星期三, 1月 30, 2008

初次sit-in樂與怒

啱啱sit-in左兩堂usui reiki 1同埋一堂usui reiki 2,真係獲益良多。亦比我見到,原來曾經嘅我(有過一次差不多一樣嘅表現咋),有幾面目可憎。。。真係罪過罪過。。。從另一個角度睇,Alan嘅修為真係好勁。

Anyway,今次sit-in,最大得益有四。

第一,原來有多過一個方式,去寫同一個symbol,而可以得到嘅能量係有分別嘅。
第二,last一堂level 1 practice healing嘅時候,真係多謝各大師兄師姐,比我大開眼界,見到好多唔同嘅healing手法,雖然我未學到,不過都叫做見識過。
第三,一路以來都覺得做頭嘅師兄師姐級數非凡,今次終於都知道自己真係有排學先得。事原今次做healing,終於有機會幫人做頭,Terry師兄叫我做小周天,幫手散嘢。原先都有d信心,因為而家成日都做小周天,一日大大話話都做一千幾百次。點知同人做嘅時候,個周天每行兩圈,一定會行返轉頭一個圈,搞到我好鬼唔舒服,之後我直情要離開一吓,飲返d水,再停多一陣個人先順返。原來會有d人係咁勁,會帶我個周天返轉頭???定係自己仲未行個周天行得順,所以先會咁呢???

最後,我要多謝咁多位大師兄師姐,因為佢地嘅積極參與,幫我做healing,令到我從始可以坐金鋼坐做meditation。事原係,當輪到我上豬肉檯嘅時候,竟然受到各大師兄師姐嘅積極參與,口中當然話好驚啦,目的只係為左增添dd嘅歡樂氣氛啫。實際上嘅心情係超級開心,亦超級感謝,簡直好似有人送左個kinda出奇蛋比我咁。因為各大師兄師姐聯手嘅威力,真係非同小可。首先係elaine師姐講中我夜訓,幫我比energy個肝,勁!Terry師兄又幫我補腎,正!之後佢地不約而同咁話我隻腳有問題????不過我平日又無話覺得隻腳有d咩喎。。。

成個healing都好enjoy,不過我都無偷懶,我亦一路做小周天,幫自己散吓嘢咁。而各位大師兄師姐幫我發左一陣功之後,我就覺得盆骨"咯"左一聲,即刻鬆左。爽啊!無幾耐之後,就輪到腳背又"咯"左一聲,又鬆左。勁正啊!一路做梗嘅時候,兩隻腳背都好似比一舊大石壓住咁,郁都唔郁得咁。做完之後就腳軟軟咁,不過隻眼就有返哂神,sharp返哂,d攰嘅感覺通通都走哂,又要多謝elaine師姐。事關佢知道我地成日睇住個mon,所以就特別關照住我隻眼。

事後,師父就話原來我隻腳好實,要多d坐金鋼坐,先可以令到隻腳鬆返。不過一路以嚟,我都唔係好坐到金鋼坐做meditation,好多時坐唔夠七息就痛到一d都靜唔到。之後師父就比左幾吓大師兄師姐門認為我會痛到叫救命嘅正嘢我歎,雖然真係有d痛,但係又未至於要痛到叫救命,可能我隻腳真係好實。之後Terry師兄又再加幾嘢我歎,感覺都係一樣。其實之前去做massage,個師父係咁用盡力同我做腳,我都無咩反應,但係個師父輕輕力咁同我老婆做,佢就叫到鬼死咁大聲。果時個師父仲話我隻腳好過我老婆隻腳好多添,真係老點。。。

之後返到屋企,竟然可以順利坐到金鋼坐,今朝一早起身亦都順利坐金鋼坐完成成個meditation,真係好勁。而家先真係知道原來自己隻腳係咁實,亦都要再次多謝哂各位大師兄師姐,你地真係好"勁"啊。有機會都要sit多幾次先得,直情正過出去做massage添啊。

星期四, 1月 24, 2008

半年小結

學左靈氣大大話話都有半年嘅時間,真係話短唔短,話長又唔係長,總之就好快趣咁過左呢半年。啱啱sit-in左一堂level 1,alan突然問我上到level 3有咩感覺,真係一時間講唔出,比佢考起左。。。

返到屋企係咁不停回想呢半年裡面自己有咩轉變,諗左好耐,終於都諗到少少嘢,做左一個小小總結如下:-

1。上完level 3之後,d氣集中左。
2。得氣(唔知點形容)快左,即係好快隻手就有感覺。
3。Attunement感覺真係強左少少,我不嬲都無咩感覺,不過今次比Alan做Attunement嘅時候,感覺就強左d,感覺到勁熱,又感覺到隻手勁漲。
4。比人做healing嘅時候嘅感覺都大左,今日比個level 1朋友試,佢都未有feel我就已經覺得好多氣流入嚟我身體。
5。EQ好左dd,以前嘅我比較急,而家就好左dd咁多。
6。自從上完level 3之後,就忙左好多,因為好多嘢practice,又有好多嘢可以做。
7。無啦啦會有大概兩秒鐘嘅時間,個人突然會變得空空蕩蕩,感覺係由上至下,好似比人搶走左個靈魂咁。唔知係唔係後世幫我做past life healing?定係有人send心經比我解karma?定係有師父/兄/姐幫手做左嘢呢。。。咁嘅情形試過兩次,兩次都係日頭,四五點咁上吓。
8。試過有一排個背脊成日涼浸浸,我就估係比同事影響到,因為佢嘅問題解決左之後,我嘅感覺亦咁啱一齊無埋。
9。胃氣多左,呢個問題係自從行左小周天之後先發大左,其實好耐之前都係有好勁嘅胃氣問題,不過都好左幾耐吓。但係近排每日一行小周天N次之後,d胃氣就多到襟都襟唔住,而且不論有無食到嘢,d胃氣都係好勁。唔通我咁多嘢要散?
10。仲有,已經唔記得嘅,就係病。。。以前每一兩個月多數都會感冒一次,而家真係少左好多,亦即係身體好左好多。


其實上完level 3都有唔少感覺,等我做完個百日築基之後,再寫一編同大家分享一吓。

星期三, 1月 23, 2008

遇見未知的自己

呢本"遇見未知的自己"真係叫我大開眼界,佢對我嚟講,簡直係集各家大成。呢本書亦係我最鍾意睇果類,即係用小說形式,帶出靈修嘅方法。

裡面提到好多我好想知嘅資訊,包括:-

點樣同真我溝通?
負面情緒嘅生成?
認識潛意識
認識情緒
認識思想
同埋我最鍾意嘅心想事成的秘訣

呢本簡直係我呢d靈修初哥嘅寶物,有時間我想從頭睇多一次。畢竟呢本書都係比較薄,由頭到尾睇一次一日就可以。

星期日, 1月 20, 2008

郭林氣功全集

啱啱用左九秒九嘅速度,睇完哂本"郭林氣功全集"。睇得咁快嘅原因有二。第一:我對簡體字嘅喜愛程度唔高。第二:我主要係想了解吓郭林氣功嘅皮毛,真係無諗過要學。

感覺係郭林氣功嘅初級動功都幾簡單,仲比太極氣功簡單,不過佢就針對性咁進行左分類,會教埋你如果有咩病就要點練,同練邊套咁,都幾全面。

再者,呢套功法竟然有埋吐音嘅練習,同藏密嘅聲音瑜珈修練不謀而合。

裡面仲有解釋點解呢套功法對癌症咁有效,原來:-

第一,癌細胞係缺氧,如果大量供給氧氣是可以抑制佢嘅生長,甚至可以消滅佢。氣功療法係要大量吸氧,所以就有效咁話。

第二,腫瘤嘅生物電同正常細胞組織係唔同嘅。聽講話腫瘤嘅電位總係比正常嘅低,唔通電療就係要address呢個issue?Anyway,練氣功嘅人係可以放出一種磁或靜電,所以話有效咁話。

先唔好講佢真係work唔work,但係佢講左一句都幾啱聽嘅,就係從經濟嘅角度睇,練氣功都唔駛用錢(除左學費),Why Not Spend少少時間去練啫?咪當做運動囉。

不過對我嚟講最奇嘅,就係竟然中級功法cover八段錦,高級功法仲cover埋五禽戲。可惜呢兩套氣功我都唔識,所以comment唔到佢同坊間嘅八段錦同五禽戲究竟有咩唔同。

不過overall,我都覺得呢套功法幾多,要學識真係唔係咁易。

星期六, 1月 19, 2008

最後十四堂星期二的課

終於都睇完本"最後十四堂星期二的課",回想起啱啱睇完"人生最後一堂課",感覺好唔同。

相比下,本來呢本書更加感慨,因為主角到最後真係活脫脫咁,响眾人面前死左,但係我都好出期地,超冷靜咁睇完左。唔知係唔係已經睇過一公升眼淚嘅關係,因為Morrie亦都係有同一樣,叫肌肉萎縮性脊髓側索硬化症,簡稱ALS嘅病。唔講唔知(起碼我真係唔知),原來Stephen Hawking都係有同一個病。

講返本書,佢大概係想幫Morrie帶佢最後對人生嘅睇法比大家。包括,唔好睇錢睇得太重,要顧慮到家人同朋友,要識得寬恕,生活其實好簡單咁。其實我都好同意,佢話嘅完美一天,其實亦係我夢想嘅完美一日,可惜說易得難,我真係做唔到。。。

佢書裡面用嘅例子都幾到架,例如你點追求錢都係無謂,比你有錢嘅人,點都係會睇你唔起。比你窮嘅人,點都係會眼紅你。佢又講到:"沒有別的經驗比得上生兒育女",呢句我真係萬二分同意,如果比我揀多一次,我都會咁做,仲會早d做添。。。

最後我對佢呢一句:"人只有受到威脅時才會變得醜陋"好認同,真係試過唔少次有咁嘅經驗,亦令到我諗返起"The lord of the fly"果套戲。

星期六, 1月 12, 2008

難解的佛理

終於都睇完本日常的佛心,都幾唔錯,好似之前講過果編蝴蝶咁。入面嘅道理好似人人都識,但係又有幾多人做得到呢?

不過話時話,有一編文章,唔知係唔係我文化水平太低,睇極都睇唔明。果編係咁講:-

馬車越空,噪音越大。本來好普通,點解"每當見到口若懸河,粗暴地打斷別人的談話,自以為是,目空一切,眨低別人的人時",又會一樣呢?真係唔明。。。

星期五, 1月 11, 2008

好多人

今朝一早落樓,入到電梯,見到個小妹妹,電梯入面夾埋我先得果五個人,都幾鬆動吓。但係我一入到去,個小妹妹就同阿媽講話"好多人啊"....

之後佢阿媽叫佢數吓有幾多個人,你地估佢數到幾多個???




。。。





佢諗左一陣,就同佢阿媽講"我唔識啊"。。。可能佢覺得我肥啫。哈哈哈。

星期三, 1月 09, 2008

日常的佛心

今日睇師姐借比我嘅書,書名叫"日常的佛心"。我對裡面其中一編叫"掙扎"嘅文章好有feel。果編大致上係講有一個男人,見到一隻毛蟲,好辛苦咁响個蛹入面掙扎,但係良久都不能破蛹而出。個男人見到隻毛蟲咁辛苦,就諗住幫條毛蟲一把,佢用刀好小心咁開左一道縫,最後隻毛蟲終於都破蛹而出變成蝴蝶。好可惜,隻蝴蝶點都飛唔起。後來佢先發現,原來條毛蟲掙扎嘅目的,本來就係要令到蝴蝶蓄積飛行嘅力量。。。

個男人就咁,就好好心咁做左一件壞事。。。我對呢編文章大感覺嘅原因係,本來呢個咁簡單嘅道理,真係係人都知,以前嘅我亦會做到。試過有一個已經走嘅同事(同事1),叫我幫手睇住另外一個同事(同事2),因為同事2同事3之間,經常發生爭執,往往都要同事1出面做中間人。但係我嘅回應就出奇咁冷靜,我同同事1講,呢個世界無左邊個都係會繼續轉,你嘅走唔一定係壞事,可能加入嘅新同事會為佢地帶來新嘅化學反應,咁可能對同事2同埋同事3都係一件好事。但係唔知點解,近排自己都好似幾迷失咁,好多時都好不自覺咁做左或者想做果個男人做嘅嘢。。。

Anyway,其實本書裡面大陪份都係講一d咁簡單嘅日常事情,當然件件都係好convincing嘅佛理。而我亦都覺得人生根本就離唔開佛理,就好似今晚果套好無厘頭嘅"律政新人王II",我都覺得好似充斥住佛理咁。佢裡面講,阿崔正平為左令到法庭怪客以後都唔好再煩住佢,就求求其其咁叫法庭怪客去同自己鍾意嘅人,用直接嘅手法表白愛意,點知原來法庭怪客係鍾意佢老婆。。。

睇落好似幾搞笑,又幾無厘頭,但係諗真d,有時好多人都會為左一己私慾,或是一時之快,在無諗清楚嘅時候,做出一d令到其他人不安嘅事,但係返個頭,可能只會為自己製造另外嘅問題,個新嘅問題可能仲比之前嘅問題complicate九十幾倍。同時間,亦話比我地聽,叫我地要勇敢面對問題,逃避絕對唔係解決問題嘅辦法,你今日成功避開左個問題,第日可能會有第二個甚至第三四五六七個問題返嚟搵你,原因就係因為你無解決第一個問題咁簡單。。。

星期二, 1月 08, 2008

Usui Level 3 - part 3

終於都上完哂level 3,今次比terry師兄淨雞雞考我不唔知。事原係,師父叫我地玩小周天,仲要試推郁隔離嘅同學,我隔離有mondi師姐同terry師兄,開始就係師兄師姐推我玩先,佢地一齊推就梗係郁啦,不過唔夠自己玩咁大feel。之後就到我試推郁佢地,平時我行小周天係會行得好快,但係好多時都快到無咩feel,又越行又越無feel。今次就好唔同喇,一開始我已經覺得好有feel,個feel係好吃力,好似推極都係行得好慢咁,仲慢到好似想停想停咁添,於是就比好多力,想推返快d,但係無論我點出力,個周天都係行得好慢好慢。後來,唔知行左幾多周之後,無啦啦就行快返,仲行得快過平時添。

等我仲以為功力有限,唔係好推得郁兩個人添。到問返先知原來係terry師兄可能見我無咩信心,比d肯定我,等我知道我嘅小周天真係行到,仲真係可以推郁其他人添,亦都比我知道如果推唔郁係有咩feel。今日我就係咁試喇,當然係試推郁唔同嘅人,睇吓有咩feel囉,而亦無同當事人講。發現原來無學過嘅人,多數都係好難推郁,就算係推一個上完level 1嘅都易過推郁一個完全無學過嘅。我仲試過推一個話以前學過氣功嘅朋友,點知同推一個普通人一樣咁難,畢竟佢都放低左幾十年(真係多過三十年架喇)。呢件事亦都比我明多一個道理,就係:練武不練功,老來一場空。

今日又响公司幫個朋友用紙開左個陣(比人知我响公司做私人嘢添),send左半個鐘energy,send到隻手勁麻痺,希望個陣幫到個朋友啦。我自從開左d陣之後,近排都好似幾順咁,無啦啦個業主又自己主動話幫我換水管,又無啦啦賣左個琴,咁我屋企就多左d位,而BB床再唔需要怕上面跌d灰落嚟,因為有位搬喇。

到左past life都係好失望,因為都仲係睇唔到,不過就睇到少少大師個past life,都算做有返d信心。

而呢一堂之後,又比我學多左好多嘢,不過好難用寫嘅講出嚟,簡單d講就係仲有排學,靈修嘅書唔係癈話,有機會都要睇多d先得。而且仲比我知道原來Terry師兄真係好勁,唔怪得師父都話佢係未來大師級人馬啦。

仲要快d出去買返d公仔,有好多功課等住我做架。。。

星期日, 1月 06, 2008

小周天healing

今晚幫外母做左一個超快嘅healing,當中包括兩分鐘七輪經脈Healing,五分鐘猫爪再加十分鐘一般靈氣healing。一路做靈氣healing一路做小周天call Symbol,每一Part都Call個Symbol出嚟比佢,做到出哂汗。

做完我外母都有少少熱,不過無我咁誇,我個心輪仲好涼添,之後個湧泉就超熱,熱左成十分鐘咁上吓啦。不過做完佢真係好眼訓,希望佢訓得好d啦。其實佢近來因為要幫手照顧BB,成日都訓得唔好,後來我先知原來佢一路都有血壓高添,而家佢咁唔夠訓,真係怕佢頂唔順,不過又無計。

其實尋晚都有少少伯感冒,因為屋企人感冒,仲要切生果比我地食(佢隻手一定有菌),之後仲响d生果面前咳左五分鐘先比我食。返到屋企即刻想咳,亦都有少少暈,總之就作病咁樣啦。

於是係咁做小周天,散吓d嘢,做完過千次,做到有dd頭痛,之後就同自己做healing,當然又係個個位置都做小周天比symbol啦,無咩特別feel。好彩今朝一起身咩事都無,如果唔係都唔知邊個睇BB。

真係無後悔上左level 3,真係好有用。而家開始有d期望上master,不過我而家已經唔急喇,話哂都要做好個百日築基,打好個基礎先。

未Ready

上完level 3我先知原來上天一早已經幫我安排好一切,當我ready嘅時候,阿Sir自然就會出現。

好似我七月嘅時候,係咁問alan幾時有level 2上,但係點安排都安排唔到,好彩安排唔到咋,因為無啦啦BB早左出世,BB出左世果三個月當然係忙到嘔啦。

到左九月至十一月,一路都有d法會,本來我都好想上,亦應該可以上到,因為開始Manage到屋企各方面嘅事情,不過唔知點解同老婆夾來夾去都夾唔到。到而家我終於都知道點解,原來我一路都會有好多事要做。到左十二月終於都可以上level 2,不過上完之後原來會好忙,因為要send好多心經。到左一月上埋level 3,原來仲忙,原來除左healing外,仲有好多practice,例如小周天,仲要幫屋企人開陣,一晚開左成九個陣,仲send energy send到隻手超熱,唔知係唔係已經過左頭,搞到我都要分開幾日send(開哂d陣先,之後補返劃symbol同send energy)。如果我又去埋法會根本就manage唔到咁多嘢。

更唔好講中間仲上埋心經同埋無尚瑜珈,搞到早晚都要practice。唔係上左無尚瑜珈,湧泉都唔會比佢撻著埋。仲要耐唔耐玩返太極氣功呢,可想而知而家嘅生活有幾咁忙呢。不過忙得嚟真係好開心,因為全部都係自己鍾意嘅。

所以有時如果for some reason,你做唔到你好想做嘅嘢。Don't worry,亦唔駛唔開心,因為可能你根本未ready,亦可能你嚟梗係有第二d Assignment,比你做到可能仲死。總之一切隨遇而安吧,上天自有安排。

星期五, 1月 04, 2008

Usui Level 3 - part 2

今晚alan一開始就教吹嘢,第一次只係有少少熱,因為自己偷工減料,原來有d嘢真係唔慳得。第二次就落足十二分心機,果然唔同d。第三次仲勁,因為用左alan教嘅另一個方法,隻手直情重到要放低添。。。之後教點樣唔駛劃symbol都做到healing,當然好好玩啦,感覺好鬼pro,不過我個人覺得都係吹好feel d。

再之後就教左一個好勁嘅心想事成陣,真係勁到無嘢好講啊。我仲隨身帶住佢添,等我set返個alarm,到時到候就refresh吓過個陣先。再之後大師姐話我地玩梗煲仔飯喎,哈哈。因為我地幾個一齊煲師姐個囡囡(佢阿媽都有份煲架),真係煲到我隻手都好鬼熱添,仲有少少痛啊。玩梗嘅時候,alan同大師姐又教我地睇氣,睇到少少咁啦,但係又唔係成日睇到,又好似有,又好似無咁,不過都係一個好開始,好開心。。。

返到屋企之後,忽發奇想,唔知吹個陣出嚟有咩feel嘅呢,於是就梗係即刻試吓啦,感覺係。。。。好勁啊,每一筆都感覺到哂啊,劃到最後又係好勁重,所有手指都漲哂,沖哂血咁,真係好好feel啊。

跟住就係由師姐門幫我地做attunement,感覺係隻手熱熱地咁啦,又見到d光咁囉。而第一次attunement就係由alan幫我地做,覺得隻天眼好鬼熱,做完隻天眼仲熱左好耐添。

And then就係試吓件level 3三文治嘅時候嘞。同level 2果件比,我就覺得勁d,同埋集中d,等我今晚搵個人試吓刀先。哈哈。試三文治嘅時候,發現原來自己處理karma嘅時候又做錯嘢喇,原來唔可以就咁話要處理一年前嘅事架,最好specify清楚個日子嘅date range,即係"我要處理二零零七年一月一日至二零零七年十二月三十一日嘅karma"咁樣做架,响地鐵即刻用哂新學嘅嘢處理d karma,即刻d手感都唔同哂,係非常之咁吉,今朝做嘅時候明明仲係無咩手感嘅。。。由上環玩到返藍田,之後咩手感都無哂,Yeah。不過我遲d都會再做返你,因為今年真係有唔少事情發生左,應該做多d。。。

Break嘅時候又發現原來我玩小周天嘅時候,一路都用錯左方法都唔知。。。好彩都有feel,我諗錯極有限。

最last係past life,我就睇大師姐,不過我唔係好睇到嘢。而佢話我好搞笑喎,因為用錯方法,搞到佢要忍住笑嚟睇我咁話,希望下次我用返啱方法會睇到嘢啦。

大師姐話原來我好多世都係日本人嚟喎(是日本人冒險家?),唔怪得我咁鍾意去日本啦,哈哈。真係好喇,以後又有借口去日本喇。唔得,下次有機會再去旅行要去日本先得。。。

返到藍田地鐵站,咁啱又撞到阿Ray,佢話想Sit多一次level 1同埋2先再上level 3,想打好個底先。真係好有heart。佢就好啦,level 2就玩左past life喇,咁佢上level 3咪可以玩多一次囉,真係正。

Usui Level 3

好開心啊,終於有機會上level 3喇,今日學左小周天之後就係咁玩。開頭就只係天眼同背脊有一dd嘅感覺,完全無周天嘅感覺。。。

但係行到二百周之後就開始覺得,唔係得一點,而係有一股氣,不過都仲係背脊同天眼感覺到有氣經過,其他地方都仲係無feel。而且亦都好唔好彩咁感覺到個周天行行吓真係行到"咩"左?真係好嘅又唔見我咁快學到。。。不過已然好開心。

到行左唔知幾多周之後,就連股氣感都無埋???但係就覺得背脊好涼。。。聽日都要問吓師父點解先得喇,唔知係唔係越行越分心,之後搞到氣越行越少呢。好似而家我都無偷懶架,一路blog一路行架。。。

其實我一返到屋企,就即刻偷偷地keep住行小周天,唔知BB係唔係比我影響到呢?佢媽媽一喑佢就唔駛五分鐘就訓左,仲要無ee吖吖添,真係少有。係咁有用就好喇,咁我晚晚都要keep住行先得喇。

不過我覺得行小周天最大嘅問題反而係。。。。。究竟而家行左幾多周呢???越行就越數唔到。。。真係難搞。