星期二, 7月 31, 2007

self healing 真正第一擊

尋晚返到屋企一身都係汗,坐左一陣換左件衫就坐埋枱食飯.坐埋枱果陣個頭仲係濕嘅,仲要比個冷氣風口次到正都不以為意繼續食飯。到睇完强劍就開始覺得個人有d攰,個頭仲有冷汗出添,上半身d骨有小小痛,個頭仲又有小小晕添.死喇!即係中左招,開始病。第一時間幫自己做返一Part Self Healing,點不知唔見左個火機,你都唔好話唔黑。於是我就馬上落OK買返個火機,上到嚟我老婆仲話我似煙隱起添。

Anyway,講返個Healing。其實之前都有做過,不過就無做得咁耐,亦都係無Focus咁做。今次就唔同喇,我係想醫好我個初起感冒,所以我就主力做頭同埋個心輪嘅地方,初頭感覺好熱,到做到無咁熱先轉地方做。一般幫人做唔會掂人,所以手感會好好多,但係自己做就當然掂到實,所以多數無手感。呢次係我自己第一次感覺到有手感唔同。而且今次幫自己做明顯感覺到自己好似好返d咁,真係好有滿足感。亦都真真正正Prove到我嘅Reiki係真係work嘅。其實自從練左Reiki之後,個人都訓得好左好多,已前一個星期總有一日訓得唔太好,會半夜起身。但係練完之後就差不多完全無試過,只有一次真係比d衰人搞得太過嬲先再次訓唔著。所以話Reiki係真係可以幫助到訓覺架,今次我仲Prove到係可以幫到醫輕微感冒添。

星期一, 7月 30, 2007

reiki其實係好科學?

其實自從由Terry師兄blog中得知Reiki之後,大大話話都睇過過百個Website,亦都睇過兩三本書。原因好簡單,因為我從來都唔鍾意不求什解。每學一樣嘢我都鍾意尋根究底, 其實我係唔明就一定學唔識,因為我唔鍾意死背。亦因為咁,我有好多樣都學唔識(可能因為資質嘅問題)。所以每學一樣新嘢之前,我都會做好多嘅research先,最起碼要知少少先會開始去學。

Anyway,其實我上網睇,多數都係從一般人嘅角度講Reiki係咩,好少會有人從科學嘅角度解釋。本來搵到 NCCAM都有介紹Reiki,不過佢竟然對Reiki都唔係好有科學嘅background。跟住Terry師兄借過一本Reiki for idiot(唔係好記得Exactly個名係咩)比我,睇完都無咩特別得著。亦都睇過一本書叫"每個細胞都有無限能量和夢想",裡面多數都係Case Study講返靈氣點樣幫到人。不過其中都有一個Section講到德國對勞功穴做過一d研究,話每個人手心都有一d馬斯聶魯組織。馬斯聶魯組織係可以分泌一d哮素,而馬斯聶魯組織在手指尖就更加隻中。好可惜我在Internet上面都唔係好search到馬斯聶魯組織嘅資料。

在眾多Website當中,睇到William Lee Rand嘅website裡面嘅一份PDF用科學嘅角度講過吓Reiki。份PDF係William訪問一個叫"Oschman"博士關於Energy Healing嘅研究。不過佢其實都只係好Focus on Magnetic field嘅Effect,亦唔算係一個Research,因為只係一個Interview。我個人覺得如果只係Pure Magnetic Field,咁Scientist一定可以有方法做到一樣嘅效果,所以一定有d嘢嘅,不過以我咁嘅資質,都係唔好諗咁多。

另外,Kokoro Naturopathy & School of Reiki Healing有一編Article就話Reiki嘅Healing Effect係由Healer嘅一雙手所發出嘅Alpha band frequency去呼喚起自身嘅Healing功能。都講得幾似Quantum Touch,我覺得又唔係話太過全面,因為Quantum Touch裡面有好多Additional嘅Skill會影響到Healing Effect,但係Vibration嘅Frequency又好似唔係話完全Cover得哂。好似佢有教人用Spiral嘅方式去Send Energy,咁嘅話個Wave Form又會點?Anyway我覺得個Frequency應該唔會有唔同。

Finally都係覺得自己唔會太過明,唔通就係因為咁,所以好多人都instead用experiment(好似Scientific Studies on Reiki)嘅方式去Prove Reiki係唔係真係work?講講吓我都好似唔係好可以Conclude到。唉!唯有實行只要信不要問,好似學中醫或者氣功咁就算。

講開氣功,有一種氣功叫做"智能氣功",佢個concept都係要由混元中得氣,而混元其實就係宇宙,咁佢咪即係同Reiki好似囉。而且佢同Reiki一樣都係用中脉,唔怪得Alan都話Reiki有d似外家氣功啦。

唔通師父成日話學氣功係要悟性就係話好難從科學角度解釋呢樣嘢?難度Reiki都有一樣嘅特性?

星期日, 7月 29, 2007

BB嚇親?唔洗驚,原來係嫲嫲。

前幾晚吼住個個都訓哂,BB又差少少先夠鐘食奶。於是就聽下心經,當然無用earphone,只係開到好細聲咁,之後就發現BB耐唔耐就叫,又會成個好似比人嚇親咁郁,又唔知咩事。Anyway,我馬上熄機唔再聽,點知BB都係咁,無咩點再理佢。第二朝同老婆講起,佢就話自從BB由健康院返嚟之後都係咁架喇,所以我就當無事。不過就成日都心掛掛咁。

第二日email度見到有個師姐聽聽下心經,屋企隻狗仔就開始亂咁叫,吓?咁似我個case嘅?唔通唔係偶然,而真係關心經事?Anyway,同師兄/姐傾完佢地就叫我吹波仔,保護住成間屋,亦都教我read七輪圖同諗返同佢地一齊gathering唸心經嘅moment。於是我返到屋企就照做。不過BB都係一樣郁,但係就少左。訓之前做左一個meditation,點之見到阿媽,雖然我真係好掛住佢,因為自從佢走左咁多年之後,我都未試過夢見過佢(多過二十年),亦都無試過諗起過佢個樣。我知佢有嘢講架,不過又唔係好聽到佢講咩,唔通真係嫲嫲返嚟見BB?

不過我都無同屋企人講,費事嚇親。而且佢地都仲係唔係幾信咁。Anyway,終於都見返阿媽心情都好似好左少少。真係好希望可以再見佢一次,聽清楚佢講咩先。

星期三, 7月 25, 2007

BB 好黃,alan原來真係好好人架。

好慘啊,BB出世第三日醫生竟然話佢黃喎,要Keep住monitor,如果太黃就要照燈。其實都知道BB仔黃都係幾common架喇,但係發生o係自己身上感覺都仲係會幾大,其一係唔知佢會幾時好返,其二係怕佢一旦要照嬁都唔知要洗幾多錢。Anyway,我呢個level I仔只有靜靜地等待。

到左BB出世第四日,亦即係出院果日,好緊張咁一早就去到醫院等醫生巡房,當然好希望可以同BB一齊出院啦,好可惜醫生竟然話比我地聽BB都黃得幾勁,尋日16x,今日就已經去到280。嘩!真係幾勁喎.我地都覺得BB一日黃過一日架喇,不過聽到都係唔係咁開心啫,於是我咪叫我老婆快d去喂埋奶先出院囉,點不知佢返嚟果陣我竟然見到佢眼濕濕喎。同佢傾果陣佢話佢都知係好common,亦都知多數都無咩事,不過一心諗住同BB一齊開開心心返屋企,無expect BB唔走得,所以一時忍唔住咁啫。但係其實我都有d想喊架,因為醫生同我地講要二千至三千蚊一日,仲要多數都要照兩日燈添。。。咁咪即係最少都要成五千至七千蚊先落到樓?食左我隻車咩。最唔開心係仲要比左贖(按)金先。嘩,人質(BB)都o係你地手啦,仲要慌死我會走數?要我比錢先,你話有咩辦法唔想喊吖。

返到屋企見到Terry師兄Online MSN咪同佢傾吓睇吓有咩可以搞囉,佢叫我馬上call Alan,但係我又怕阻住師父唔係咁好意思。諗左一輪都係決定打個電話比Alan,最多師父唔得閒我就馬上收線。點不知Alan聽到之後無話我煩不特止,知道個Symptom同Cause之後仲馬上話幫我搞搞佢,嘩。真係謝天謝地。

到左BB出世第五日,我收到電話話BB黃嘅Condition開始under control,只係升左8度,即係288。睇嚟聽日都應該出得院,不過我老婆當然好掛住BB,所以下午六點左右就去左醫院喂BB,佢一返出嚟就同我講,BB嘅面色都已經好返d,隻眼白仔都已經無咁黃喇,哈哈,我之後同佢講話我叫左師父幫手,聽日應該出院無問題,不過佢都仲係唔係好信,鬼叫我仲係level I仔,佢唔信我講都唔出奇吖。

Anyway,到左第六日,醫生果然話BB今日出得院,真係thank god。吖,應該係thank Alan先真。Alan真係好有心架,佢仲打電話follow up問我BB個condition係點添,我呢個大頭蝦仲唔記得主動打電話話返比Alan聽,順便say thank you添,真係罪過罪過。希望Alan大師有大諒,原諒我啦。

BB出院果時醫生仲話BB仲要keep住monitor,仲叫我地每兩日返去一次添,no thank you啦,我邊有錢每兩日比五舊佢啊,好彩我老婆都醒,同BB一返到屋企即刻打電話去健康院,我地交左咁多稅都係時候用吓呢d福利架喇。唔洗一陣老婆同陪月帶BB去健康院返屋企,佢話BB都仲係有d黃,頭仔大概係18x,而身仔就大概係15x。都仲係要繼續monitor住咁話,約好左二十號再去覆診。我都無咩點放o係心,因為好多人(我d同事)都話第四同五日係高峰,過左就會無事咁話喎。

BB返到屋企都仲有d攰攰地,成日都訓,就算唔訓佢隻眼仔都係合埋。我就趁無人同佢玩吓七輪呼吸。嘩,你都唔好話唔信,我每一次吸氣佢都開眼望到實,而每一次呼氣佢都皺哂眉頭。不過我就唔敢亂咁同佢玩其他嘢,如果唔係真係好似上次咁玩出火就唔知點收科,你知啦,佢又唔識講比我地聽佢有咩事,我講佢仲要唔明添,都係唔好亂嚟喇。

到左二十號,健康院話BB仲黃左,今次個reading係頭仔198,個身就係184。我真係知錯喇,我d同事仲話應該過左高峰就會無事架喇,邊關你個師父事吖。。。當然我從來無咁諗過,不過我只係覺得我自己overlook左,應該一早就要同BB試吓個氣場。Anyway,我返到屋企都有馬上趁無人同BB試吓個氣場,一試之下就發現佢個肝都幾"吉"吓,又唔敢同佢做得咁勁喎。你都知啦,話哂都係BB。點知馬上就收到Alan嘅問候電話,事關佢見到我之前個Post話心情唔靚,佢馬上打比我問候,睇下有咩可以幫忙,真係唔話得之中嘅唔話得。

我同佢講完個case(無同佢講仲黃左,只係同佢講仲係黃),佢話比我聽其實而家係要同媽媽一個星期做三次,一來媽媽真係有需要,二來原來媽媽同仔仔仲有連繫,幫媽媽做完都會幫到仔仔.於是我就梗係當晚就試啦,你都唔好話唔信,媽媽個肝都係有d“吉吉”地架,仲要都幾熱添.Alan真係有料到,於是我就幫我老婆做左兩日Full Session,每一次同佢做,特別係做到個肝嘅位置阿B都會叫,我真係信到十足十架。

二十三號夜晚,好榮幸受到Terry師兄邀請,參加左一個Reiki Circle,果晚真係學到好多嘢,又實到係唔好意思,因為得我一個Level I仔,所以搞到佢地玩都要就住就住咁。不過就知道原來佢地都有睇我個Blog架,真係失禮死人。到左最後大師兄就同我地玩左一個心想事成Attunement,我就一心諗住阿B嘅黃快d無事咁,可能因為分左心,定係我真係太低Level嘅關係,個個大師兄大師姐都好有Feel,但係我就無咩特別强嘅feeling。

到左二十五號外母同玉姐(我地個超級陪月)就帶左阿B去覆診,醫生都話比佢地聽阿B好返好多喇,個Reading得返150(不過唔知係頭定身)。得心想事加埋幫老婆做左幾晚終於都有成果喇。Terry師兄今次真係幫左好大嘅忙,唔怪得我個八字話我有貴人啦。不過都啱唔哂,因為係有好多貴人至真,真係多謝哂各位師兄師姐同大師父嘅幫忙,無左你地幫忙阿B真係唔會好得咁快,連陪月阿姐都話阿B大得快左。

星期三, 7月 11, 2007

靈氣療法初體驗 - 4 (玩出火添)

越練越有信心,星期一仲由返工玩到放工,點不知終於都玩出火.放左工我就係咁玩七輪呼吸同保護罩,由炮台山一路玩,點不知未到由塘已經揵著左個太陽輪,係咁做七輪呼吸,點知點都熄唔返,你話死唔死!落左車就feel到好多唔同嘅嘢,但係我真係唔知點樣形容,總知一路行返屋企,一路個人都好有Feel,不過唔係咁都唔知原來打開左個太陽輪,個人係咁靈敏架.

以我所知,開左個太陽輪係會係咁吸嘢嘅,唔理好唔好通通都吸哂,雖然都知咁搞法真係好唔掂,但係鬼叫我識開(都唔知係唔係)唔識熄咩.返到屋企又見到大師兄(我個舊同事)online MSN,咪馬上問佢點搞,先知原來我搞錯,要媳返個輪位原來唔係做七輪呼吸架.....原來係要Read七輪圖架....

知道之後都無馬上做,因為屋企點都應該唔太危險嘅,咪慢慢食完飯先試下囉,點知Read完七輪圖三四次都唔得....咪又再問下大師兄,原來仲要做Meditation架,咁我咪幫我老婆做完個Healing Session先慢慢做Meditation,點不知做左好快就連靈氣五戒係咩都唔記得,無辦法啦,都未自己做過,唔記得都唔出奇啊(仲要係咁比惜口自己)....Anyway大師兄再次話左比我聽靈氣五戒係(今日不憂,今日不怒,今日誠實謀生,今日感謝一切福祉,今日對一切衆生慈悲)之後,我就馬上做左兩次Meditation,點不知都係唔得,後來問下大師兄知道訓覺都OK,咁我就梗係好懶咁訓覺就算啦.呢個故事真係教訓你唔好亂嚟.

之後幾日都唔敢亂做.後來問左師父,原來我係咁做七輪呼吸係會儲到Power落d輪位度,當Power夠d輪位就會打開架喇.....佢仲叫我唔好亂咁o係街做添......如個真係想熄返個輪位係要做Meditation然後先再Read七輪圖,一次唔得就再做,做到得為止,因為你都唔係話做一次七輪呼吸就開到個輪位(起碼以我嘅功力就唔得啦),所以要熄都係要做好多次架.呢d真係唔係叫做勤力,係叫做亂嚟.搞到好事變左壞事咁,仲之後大拿拿幾日都無練功添.

星期四, 7月 05, 2007

靈氣療法初體驗 - 3

我啱啱上個星期二同三,跟左Energy Workshop個Reiki Master Alan Lai師父上左兩次Usui Reiki Level I Course.雖然有少少貴,但係我個舊同事極力推介Alan,而我個舊同事為人係非常信得過,所以我就貴d都搵Alan學.

上完第一堂個感覺係,好奇怪,又唔係話無感覺,只係勞功穴感覺到好似比人撻著左咁,總係覺得有嘢由勞功穴不停咁出梗嚟咁,之但係我一上到去已經有少少感覺,只不過係落堂之後感覺比較大咁啫.仲有樣嘢想講,就係Pendulum Test喇,上次我個舊同事幫我Test嘅時候就係無料到,但係唔知係唔係我自己亂咁試練Quantum Touch嘅關係呢,竟然我未做Attunement個Pendulum都郁喎,仲要係兩邊唔同方向,左手順時針,右手逆時針,完全係我自己練習Quantum Touch時個心諗住嘅方向,不過最奇嘅就係當我練完七輪呼吸之後,兩邊個Pendulum真係向返同一個方向喎,而且個Momentum仲勁左dd添.講返Attunement,坦白講真係有少少失望架,事關我仲以為attunement會好有feel,但係我就零feeling.

第二日一早起身竟然發覺喉嚨痛,真係唔知係咁啱得咁Q定係點,事關上次我亂咁睇 Alain Herriott嘅Seeing and Perceiving Energy - Energy Perception Training 1 VCD,一路跟足嚟玩Test氣埸玩左三個幾鐘都唔係好Test到外圍氣埸之後,個喉嚨都係咁痛,最後仲要衰到睇完醫生兩次先好得返.懷住唔係好開心嘅心情上第二堂,點不知有好多好勁嘅嘢,真係估都估唔到,完全令到我有值回票價嘅感覺.不過我諗我唔會o係我個Blog度講太多,事關呢d都唔係重點.個重點係我Practice嘅時候開始覺得有料到,我係話我Practice Healing嘅時候我自己都幾有Feel.Feel呢吓嘢對我地呢d學神嚟講真係好緊要架,事關係比到我地一個肯定同信心.

有左呢個信心之後,我就每日都自己練習,無論係坐地鐡,去WC,吞Port果陣,都不停練,又練七輪呼吸,又玩read七輪圖,又練Healing,又玩清理氣埸,又玩氣針啊,總知學過咩就玩咩.返到屋企仲勁,仲玩埋全套self-healing添,哈,仲要咁啱屋企又有Candle可以燒哂d病氣.玩左兩日,之後就覺得個喉嚨好返好多,之後覺得呢件事唔會係咁啱得咁Q,上網又咁啱比我搵到阿吳清忠老師個人體使用手冊入面講膀胱經排出寒氣係會令到肝經變得熱,因而會喉嚨痛.當然唔知我係唔係呢個case,不過練得多就連果少少喉嚨痛都無埋,講係,相信亦不太過.

講開又講,自從練左Reiki之後,雙手嘅氣感大左,有次由地鐡行去商場嘅時候,又學人玩七輪呼吸,隻手又不停少少咁劃cho-ku-rei,點知差唔多到商場嘅時候隻手嘅氣感大到好似可以出龜波氣功咁添啊.你都唔好話唔勁.

跟住上第三堂之前一日,我又係咁玩self healing,又係咁玩七輪呼吸,又係咁玩read七輪圖,然後就去訓,點不知訓到半夜,突然醒醒地,覺得身入面有好多feel,好似好多氣係入面行嚟行出咁,個人又好似有d攰攰地咁,但係又話做訓得著。到第二朝起身,個人又無話攰,仲好似好龍精虎猛咁添,真係好似大唐雙龍轉入面,練左長生訣咁,好feel到你唔信。

到左星期日我上第三堂,我地又有新嘢玩。講返個Attunement,呢次個attunement係大師姐Chirstina幫我做,就真係有d feel,直情感覺到有d氣由膊頭一路落到去隻手度咁,之後個大陽輪同個臍輪都有d熱熱地。放左學咪又係咁玩係咁玩,直至返到屋企為止.返到屋企食完飯就馬上搵阿外母開開刀,同佢做左一個Full Healing Session,只係skip左佢個頭,事關佢成日頭暈頭痛咁,阿Sir就叫我地小心d,唔好做個頭咁耐,我為左再小心d就連頭都skip埋.哈,你都唔好唔信,第二日我老婆同佢通電話嘅時候佢話未返到屋企都差不多訓著,一返到屋企直情一覺訓到大天光添.