁就更加可能係有關係啦。

不過我就唔記得吹個波仔,亦無行開,仲要行得好近添,你知啦,office嘅抽風系統唔會好得去邊,唔知會唔會中左d病氣,夜晚反到屋企就開始有d頭暈,亦覺好攰。於是就早左d訓,好彩今朝無咩事。返到公司,同事Z竟然話佢尋晚唔訓得,於是就send左d energy比同事Z,send嘅時候雖然同事Z無咩feel,但係send完之後佢話無咁暈,都叫做work。我地咁搞幾搞,搞到同事Z都好想去學,不過佢要等去完旅行返嚟先決定。等我星期一我再幫佢一把先,如果又好d可能會令同事Z更加想去學,到時咪又可以多一個同學仔傾吓囉。哈哈。講就咁講啫,主要都係想幫下朋友Z,因為佢再過多一個禮拜就要去旅行,等佢去旅行都去得開心d咁。

星期四, 12月 13, 2007

太極五行功

啱啱好快咁睇完本太極五行功,咁快嘅原因係有一半嘅編愊,係用左嚟講學員嘅成功心得,當然我無睇到啦。先唔講對呢套功嘅感覺住,至於對大師何斌輝,我就覺得佢好有前瞻性,竟然佢知道law-of-attraction,仲要用左呢個concept創出呢一套咁勁嘅功法,呢套功法主要係以意領氣,即係話用意念帶領氣嘅流動,從而將病氣排出體外,以及幫助病患者激發自身嘅再生功能,去同奇難雜症對抗。

本書嘅內容都算唔錯,其中有一個chapter會幾吸引女仕門,佢話辟穀竟然有美容嘅作用,仲會令到皮膚增加彈性同光澤。嘩!淨係呢樣嘢已經可以吸引唔少女門徒啦。

裡面仲有講兩樣嘢我都覺得幾有用,好似話練開功嘅人嘅念力係會比一般人勁,原因係練功可以令到我地進入氣功態,亦可以令到我地排除雜念,從而駛到我地嘅意念更集中,駛到我地嘅念力更强勁。

另外,佢話多數練氣功出偏嘅人,都係自己嘅問題,有d就係因為意念太重,此乃練靜功之大忌,靜極生動,但係一動佢就驚,用意念想馬上停止。又有d因為行氣行得好,身體入面積落嘅病氣被迫出嚟所引起嘅舊疾加重,因為從中醫嘅角度,身體入面積落嘅病氣,係要發哂出嚟先會好,所以有d人食完中藥之後會發病,有d又會病情加劇,就係咁解。但係十個有九個見到d咁嘅情況都唔會繼續練功,搞到無哂信心。當然而家講我就講得好聽,到我有事嘅時候又唔知會唔會有呢種信念啦。

咁啱今日新聞透視又有講呢套功法,佢請左個心理學博士嚟講,從我嘅理解,個心理學博士講到law-of-attraction好似流嘅咁,好似連quantum-physics佢都好似有d質疑咁。嘩!佢就勁啦,連成個quantum-physics嘅學說佢都識質疑,我就唔識喇,差幾班真係差幾班。。。有時我覺得佢掛住一個咁勁嘅博士名,出鏡講嘢真係要特別小心,佢一句真係可以救到唔少人,當然同樣會累死好多人。

最開心嘅都係見到趙來發,佢發福左,睇落好似面色好過以前放左响blog嘅相,雖然我唔識佢,佢又唔識我,但係我睇左佢個blog一排之後,就變得好想知道佢嘅近況,亦好希望佢可以早日康復。

星期一, 12月 10, 2007

氣功

近排不停睇返太極氣功十八式,發覺自己原來都仲有少少印象,一睇返果十式八式都返哂嚟,日日都有keep住練吓咁。再睇返麥燕瓊本書,就發現原來都有少少心法,有興趣嘅不妨搵嚟睇吓,唔錯。

不過我今次嘅重點唔係講功法,而係比我搵到,原來有人做demo,仲放左上Youtube添啊,等我放條link比大家睇吓啦。 本來套功法係有六套功,不過我响youtube搵得三套,睇住先啦,唔錯架,我都係跟住嚟練架咋。



太極氣功十八式 第一套功 (上)


太極氣功十八式 第一套功 (下)


太極氣功十八式 第二套功 (上)


太極氣功十八式 第二套功 (下)


太極氣功十八式 第三套功 (上)


太極氣功十八式 第三套功 (下)

星期六, 12月 08, 2007

生命密碼

自從大師提過生命密碼(Life Path Number/Numerology)之後,就對呢樣嘢開始發生興趣,在同學仔介紹後,認識左靈芝嘅生命解碼篇,之後我當然不斷同唔同嘅親朋戚友介紹呢樣嘢,順便做返個verification咁,睇吓有幾準。

其實之前都有同我自己,老婆,仔仔check過都,叫做起碼有70%準咁,因為仔仔性格仲未成哂形,所以呢個case只可供我自己參考。一次食飯聚會中,同朋友傾開,當然就有朋友唔信啦,主要係唔信人點可能得個九個性格?星座甚至生肖性格咪仲準,話哂都有十二個唔同嘅分別。於是就引發我地嘅另一個話題:-

究竟同一年出生嘅人都有同一個特性(即係同生肖)?或是大概同一個月出生嘅人又會有同一個特性(即係同星座)?還是同一日出生嘅人會有同一個特性嘅機會大d呢(即係同生命密碼)?討論得出嘅結果係:同一個類別嘅範圍越大(生肖),佢個focus就越General。而當個頪別嘅範圍越細(生命密碼),佢個focus就越Specific。亦即係各有各focus,無話邊個準,邊個唔準。當然最Specifica嘅莫過於子平八字或者紫微斗數啦,因為佢地都玩到落時辰,不過就真係唔係咁易,無可能就咁一路傾一路都可以幫朋友check到,起碼以我而家嘅資質就唔得,無返幾年時間嘅苦練都唔會練到有咁嘅功力。即係話生命密碼係一樣好方便嘅工具,幾時都可以幫人check吓玩吓咁,就連收CV都可以馬上幫佢check吓睇吓個candidate啱唔啱駛,真係好似迷信左d添。。。

一路同唔同嘅朋友check,佢地個個都話準。我作為外人睇返,當然都覺得同我睇到嘅佢地,性格上係幾match,而佢地又再同佢自己嘅家人check,連佢地都話OK準。

當朋友問我係咩number嘅時候,我嘗試介紹卓越數(master number)比佢地,可能因為我係我識嘅朋友當中唯一一個係卓越數,所以仲未介紹過呢樣嘢。我好簡單咁講有卓越數嘅人,一生都會有大大小小嘅挑戰,命亦比較硬。之後諗返起,作為一個22/4嘅我,原來我真係有唔少死唔去嘅經驗。

好似小六畢業旅行咁,上一條樓梯,上到中間停嘅地方(即係比較平嘅地方),同一個同學仔玩,點知無啦啦比佢一推,我成個人向後跌,一跌就跌返落去之前一個停嘅地方,個人就一路都係直跌,仲咁啱有人響後面扶一扶,我先停止左個跌勢,亦即刻企得返響度。唔係嘅話,我身上點都最少會多一兩條疤痕。

又有另一次,跑去追巴士,跑到差唔多馬路口,見架車就響正對面馬路,又就快要開,於是望都無望,停都無停就繼續跑埋過馬路。講你唔會信,我一踏出馬路,馬上感覺到唔對路,唔知點唔對路法,總知就感覺唔舒服,仲要係好唔舒服果隻。於是就諗都無諗,馬上用盡全身嘅力向後退,點知即刻前面有一陣風經過,一架十四座就響正面前,全速經過,直情同架十四座零距離接觸,嚇到我當堂成個人都呆左,企左響度起碼一個字,郁都唔郁,唔知係腳軟唔郁得,定係唔想郁,因為咩都諗唔到,呢一次係我人生中最驚險嘅一次,亦真係唔想有第二次。

之前又試過無啦啦成個人跌左落猪屎池,我果時仲細,根本唔識游水,唔知點解個人,又會自己由池底(我感覺到隻腳真係掂到個梁底架)浮返上池面,聽講話個猪屎池都有十幾二十尺架,浮唔返上嚟就死梗。

大個左之後,有一次唔知醒,約左公司嘅人十點響大嶼山等,點知十點先醒,於是就馬上打電話,話比佢聽要遲半個鐘先到。跟住就飛車由藍田去大嶼山,當然係開到真係飛咁快啦。沿路都陽光普照,點知上到三號幹線,竟然突然之間傾盆大雨(落狗屎),視野跌到落去五米樓吓,鬼咁趕時間嘅我咩都唔理,照樣開得咁快,完全無收慢過部車,連咁嘅意圖都無。開得有幾快?半個鐘內由藍田去到大嶼山囉,仲要計埋換衫同落樓去停車場嘅時間喎(好似連牙都無刷)。嘩,竟然咩事都無,但係沿路所有車都自動行中慢線,快線一架車都無,如果有一架車響快線我就死梗,而家諗返都覺得想當年真係唔識死。

至於挑戰就當食生菜啦,唔好誤會,並唔係話食生菜咁易喎,係食生菜咁多。。。我由細到大,諗得最多嘅,就係"有無搞錯啊,點解又係我嘅?"。好似話個個偷嘢食都無人發覺,我偷親都中(即係比人發覺)。總知多到數唔盡,後來大個咪諗,好嘅,上天又比考驗我喇,又係練習嘅時候。個人就開心返好多,唔會成日向唔好嘅方面諗,不過當然好多時都會唔合格,不過合唔合格在我嚟講都無咩所謂喇,最緊要盡左力,問心無愧就算。連我自己都唔知點架,可能係因為習慣左唔合格嘅感覺呱?

可能就係咁,我有時都幾"pei",所以我老婆成日都話我,唔係一就係九,我個人係無四,五,六果d咁話喎。即係話我一係就搏哂老命,一係就郁都唔想郁咁。。。因為我覺得上天會不斷考驗我,所以每次我要出擊都一定要比其他人用得多力,亦唔可以有保留,要盡全力先會有機會。但係如果當我覺得,果樣嘢對我嚟講係無咩可能,又或者覺得無理由咁so我嘅時候,我就會郁都唔郁。。。不過又好似唔係好關事咁喎,都好似係懶多d,哈哈。。。不過講開又講,又可能係咁,所以有時我都幾掋得諗,亦可能係咁,所以都試過響一間公司,升得比其他能力比我高嘅同事快。亦可能係因為咁,上次響之前果間公司裁員,到最後都無諗到要裁我,當然好多被裁嘅同事能力亦比我高。亦可能因為咁,雖然有d朋友都察覺到,我其實有時都幾黑仔,不過我不時都會覺得自己其實已經好好運,亦覺得做人一定要知足,要識感恩。希望我以後,都繼續不繼有大大小小唔同嘅感恩嘅機會。

星期四, 12月 06, 2007

遙遠發功-2

唔記得補返遙遠發功嘅結果添。我個c9 friend話有feel啊,話周身都突然痛喎(咁勁?)。仲話過左十分鐘就突然好眼訓要即該訓添。哈哈,即係成功左左。點解咁開心?因為成日幫老婆發功,佢都話一d feel都無,幫師兄做都係一樣,搞到我幾無信心啊。所以今次我先咁開心,因為對我嚟講係一個肯定。

我呢排(上完level 2之後)無練氣功,又無練瑜珈而將d時間用哂嚟玩遙遠發功,都真係值嘅。不過我估我都差唔多要開始返果d練習,真係不能停太耐。。。你話一日得二十四個鐘,d時間點夠洗呢?

講開又講,唔知點解近排練無尚瑜珈無咩feel嘅?一d熱熱地嘅感覺都無哂,停左一日啫,就差咁遠添?可能又要練返一頭半個月先有返果d效果喇。

加油加油加油!Fighting!

而家觀想梗阿宋慧喬同我打氣啊。並唔係幻想,而係一邊觀想宋慧喬,一邊練功,哈哈。。。

講笑咋,咁做唔走火入魔就奇喇。。。

星期三, 12月 05, 2007

太極氣功十八式

啱啱用左兩個鐘,好快咁睇完本麥燕瓊寫嘅"太極氣功十八式"。快嘅原因係一來自己之前學過,二來我對動作嘅形容skip左好多,原因係睇完都唔一定會明,所以真係好佩服可以睇完功法就學得識嘅祖先同埋前輩。再者我又有VCD睇,睇VCD學易學好多。主打都係睇每一式嘅呼吸同功用。

除左功法外,佢都有提想練呢種氣功嘅人應該知下面呢幾樣嘢:-

另外佢提到原來唔係人人都練得,呢樣真係唔講唔知,點解上次阿sir無講到嘅?定我無聽到呢?

1。嚴重神經衰弱者 (唔明)
2。癲癇患者 (佢話會引發癲癇發作)
3。剛做完大手術的人 (正路)
4。懷孕不足三個月的孕婦 (都係正路)
5。月經期的婦女 (怕出血過多,但係如果係唔夠或者唔順呢我估即係得?)
6。有出血性疾病患者 (佢無講點解,我估都係同5一樣呱。)
7。七情過甚的人 (明明地。。。)
仲有其他,不過唔係好特別所以無放上嚟。

唔可以練功嘅情形:-

1。大雷大雨甚至颱風 (無聽過,但係佢講到會好危險架。最好都係唔好試喇。)
2。啱啱嬲完 (都無聽過,不過佢都講得幾有道理。)
3。太飽太餓都唔得 (雖然無聽過,但係我唔會囉。)
4。午時 (個個氣功阿sir都會教,不過佢講有case係要午時練,總算佢唔係一本通書睇到老。)

另外佢仲有講下面好搞笑嘅嘢:-

1。練完會有機會多屁。
2。練功前記得去解清大小二便。 (唔好講笑,我試過一次唔記得真係好。。。辛苦架。)

而睇完佢嘅成功案例就更加令我相信每套功法對唔同人都有唔同嘅效果,佢d成功個案都幾勁架。佢除左介紹林厚省嘅太極十八式之外,仲有教少林站樁功同保健按摩功添,大家想知嘅不妨搵嚟睇吓啦

佢入面亦提到日子有功,大小周天都會打通,呢樣我都信,不過要幾耐就要睇你有幾勤力同有無恆心喇。

最後我想講我唔係將所有要知嘅都copy上網,呢個亦唔係我嘅Intention,所以有興趣嘅都係搵返本嚟睇吓,有唔少嘢我之前學嘅時候阿sir都無講架,所以都值得一睇架。(唔知係唔係我skip左果d堂阿sir先講呢。。。)等我睇埋隻VCD睇吓仲記得幾多式先。。。

星期二, 12月 04, 2007

西方reiki嘅分別?

今日終於都有機會同個c9 friend講返佢呢兩日半學過d咩喇,結果係如下:-

History
Introduction
Attunementx4
Meditation
同學功課分享
個別case嘅成因及主意事項(包括hand position,飲食及日常生活主意事項)

係咁多!我問佢咩病氣,清場,氣場,七輪等等一概無講。。。以為miss講英文,所以我就用英文講一次Aura,Chakra,Byosen Scanning。但係個結果都係"咩嚟架?"。佢仲話healing好快架咋,只要focus有事嘅地方去做就得架喇,做到手感有變就可以停架喇。我問佢點知邊度有事?佢就話問被你做嘅人咪得囉。。。

但係我平時同老婆做到一半都唔夠,佢就會係咁有嘢散出嚟,如果淨係做一度得唔得架呢?

不過佢地個個同學仔(除左我個friend)都好有feel架,有d又會想嘔,有d又頭痛,有d仲出哂汗添,有d響幫人做梗嘅時候會feel到個人原來有第二d地方唔掂,佢miss教話cancer都可以做,我真係搞唔明,不過希望佢真係咁work啦。。。

慈悲與同情

近排好多事發生,特別係發生響我身嘅朋友身上,亦有d係發生響我啱啱認識嘅朋友身上。每每我都好想幫手,亦周圍搵人一齊幫手,但係我都唔知我算係出於同情?定係慈悲?呢條題目對我嚟講實在係有d難。。。

第一堂大師都有問我地咩叫慈悲與同情?我唔識答,大師當然有解釋,不過我都好似明非明咁。唔通係因為呢樣嘢真係太過抽象,定係我太蠢?

師兄都有三番四次提點,我開頭都以為我明,但係越諗又好似越唔明咁。佢近排都有響佢個blog度再提我一次, 點知今次我睇完之後,突然間。。。。唔係明左而係好唔明咁。。。

其實原來一路我都唔係太明,道理本來好似好簡單咁,但係又好似好難咁。。。Thats why大師問我嘅時候我都唔識答。。。

唔明係唔明在,即係如果你個friend有事,你都唔可以主動出手?咁如果係你屋企人呢?都唔得?

但係如果咁,點樣行善啊?上天唔係有好生之得架咩?

我見到識嘅人出事,次次都會忍唔住出手。因為覺得呢個世界d嘢真係好似"慧眼視心靈講"咁,事出必有因。咁大個地球,無啦啦都比你識到佢,可能係上天嘅安排,唔一定係男女關係先係咁,朋友亦如是,同事亦然,會唔會可能呢個就係上天要你幫佢手嘅安排呢?再講,今次係你嘅同事,講唔埋聽日可能係你最好嘅朋友。

而且無啦啦好難會有人主動叫我幫佢架喎,一來我學嘅嘢咁另類。二來就算係明知得嘅,佢都唔一定好意思叫我幫手架?可能我試過太多次嘅無助,所以就有咁嘅感覺,覺得朋友家人有事就一定要有雷,要幫拖。可能我真係唔啱,但係又真係好難唔咁做,因為畢竟我就係我,唔知係唔係叫江山易改本性難移呢?

當然,出手之前我都會睇吓點先係最好嘅安排,如果係非我能力所能做到嘅,我就連講都唔會,費事比到一個假嘅希望佢,因為咁樣只會對佢做成更大嘅傷害。我亦真係有過一次(以上)咁樣嘅幫人經歷,其中一次真係好深刻,因為去到最後,我終於都明白到,原來件事唔係我能力可以step-in,咁嘅情形之下我唯有放手,亦傷得佢好深。我自始都經常會以此為戒,唔想好心做壞事。

其實有d嘢我又似係明左,好似話如果係出於同情,我嘅能場就會比佢拖低,咁就一定幫唔到件事,只會好心做壞事。對於呢個角度我無異議,完全同意。但係我真係唔會做到自己出手,但係都keep住只係慈悲?慈悲一定唔可以自己出手?

近排其實都係咁睇唔同版本西藏生死書啊咁,見到d上師修嘅拖受法,大概好似係要背負起目標人物所有嘅惡業,將呢d惡換哂做善業。如果係咁,拖受法究竟係算慈悲定同情呢?

越講越唔知自己想講咩添。。。都係等我再睇多d書,搵多d資料先再返轉頭講呢單嘢先。

星期一, 12月 03, 2007

遙遠發功

近排終於都識個c9 friend學reiki喇,叫做有個人啱傾咁啦。不過佢上完level 1話同人做或者比人做都無咩feel喎,於是我咪蛇王嘅時候同佢玩吓遙遠發功囉。但係我無事先同佢講,不過知道佢響屋企做吓家務咁,突然間收到energy應該無咩問題咁。發功嘅時候我覺得好熱,真係好熱,之前其實同佢玩過一次,但係就無熱嘅感覺,仲以為自己嘅問題,不過就同之前一樣好"吉"。

之後問吓佢做梗咩,有無咩特別嘅感覺咁,佢當然話無感覺啦,之不過佢話佢煲梗粥比仔仔食,唔通我覺得熱就係咁解?再之後佢話佢會take個rest,叫我send d energy比佢feel吓,事關始終都係響公司,蛇王都不能太過耐,於是就send左兩分鐘比佢,但係今次一d feel都無,我估佢都無咩,果然同佢check嘅時候佢都話無feel。

我之後就再約佢今晚再send一次,一來我可以專心咁send,二來佢亦可專心咁feel。後記再補。

我老婆都話我好勁啊。。。哈哈。。。-2

尋晚我幫我老婆做完一輪之後,佢隔左一陣就過嚟同我講,話個頭就好左好多,但係隻腳就仲痛過之前。。。吓?唔係呱?

於是我就淨係幫佢做隻腳,再加少少massage。做完之後佢話好正,唔知到底係massage work定reiki work喇,不過我一路幫佢做就覺得自己隻腳係咁散嘢。。。

星期日, 12月 02, 2007

我老婆都話我好勁啊。。。哈哈。。。

今晚外母抱左BB出街,得返老婆同我兩個人響屋企。無左BB阻頭阻勢,又見悶悶地,咪同我老婆玩吓囉,哈哈。

我一嚟就同我老婆做個scanning先,但係發覺唔係有太明顯嘅分別,於是就咁幫佢用level 1嘅方法做吓就算,因為時間唔多,費事做到一半BB返到就唔係咁好。做到差唔多完,突然醒起自己發梗夢,唔記得最新學左嘅,仲有一樣叫七輪經脈healing添。於是馬上幫佢做一次,點知我一起手,佢就即該話好勁好有feel喎,搞到我幾開心啊,d信心直情返哂嚟,但係做到尾我問返佢有咩feel,佢竟然答我話唔記得左。。。真係比佢吹漲。。。不過做完哂之後,佢就話本來之前好攰,因為開完工,但係我幫佢做完之後佢就精神左好多。

啱啱睇完William Rand最新一期reiki magazine,發現佢原來有教用眼幫人做healing,叫做咩"Gyoshi-Ho",真係好鬼勁,如果用隻眼望吓就得,咁咪唔洗花咁多功夫?真係好啱我呢d懶人喎,搞到我好想買佢果套Reiki Touch Kit添,不過就係好唔想比果d運費,d運費竟然同果套disc set嘅價錢差唔多,真係有無搞錯。。。

Anyway,而家唯有等大師開level 3啦,上level 3話唔埋大師又教一d好勁嘅嘢過我地玩吓呢,真係諗起都興奮,哈哈。