星期六, 5月 31, 2008

人生?目的?

我諗有一個問題大家都一定諗過,亦大部份人同我一樣係搵唔到答案,正確d講係大家都响度搵梗個答案。

尋晚同舊朋友食飯,咁啱有一個朋友剛剛升左職,响大陸半間公司都係佢管,於是我地傾吓傾吓就傾左做嘢嘅事。開頭大家都話內地嘅同事多數好準時收工,但係我嘅兩個朋友都對佢地呢個做法好有意見。其中有一個朋友佢做左老板十幾年,佢就好似好不滿咁。於是我就講。

我:"其實咁又有咩問題呢?你請佢返嚟都係想佢幫你做到你要佢做嘅嘢啫?好似我地以前做細嘅時候都係咁諗架,唔係咩?點解我唔開OT就係錯?"

十幾年老板:"無錯,其實而家香港新一代都有同一個諗法。"好明顯係話梗我。佢又話:"但係你有無諗過你嘅人工係大陸嘅幾多倍?如果你同佢地一樣,駛咩請你?請幾個大陸員工頂唔到你一個?"

無啦啦講到香港?仲要講埋我?都知以前跟佢嘅時候已經想話我架喇,不過無機會。正好,有個機會同佢2口6面講清楚,而家仲唔駛就住就住講添。於是我就話:"如果你咁計,公司最上面果班蛋散,個個都十幾廿萬一個月,唔通請十個我咁嘅人工嘅人又頂唔到佢地?公司會即刻摺埋?"

十幾年老板無言左好一陣,因為我記得佢好耐以前同我講過番說話。。。於是我再講:-

我:"講返轉頭,如果我真係唔駛OT,又做到哂嘢,咁有咩問題先?公司比錢都係請我朝九晚五啫,我做得哂d嘢就OK啦。"

十幾年老板:"你唔駛OT又交到貨?咁咪即係可以做多d囉。"

我:"咁加到幾時先停?要晚晚開OT?幾點收工先叫滿意?我試過晚晚朝九晚十二都做唔哂,結果就搞到星期六同日都要開工,但係都做唔哂d嘢,之後個人就覺得壓力好大,身體越嚟越差。。。係唔係個個員工都要做到咁先合格?為左咩?"

十幾年老板無言左好一陣,因為我講嘅case係佢。。。

新大老板:"咁又唔係話要做到咁,只係想當公司有需要嘅時候,同事可以拍難當幫手開OT啫。"

我:"但係你地頭先講到明話準時放工係有罪喎。"

新大老板:"又唔係話有罪嘅,只係想佢地唔好日日準時收工,一個星期比一兩日開吓OT咁囉。"

我:"又返嚟老問題,如果schedule set得好,點解一定要開OT?"

十幾年老板:"又唔係咁講,你都有讀過Project Management架,好多project failure都係開頭schedule manage得唔好,食哂d slack time,所以why not開頭push得勁d?"

我:"以小第嘅見解,好多project失敗嘅原因,咪就係因為requirement不斷轉,user又無commitment,老舊又唔橕啫。再講,好多時sales接嘅job係好唔reasonable,但係出聲都無人聽,佢地只會話個環境係咁,你唔做就無嘢做。。。但係還記得PM鐵三角,Time-Cost-Quality。如果個project timeline太tight,只會影響到Quality或者Cost。我就試過做過唔少mission impossible,三個月寫個POS連requirement taking加implementation,唔係講笑。同老板講話無可能,佢只會同我講比人我,話我地bare個cost咪得囉。。。最後搞到一team三十幾人,我真係唔識做,每人同我講一句一日都無左,點做嘢。。。雖然係層層疊,我只會同幾個core嘅team leader講,由佢地再dispatch出去,但係始終係用communication嘅問題。萬一幾個sub team都出問題要人決定,我一個人幫得邊個,我可以好以我老板咁,好聽d就叫delegate比個sub team leader自己決定,唔好聽就係叫佢自己死掂佢。但係話得一個project,如果你死左去東,佢又死左去西,咁最後個product咪會甩甩漏漏囉,到最後Quality咪出事囉,點會單單搞到個Cost啊。。。"

我再講:"其實人係要休息,唔可以長期咁做法,而寫program係arts,有時真係要講靈感,唔係話迫就寫得出,你咁迫法,我又無時間慢慢諗慢慢plan,咪即係叫我求求其其交d嘢出嚟比你囉,你地以前唔係未試過架。"

十幾年老板:"而家就係要機械式,唔可以好似以前咁做嘢。。。"

我:"人係有情緒,有高低潮,唔可以話成日都top performance架嗎。係唔係一定要OT到咁先得?先叫做合格先?"

十幾年老板:"我明你講咩,而家嘅後生又話要收工拍拖,又話要睇戲。"

新大老板:"咪就係囉,咩Quality Of Life。"

我:"唔關Quality Of Life事。但係咁,你有無諗過做人係唔係就要做到機械人咁,唔係返工做嘢就係返屋企瞓覺?如果第時你個囡囡出嚟呢個社會,你係唔係expect佢都要用呢個模式做人?"

但係佢地似乎唔係好想放過我:-

十幾年老板:"你咁講,做份幾千蚊嘅工,比你準時放工,你生唔生活到?好似我咁,我唔做點供樓?點養屋企?"

我:"咁你覺得你以前一家人,住响三百幾尺嘅屋開心d?定而家住過千尺嘅屋開心d?"

十幾年老板又再無言左好一陣,因為我知佢有幾唔開心,我亦好好彩認識以前好開心好開朗嘅佢。。。

記得我以前有個客,佢又係大老板,有一次佢同我講:"我覺得好對屋企唔住,因為無時間比到佢地,屋企人感覺好疏離。"。我就咁話:"你都係為左屋企啫。"。估唔到佢竟然話:"生活其實可以好簡單,唔一定要發到好似我咁先生活到。再講,其實好多時我地都係為左自己先會搞到無哂時間陪屋企人,但係有d嘢過左去就無得返轉頭。"。我聽完之後有好深嘅感觸。。。亦因為我啱啱開始想搏命工作(失戀係咁架喇。。。),我亦好好彩,正好有一個比機會我嘅老板,但係聽完佢呢一番說話,搞到我好想轉工,轉返一份無咁忙嘅工。。。

Anyway,我同朋友嘅conversation仲未完:-

我:"好似你咁啊,你咁搏,做到咁高級,幫左公司咁多忙,到後來公司咪又係起你飛腳。。。而你自己就做到隻嘢咁,所以先搞到身體咁差,搞到你屋企人咁擔心你,咁你又對佢地負責任咩?"

十幾年老板今次亦只有再無言,因為我又講中哂佢個case。。。

本來我想講我响書睇到嘅關於靈修啊,開悟嘅嘢,不過最後我都無講到,最後我用一個問題結束呢個topic:-

我:"咁你地有無諗過做人係為左咩?"

坦白講,我仲搵梗答案,有人知就話我聽啦。。。

星期四, 5月 29, 2008

愛子深切

尋晚上爺爺屋企食飯,咁啱比我睇到一幕”師奶愛鬥大”,覺得都好有意思,想同大家分享吓.果一幕戲包括其實係囡囡,仔仔同埋媽媽一齊响度傾偈,事源係呢個媽媽不嬲都好反對囡囡揀呢個未來老公,而啱啱囡囡正在因為揀度蜜月嘅地點而唔開心,囡囡就想出國旅行,但係未來老公就礙於未來老爺(亦即係佢自己爸爸)從未出國,如果佢自己出國爸爸會好唔開心為由,拒絕左未來老婆嘅出國旅行度蜜月大計.佢地嘅對話係咁嘅:-

媽媽:”都話左有三種男仔唔嫁得,第一係...第二係...第三就係考順仔”(唔好問我...等於咩,因為我唔記得所以先用...代表咋,信我...係咩一d都唔重要.)
囡囡:”咁點啊?”
媽媽:”唔好嫁佢囉.”
仔仔:”我明白喇,第時我結婚嘅時候,咩都要就哂老婆,阿爸阿媽講咩都唔好理...”

聽到呢度我即時哈哈大笑左出嚟,爺爺麻麻因為同孫仔玩梗,所以都唔知我笑咩.我笑有三個原因.第一係因為我覺得真係好有意思,有好多時父母因為愛子深切,好多時都未能好客觀咁睇事情.第二其實相似嘅情況,亦發生過响我身上,唔好誤會,我都係做仔仔嘅角色,我亦係講返同一句說話,所以我先笑到咁大聲,當然事情係點我不便透露啦.第三個原因係....我覺得上天好似要再次提醒我自己講過呢句說話咁,因為如果我唔上爺爺屋企食飯,我係唔會開電視,就算開都係三色台,再者,一般情況跑馬日我係唔會上爺爺屋企食飯,費事阻往佢做功課吖嗎,但係今個week end佢好急咁突然話要去旅行,所以先搞到跑馬日都上爺爺屋企咋...

星期三, 5月 28, 2008

練習練習再練習

早前同朋友傾開,佢得知我只係幫老婆同埋自己做healing,就馬上鼓勵可以試吓幫朋友做,不過我都仲係有少少保留,原因係怕自己做得唔好,搞到朋友就唔好,而且上次幫老婆清過頭事件,雖然唔完全關我事,不過都有少少打擊信心。

今日,有朋友話喉嚨唔舒服,叫我send d能量比佢,send energy我不嬲都無所謂,因為應該唔會有咩大問題。我一send能量就發現個心好震,唔係心輪,係真係個心,而且喉嚨完全無feel。無咩信心所以就唔敢send太耐,同朋友傾返佢都無話個心有咩事喎。開頭仲以為自己feel錯,好彩後來佢終於都同我講返,先知雖然佢個心無事,但係佢係有心事,我d信心就即刻返哂嚟。

之後又有另外一個朋友有需要energy,今次一send個feel好match佢個symptom,所以就send耐少少,可惜趕住返屋企,唯有再約今晚同佢用公仔做返個full body啦。

不過今日因為响公司度send,又唔想send得咁陽,唯有用新嘅方法send,本來師父都話會好激,但係我試過好多次,send比自己同以前未做完嘅事做能量轉換,果時咩feel都無,所以不以為然。點不知今日第一次send完已經覺得都幾激,但係又以為係因為有心事所以先會咁,不過到左send完第二次之後,就發現原來真係幾激。事關我send完energy之後,隻腳都仲好似有好多energy响度走嚟走去咁,搞到有少少好似腳軟嘅感覺添。

其實有時真係覺得幾奇怪,我閒時同同學仔玩練習send energy都有少少feel,雖然唔係次次同佢嘅symptom exactly match,但係次次上堂練習都無feeling,所以先搞到我未可以完全肯定自己咁啫。好彩我老婆雖然口口聲聲都話我唔掂,但係次次都肯比我幫佢做healing,有時仲主動叫我幫手添,我d信心先返哂嚟咋。

Anyway,我覺得好似我地呢d未可以完全肯定自己嘅學生,先至要多加練習,因為只有從不斷嘅練習當中,我地先可以更加肯定自己嘅能力。睇書都有講,治療人係要有極端嘅信心,而且師父亦成日叫我定要肯定自己嘅能力。。。

星期二, 5月 27, 2008

與神對話

睇梗未知的實相嘅同時,我亦一齊睇埋呢本與神對話。响呢段期間,我有浮沉於天堂與地獄之間嘅感覺,當然一睇未知的實相就好似比人打左落地獄咁,再睇返呢本與神對話就馬上上返去天堂一樣。。。

相比之下,呢本書無咁震撼,但係如果唔係同時間睇未知的實相,呢本書會好睇好多。

Anyway,佢裡面都有唔少資料,我覺得都幾值得highlight出嚟同大家分享一吓:-

1。所有靈魂都有權選擇佢自己嘅父母,以至未來嘅人生。
2。其實我地呢個世界發展成點係我地一手一腳有份參與創造出嚟,所以唔好怨點解呢個世界會變成而家咁,要做嘅應該係盡返一分力去改變佢。佢有一句說話我覺得好有意思,就係:"宇宙裡無受害者,只有創造者。"。
3。我地嘅人生係基於我地自己嘅選擇,亦即係有唔開心嘅地方唔好只係識得埋怨,要好好咁選擇自己嘅人生路。
4。佢其實都幾有佛家嘅思想,話我地出生嘅目的原來係為左開悟,其他一切都唔係。。。仲要都幾近小成佛學,就係要自我中心,好似先度己,後度人。。。
5。神好多時同我地溝通,係通過我地嘅經驗,而唔係單單用文字,因為文字可以表遠嘅意思真係太有限。。。
6。基本上係無所謂嘅天堂,地獄同karma,全部都係我地自己創造出嚟。
7。神就係一切萬有,神亦會通過我地去經驗一切。
8。我地係通過思言行對世界創造,同佛家嘅意密,口密同身密又幾似喎。不過佢對思言行有好詳細嘅解釋,絕對值得一睇。
9。佢講到,有d人病,活在痛苦,其實係佢地嘅靈魂自己嘅選擇,thats why大師都叫我地唔好亂咁幫人做healing。。。之但係你亦可以好似耶穌咁幫其他人,千奇唔好誤會,耶穌亦唔會亂咁幫人做healing嘅,因為耶穌知道係佢地嘅靈魂請求治療作為佢地生命過程的一部分。
10。我地目前的經驗係建立在先前的思想上,思想導致經驗,經驗又導致思想。當"發起思維"是喜悅的時候,就能產生經常不斷的喜悅。
11。我相信而家好多new ager都知want(想要)=wanting(缺乏)。咁點先可以心想事成?睇吓本書咪知囉。
12。我地嘅身體會將思想轉譯成物質,如果一個人充滿負面及病能思想,你估佢個身體會點?
13。要逆轉負面思想變成嘅物質,要靠極端的信心,它需要對宇宙正面力量之一個很強的信念。
14。治療者正有這樣的信心,佢地知道你在當下這一刻本應是完全,完整和完美的。這個知曉亦係一個思想,並且非常有力,有移山的力量。亦因為咁就算遠距離亦都可以治療人。

當然仲有其他見地啦,不過太多喇,我都只係可以寫到上面少少嘅重點。唔。。。我會推介比任何人睇呢一本與神對話,其實我已經叫左唔少人睇呢本書,希望內容可以幫到佢地啦。

星期一, 5月 26, 2008

未知的實相

花左好大嘅力氣,啱啱叫做睇完呢本靈修必讀書"未知的實相"。坦白講,我明到一半都無,但係已經有個好強烈嘅感覺,呢本書好堅。。。所以一路都懷住一個好矛盾嘅心情睇呢本書,一方面好想睇得明呢本書,覺得d內容睇明左會對自己有好大嘅幫助,但另一方面就好低落,因為真係睇極都唔明。。。


講反本書,基本上呢本書係話比我地聽,實相係點運作,咩叫實相?實不相瞞,我真係未係好明,我靜係知我地呢個世界係其中一個,夢境係另一個。對於仲有d咩係?同點先算係一個實相?我真係唔識答。


本書有幾堅?呢本書係1974-5年出版,但係佢已經可以對呢個世界,用一個好量子物理學嘅角度去解釋,我覺得一d都唔簡單,雖然量子物理學早在191x年已經有,不過呢本書嘅內容真係好唔簡單。再者,佢講到我地呢個世界根本上就係一個能量世界,同師父講嘅百分百一樣。。。


其中我睇得明又覺得可以同大家分享嘅內容包括:-

1。佢對當下有一個非常之咁詳細嘅形容,當中包括好多可能性,不過我都只係明d唔明d咋。
2。我諗唔少人都知意識係由能量組成,不過我就真係唔知人格同能量究竟係點運作。
3。能量係唔會無啦啦多左或者少左,只會由一個實相走到去另一個實相,同師父講嘅又係一樣。
4。人本身由神成分(god-stuff) 所組成就與由地球成分所組成一樣多,在他自己內的神渴望著在神內的人以及地球經驗。亦即係同new age講嘅一樣,神即係所有。


我睇唔明嘅內容真係太多,不過其中我都覺得有d真係同我地幾貼身,可以同大家一齊研究:-

1。佢對時間有一個非常新穎嘅概念,佢話時間除左可以向前,向後,仲可以向內同向外???
2。原子係過程,而非柬西。。。咁咩先係東西?唔通呢個世界真係咩都係假嘅?真係色即是空,空即是色?
3。呢個世界最細嘅唔係原子,係意識單位,而佢天生係包含左擴張,發展同組織等無限特性。。。
4。意識單位移動得快過光???一個原子仲竟然會有幾百萬個意識單位?
5。意識單位有它們的傾向???我地其實係由識識單位組成,唔通就係因為咁我地身體有d地方,就算夾硬醫好佢,遲d都會再病過?
6。佢有解釋生物進化嘅歷程,同達文西講嘅差好遠,不過都唔係太過睇得明。佢特別提到海豚,原來海豚係有高度發展了的個人及團體的彼此認知及交往行為,同人類好似,唔怪得大師都係咁講啦。

除左上面提到嘅,仲有好多好多新資訊(起碼對我嚟講係新),唔睇真係走寶。而且我會覺得,所有想了解我地現今生存响咩世界嘅人,都應該買/借呢本書嚟睇,如果係玩energy嘅就梗應該睇,若果有時間就應該睇多幾次,因為我估好少人可以睇一次就明哂,不過唔好話係我講,睇呢本書等同進行一次大懲罰。。。我本來都想睇多一次,好可惜忘記左續借,已經比人罰左成十蚊喇,再罰就貴過買一本架喇。。。點解會比人罰?因為唔記得續惜,又唔想停,想睇完先還,於是就比人一路罰囉,真係慘。。。


本來我想好快咁睇多呢本書一次,再睇吓有咩可以再寫,因為仲有好多好多資料係值得寫,不過一來我唔明,二來因為我都唔明,所以我就唔係太記得,但係呢本書實在係太可怕,一睇個頭就會痛,唔駛十分鐘就好想放棄。。。好希望可以睇到其他同學仔睇完呢本書之後寫嘅讀後感。。。我會遲少少等自己覺得ready之後就認真咁睇多呢本書一次,到時會再寫一次讀後感,應該都會幾唔同,不過我諗我會睇左其他賽斯嘅書先,特別係入門果幾本。。。

星期六, 5月 24, 2008

生仔樂與怒

其實到左咁上下年紀(十八歲左右啦,哈哈),多數都會反覆諗一個問題:究竟生定係唔生好呢?如果你以前問我,我真係唔識答你。到左而家?其實都一樣無一個好肯定嘅答案。我覺得有d朋友睇得好通,佢同我講:"想生咪生囉,諗咁多無謂嘅嘢做咩。當然生得就要預左要犧牲好多嘢,呢個世界有得必有失,有時無得計得幾多又失幾多。"

其實果時我都未係好明,不過而家睇得new age嘅書多左,越係覺得佢講得好啱。有時真係唔係好明,點解一個睇得咁通嘅人都會病得咁勁。。。唔通佢只係識講未識做?

Anyway,先講生仔有咩好先啦。其實好多人話比我聽,生仔係好開心,無經騇係比得上生仔咁。當時我真係唔明白,只係識得"哦"咁回應左就算。不過到而家我真係有個仔仔,先明白原來說話可以表達嘅事情,有時候真係好有限,有d嘢要真係自己親身經驗過先會明白,亦即係我唔會話你聽,因為講極你都唔會感受得到。。。想體驗就自己試吓啦,哈哈。。。

好喇,有個咁好嘅經騇,當然要付出返d嘢架啦,究竟有咩要犧牲呢?其實個個人都唔同,不過就我個人嚟講,都不外乎係時間啦,精力啦,金錢啦,心機啦,無得上堂啦,無得打羽毛球啦,無得去街啦,無得做咪霸果d啦。。。

不過有人會覺得,呢個世界越來越亂,出嚟社會做事壓力又越來越大,遲d又有可能會打仗,生佢出嚟佢會好辛苦。。。其實呢個都係點解我咁遲先生仔嘅原因,亦係點解我十五十六左咁耐。不過跟左師父咁耐,又睇左咁多書,先明白其實呢個世界發展成點,係我地thought-form出嚟,亦即係我地自己創造出嚟。所以我地要做嘅,就係盡我地嘅能力,做人做事要正氣正念,多d比返energy地球,多謝佢為我地製造左咁多資源,要識得感恩。其實我寫呢個blog本來都無諗d咩,但係越係跟得師父耐,越係知得多new age嘢,就覺得越係要分享多d我自己靈修嘅體驗比大家,亦因為咁,我都盡量唔會响呢度講負面嘅事,因為果d事係要我地放低,寫得落嚟就即係我地未學識放低。

再者,好多書都有講,其實靈魂係有權揀自己投胎嘅肉身,家庭,事業以至佢地未來嘅人生。亦即係我地嘅人生路,其實係我地自己選擇嘅,唔好將所有事情嘅責任都推比你嘅父母,甚至其他人。而且,每個人都有佢出生嘅mission,目的,事情同karma要處理咁,唔好將人地嘅事咩上自己身上。

再講,師父都有教,唔少書亦有講,其實我地今世嘅家人,好多時都會係我地上世,或者係再上世嘅家人朋友咁。如果我地生得越來越少,咁佢地出到嚟同我地相會嘅機會又會越少,可能佢又要再等耐d先可以投胎落嚟。

我如果可以盡我嘅能力,教到另一個會為地球努力嘅人出嚟,就即係可以為地球出多一分力,咁唔係好d咩?咁唔係比較負責任咩?不過有一樣嘢真係好啱,生仔責任真係好大好大。。。

Anyway,唔好咩哂上自己身,只要盡力而為,就無愧於心。乜唔係咁嘅咩?

寫吓寫吓又幾個鐘,點解今日阿仔瞓咁耐都未起身嘅。原來佢醒過好多次架喇,係阿外母大人"暗"返佢瞓咋,真係要好好咁多謝阿外母大人先得,唔係點可以趕工起咁多編blog post啊。。。

領悟。。。

啱啱收到最新投訴,阿舅母(表哥個阿媽)話阿表哥(亦即係我老婆個姪仔,我阿仔個表哥)而家好鬼煩氣,我即刻估到咩事,因為係笑住講。佢話而家表哥成日同佢阿媽講:"你真係愛我喇,又買呢d呢d嘢我食。。。"。唔通佢真係諗通左?真係無白費我上次嘅心血。。。

我老婆就話我教得佢聽係因為我係過來人,好有說服力。但係我就話:"其實係因為我比左個空間佢自己諗,佢大個仔架喇,好多嘢都知道架,不過有時係唔鍾意做,比人煩就梗加因為反叛唔做。但係如果係佢自己諗出嚟嘅嘢,就會好唔同,所以我盡量唔教佢點做,係問佢想點做。其實比左個問題佢已經好夠,就算佢今日諗唔到答案,又或者聽日仲未諗得通,只要佢有真心諗過,總有一日佢會領悟到。。。"。之後佢地都唔太同意,不過唔緊要,慢慢嚟,呢d我覺得都算係佢地自己嘅karma嘢。同朋友傾過,大家都覺得我地學左能量,有時人地嘅karma都係好難幫,都係要當事人自己領悟,我地只係比個指示佢地,佢地收唔到當然可以比多d hints,如果佢地收到唔同意或者唔做就無得幫。。。而事後我亦覺得我仲有改善嘅空間,因為我亦未改到我長氣嘅壞習慣,如果唔係今次佢地問我都應該唔講我個諗法,返而係再比問題佢地自己諗,不過唔緊要啦,慢慢嚟啦。

等於尋晚大師講,好多時我地遇到嘅問題,自己會覺得好難搞,但係其實有時只係我地自己諗唔通啫,到你諗通左嘅時候,可能就會叮一聲咁話:"咦,原來真係咁簡單架"。PS 我唔exactly記得所有wording,不過呢個係我get到嘅意思。。。所以有時面對問題諗唔通,不訪同身邊嘅朋友分享一吓,記住係分享。講得分享亦即係相向,你講比人聽嘅時候當然會希望人地真係有諗過你嘅處境先比意見,到人地講返比你聽嘅時候,唔該你都用心消化下人地個意見嘅用意,唔好太主觀咁唔啱聽就話人地唔明你講咩先得架,講真,如果你真係諗得掂嘅,就唔駛煩住自己咁耐都解決唔到啦。。。我見嘅case多數都係因為自己太投入,先入為主,所以未能客觀咁了解件事,俗語都有話傍觀者清吖嗎。

好似我咁,其實尋晚嘅party我本來就唔敢諗,點不知我一同老婆講,佢就話:"唔。好啦,你去啦。。。"我即刻好驚奇咁問佢:"係咪真啊?"。。。你估唔估到佢講咩啊?佢話:"見你去完之後個人開心左咁多,你去啦,我地搞得掂架喇!"佢仲話:"你知唔知你以前好易就’moun’住塊面架,又容易擔心,郁d就擔心到無水洗面咁。。。"有無咁誇張啊?我真係唔知原來我係咁,需然我都幾易擔心,可能我又鍾意多管閒事,咩到一身都係數。。。本來好似同上高嘅事無關係,不過睇埋下面你先講啦。

而家我跟左師父之後,又真係睇得開左,一來無咁八,因為我開始明左一個道理:"人地嘅事人地做吖嗎"。再睇埋果d靈修書,就梗加覺得做人唔可以咁。。。好似有時如果想同人講一樣嘢,特別係靈修啊,靈氣啊果d,我都唔會再話比人聽點好點好。學師兄講:"咁多網上資料,如果佢係有心想知嘅,一定唔會有問題。"佢有興趣問嘅我當然會答,佢唔問我講比佢聽都無用,重點係點先可以令到佢有興趣。。。但係要做到真係唔係咁易,呢樣亦係我而家努力學習梗嘅事。。。

usui level 3 sit-in part 3

啱啱星期三sit-in完last一堂usui reiki (臼井靈氣)level 3,今次嘅感覺實在係太好喇,因為一上堂就send能量比地球。同响屋企send能量相比,响堂上面大師帶住send係會勁d,感覺send到多d energy去地球,不過同時間,我嘅身體可能負荷唔到咁多energy,個人有少少攰,個心輪仲有少少痛痛地添。

講返我自己,今次比大師再做一次attunement,之後覺得出氣多左,條氣柱粗左,energy熱左。諗諗吓,原來自己一路都唔記得寫果編百日築基嘅後感,不過年紀太大,有少少detail真係唔記得左。。。下次真係要一路練,一路寫低先得。

其實上次做完attunement之後行小周天,真係唔大feel,只係有時覺得個天眼附近,有一股氣行過咁,有時就都覺得股氣幾粗,不過都只係第一堂有咁嘅feel。。。之後再行已經feel唔到呢樣嘢,取而代之嘅係,好多時一行小周天,身體唔同嘅地方都會熱熱地,有時仲超熱添。有時係一個穴位,多數都係湧泉。有時係一條經脈,我就唔係好肯定係胃經定脾經,不過似係胃經多d,因為覺得外面熱過裡面,連肺經/大腸經都試過幾次咁。不過最誇都係有次幫外母做healing,搞到出哂汗。當時嘅天氣雖然唔係太涼,不過亦未至於會出汗。

可能因為我成日話feel唔到個周天行梗,有一次師兄就幫手做左d嘢,嘩。。。勁囉,果日我一行個周天,就覺得有一股好強嘅氣行梗,仲一行個頂輪就開,好精彩。可惜,瞓左一日之後又再次回復平淡。。。不過行得多,發覺真係好可以幫手清到病氣,每一次初起感冒,一行返二五六次,當然係層層氣場都要行二五六次啦,之後就好返哂咁濟。真係好好用,又唔駛太用力,所以而家我都係主力做小周天。不過我唔會成日行咁多,因為次次行完個頂輪都開左,如果要出街就唔係咁好。本來read七輪圖都可以關返個輪位,可能我响呢方面唔太肯定自己,亦响影像化方面比較差,每次西式meditation例跟唔到。。。所以我read七輪圖關輪位多數唔成功,不過有機會係要read好多次先關到,但係我次次都read兩三次就停。Anyway,其實做靈氣五誡都應該得,只不過好多時要用嘅時候都將d嘢比返哂師父咁啫。。。

到左而家,先發現原來一路都feel到個周天行,只係太細感覺自己唔肯定啫,其實上次上到第三堂,師兄已經同我玩左一樣嘢,令到我肯定個周天係行得郁嘅。另外一次call公仔同同學個老公做小周天,仲feel到有兩個小周天行梗添。大師話一個應該係我(我估行得快果個),第二個應該係佢,真係勁。所以有時我呢d初學者,係應該比多d信心自己,相信信心越大,功力都會越勁,效果自己會相對好d啦。

其實身體上都有感覺,就係有少少,不過就一路幫自己做多左healing,痛嘅感覺就慢慢行開左。但係佢未係完全走開哂,耐唔耐我一懶佢都會返嚟搵我。。。 其實真係要多謝佢先得,無佢提醒我,我有時真係會懶左,亦唔知自己身體有咩需要。

大家係唔係覺得好奇呢?點解今次個blog post咁早嘅。我都唔知點解,尋晚去左活出真我分享,同會後狂歡party,返到屋企覺得個人就靜唔到,又好熱。唔通太耐無唱K,都話唔好比個咪我架啦,哈哈。於是就偷懶無練功就瞓。點不知一早就醒左,仲要瞓極都瞓唔返添。。。於是就起身練返尋晚無練嘅功,仲順便練埋今日要練果一part,但係個人已經全醒,於是咪唯有起身寫埋呢編想左幾日又無機會寫嘅blog囉。。。

題外話,每一次朋友問我level 1, 2定3多嘢學,我每次都答佢level 1最多,跟住就level 2,最少都係level 3,但係唔知點解,每一次上完level 3先係最多嘢寫。。。

星期四, 5月 22, 2008

清過頭

尋晚老婆突然叫我幫佢做healing,一掃佢氣場就見佢後天眼好厚,特別係右邊。問佢邊度唔舒服,佢就話個頭有少少聚。其實佢近排因為要照顧阿B,都搞到無覺好瞓,於是我就覺得要幫佢清。一埋身就幫佢清小周天,又用七輪經脈做返個大清洗,之後就貓爪佢後天眼同右腦,其實都未落爪,佢就已經好眼瞓。但係一落爪,佢就話唔舒服,暈暈地咁。見佢咁虛,都唔敢爪得耐,都係求其爪左佢兩分鐘咁啫,之後就幫佢小補左一陣,點知佢都仲係話暈。但係佢又話好眼瞓,想即刻去瞓。本來都仲想補多一陣,不過諗住佢瞓醒一覺,應該會咩事都會無哂,所以就由得佢去瞓。

點不知今晚返到屋企,佢就即刻收到投訴,仲話要同師父講,話我完全唔掂,又話我未滿師唔好幫佢做,因為佢今日暈左一日,仲要無哂胃口添。。。唉。。。我本來尋晚都想繼續架,不過係佢自己太眼瞓唔比我做之嗎。。。今晚我一定要幫佢做返好,還我聲譽。。。同佢講左好耐,佢先肯比我幫佢做。做之前梗係問吓唔同嘅同學仔,我點做好,結論都係我應該主打補。一落手就幫佢落枝針去佢個血海,之後就用七輪經脈補吓先,好彩,補左一陣佢就話好左d。其實尋晚我都有係咁吹符號,諗住係補得最快最勁添。不過今日諗返,可能唔係補得唔夠,而係清得太過急進,所以先至要補鑊金嘅。亦即係話清得太金,唔係補得唔夠。

Anyway,見佢一補就好返好多,於是就信心大增,跟住就補吓佢個後天眼,之後再做埋七輪經脈補。補完之後佢就無哂事,跟住先清返枝針,全程都係三幾分鐘。之後佢又話個膊頭好"moun",想我幫佢鬆返。老婆開到口就梗係無問題啦,膊頭"moun"都係爪吓就應該OK,爪左幾分鐘佢就已經好返好多,之後又話個胃唔妥,但係今次我就比,因為掃佢氣場唔彈手,應該係要比,所以都係比左幾分鐘,之後佢就好開心咁話好返哂。

本來事件已經告一段落,點不知佢差唔多瞓又話好熱,又怪我。。。唉。。。做人真係難,幫老婆做healing仲難。Anyway,唯有用個綠葫蘆幫佢清吓熱氣,不過今次唔敢做咁耐,因為怕佢又話暈。。。做左四十九周,之後佢本來只係話好左少少,但係都唔敢同佢做咁耐,叫佢飲多杯水就算,呢次我估瞓醒真係會無事喇。。。

呢一編咁突如其來嘅blog post,搞到我無時間寫sit-in level 3後感3添。。。

星期三, 5月 21, 2008

說教?感受?領悟...

由細到大,睇左唔少嘅電視電影,裡面嘅大師父教徒弟嘅時候,好多時都會講d唔講d.千奇唔好誤會,咁做其實係出於善意,目的係要徒弟自已去領悟,其實我不嬲都幾buy,但係其實都唔係太明,可能由細到大都未試過有一個咁嘅師父.

自己玩左energy,就覺得好多事真係好難講得明,而自己感受到嘅就會更加深刻.好似我近排發現,原來當我面對一個好好feel嘅人,我嘅天眼原來會好似比人壓實到,真係好古怪...

好多時,如果你想用說話去帶出一件事,你嘅說話唔一定人地會明白.就算人地明白,佢可能都會有佢自己嘅理解.就算理解係一樣,佢未必會信服.好似我老婆個姪仔咁,佢地覺得佢好反叛好曳,(題外話,我個人就覺得一般,比起我以前,佢真係筫係乖.)但係佢地就淨係識得說教,係咁同佢講咩係啱,咩係唔好,但係佢一d都聽唔入耳.我有時同佢個姪仔傾開,佢其實有時佢覺得自己係明,起碼識講返比我聽,但係佢自己都唔知點解唔做,或者點解做唔好.好似佢有一個問題,就係太過唔考順佢阿媽,講兩句就會鬧,但係眾人都無辦法.上兩個星期,啱啱母親節,又啱啱佢鬧完佢阿媽,我就用呢個機會,問左佢一條問題:”究竟爸爸偉大d定媽媽偉大d呢?你唔駛即刻答,可以食完呢餐tea先答我”.眾人見我想幫手教仔都有d想加一把腳,怕我咁open end無咩用,覺得應該直接講比佢聽,不過我就stop哂佢地,叫佢地比d時間佢自己諗吓,因為佢真係大個仔架喇,都六年班喇,有好多嘢應該自己識諗.好彩,佢地都聽我講,停左落嚟,由此至終,外母都無加入意見,我覺得佢明白我嘅用意.到食左一半,我老婆又好心急咁問佢諗成點,我又再次叫我老婆比多d時間佢自己諗.而同時,佢個姪仔就同我講:”咩叫偉大先”.雖然語氣都唔係太好,不過我聽到就有d開心,我並唔係變態,而係因為佢咁問得,亦即係真係有諗.我當然就換一個角度,話”咁啊,不如咁啦,諗吓邊個比較辛苦啦,你出世之前住响邊,食d咩,出世之後食d咩,邊度嚟,再諗返近d,如果叫你放左學幫手做家務,你會有咩感覺.而家又係邊個做哂所有家務呢?”

講完之後我就繼續食自己嘅嘢,到左食完之後先問佢諗到d咩,叫佢講嚟聽吓.好開心聽到佢咁講:”根據你頭先比嘅引導,我知道係阿媽辛苦好多”,不過見佢個樣好似仲有少少唔服氣咁,但係同之前比已經明顯有改善.當然我亦有追問點解啦,想比多d機會佢自己再elaborate.但係似乎佢未真係完全明白哂咁講:”做家務真係好辛苦架...”.本來我都仲想問多佢幾條問題等佢再諗多一陣,因為覺得一口氣個效果會好d,機會唔係成日有,如果成日都捉住佢講呢樣講果樣就無哂效果.可惜因為時間關係,所以我只可以草草咁講多少少嘢比佢聽,話比佢聽:”其實你細個食嘅奶係你阿媽嘅,佢無啖好食都要比奶你食,屋企又唔多錢,無得補身,搞到身體差哂.你細個喊都係你阿媽安撫你架咋.你如果而家唔好好珍惜,第時你想考順返佢,但係好似姑丈咁,好細個阿媽就唔响度,果時你就會覺得好慘架喇.你要好好珍惜啊”.不過講完之後就見到佢個樣有少少變,好似有d想喊咁,估唔到草草講幾句都有出奇咁好嘅效果.我知道佢已經體會到咩係母愛,亦知道佢唔會即刻改到,不過最緊要係佢真係明白幾時改係下一步嘅事,我亦未必幫到手.

從呢件事睇,有時說教都真係要睇時候,如果同一個有經驗過一件事嘅人,或者再三考慮過一件事嘅人,說教效果係會好好多.如果你一埋去就唔理三七二十一,係咁講你嘅諗法,效果就會好我同朋友講靈修嘅嘢一樣,唔會有人so你之餘,佢地仲會當你係傻嘅.

星期一, 5月 19, 2008

迴响

今次四川大地震都真係震得幾勁,一路以嚟我都盡量唔睇相關嘅新聞,目的係唔想唔開心,而每當我睇完相關嘅新聞,唔多唔少都會thought-form左,好可惜無記連日嘅震災節目,搞到我想走都走唔甩,本來都無咩點,今晚再睇埋個有線嘅新聞,就真係好唔開心。不過我都會盡量忘記,原因並唔係我冷血。其實一來我真係唔想thought-form,二來睇左對件事真係唔會有咩用,三來我會keep住send energy迴响比地球,想盡量keep住個人開心d,等我send嘅energy都係比較開心d。

其實今次就連一向不問世事嘅老婆都話要上yahoo,有錢出錢,有貨出貨咁話,真係少有。。。但係反而一路以嚟有捐錢嘅我,今次就出奇地唔想捐。真係莫名其妙,我都唔明點解,我好想send energy,好覺得要keep住日日send,亦淨係想send energy,其他嘅都唔想做。 可能我內裡其實都有少少同意呢個因果論,雖然亦知道個人能力有限,不過覺得都係要做得幾多得幾多。

雖然我都只係一日send兩次,夾夾埋埋都係send果一個鐘,不過有幾多時間就send幾多,盡我自己嘅能力就已經好足夠。由件事開始到而家我都係send左三日,因為開頭唔知有幾咁大鑊,所以都未有keep住send,到早兩日見唔對路先開始keep住send。頭一日send亦即係事發果日,只係覺得好震。到左第二次,亦即係前日send就開始覺得扯扯地,但係尋日直情係好吸energy,好似send落海綿度咁,我send幾多佢吸幾多。。。可以做嘅都只係keep住send,有幾多時間就send幾多energy,只好盡人事聽天命。。。

星期五, 5月 16, 2008

正氣正念

啱啱尋晚sit-in usui reiki (臼井靈氣) level 3嘅時候,有一part又玩返usui reiki (臼井靈氣) level 2時候玩過嘅"仙人指路"。回想level 2嘅時候,要用哂symbol,仲要send哂energy先做到嘅事,level 3竟然可以只係單單用意念,已經可以做到。其實亦間接話比我地聽,我地越係高level,我地嘅念力會越大。大師亦即場解答左我呢個問題,答案亦同我諗嘅相近。

本來簡簡單單嘅一句,我感受都幾深。你諗吓,我地只係用左意念,已經可以達到咁嘅效果。如果我地亂諗嘢,萬一成真,好嘅就當然無問題,萬一係唔好嘅咪大件事。能力越大,責任隨即越大,我地真係要好少心咁諗每一件事,正氣正念過每一日,原來真係好重要。。。

其實感受深嘅另外一個原因,係知道意念嘅power已經咁勁,如果再加埋說話,power會仲大。我諗每一個人都同我差唔多,好嬲嘅時候咩都講得出,萬一氣言全部成真,咁就真係連累左好多人。。。

同道理,當我地心灰意冷嘅時候,亦可能會講出好多古古怪怪嘅晦氣說話。。。話得係晦氣說話,當然亦唔會好得去邊,萬一成真就當然唔會好。所以我會開始警惕自己,真係要慎言,唔好第日先嚟後悔,果陣真係太遲喇。。。

再將呢個概念推遠少少,既然我地嘅說話咁有力,點解响心灰嘅時候。。。唔係,應該係無論任何時候,都應該多講鼓勵同正面嘅說話,用我地嘅念力,去改變我地嘅將來。希望在明天,前路由我創吖嗎。。。

唔知咩事

呢排好多蟲飛入屋,BB又成日喊醒,我今日食lunch又無啦啦好頭暈,暈左成個鐘,仲暈到企都企唔到添。。。差唔多放工個心輪又好壓,壓左成個幾鐘,好似極度傷心果隻。。。真係唔知咩事。。。

星期四, 5月 15, 2008

usui reiki level 3 sit-in part 2

啱啱sit-in完第二堂usui reiki (臼井靈氣) level 3,竟然又有驚喜,原來除左七輪經脈清嘢之外,仲可以幫人清任督二脈,又簡單。無啦啦比大師捉左我出去做demo,好彩都叫做勤做小周天咋,唔係比佢check到任督二脈唔通就死火喇。。。

最開心嘅都係見到past life,雖然唔係睇到好多,不過都係叫做一個好好嘅開始。。。仲要一見就見到個靚女添。。。不過對眼真係好攰。。。

講返自己,我估唔到比佢地睇到咁多past life,包括有日本人,其實上次都已經睇左好多個,唔怪得我咁鍾意去日本旅行啦。。。又有人人見到都想打嘅死靚仔,肥鬼佬,好彩仲有一個靚仔啫。除左地球人之外,原來我都曾經係外星人,個樣仲要成個冼樸咁。而除左人之外,我竟然仲試過做動物,包括熊同浣熊添。。。

星期三, 5月 14, 2008

usui reiki level 3 sit-in又有新嘢

本來諗住sit-in今次usui reiki (臼井靈氣) level 3,都係玩下小周天咁就算架喇,真係估唔到又有新嘢學添。。。今次仲學左樣好啱我呢個懶人用嘅technique,以後真係可以一路坐地鐵,一路send energy都無人知,仲唔駛楂住嚟send。。。不過咁激嘅方法,我都係幫自己send下去以前同做能量account就算喇。。。

而家好想快d到聽晚,再睇一次past life,我想信今次應該睇到喇呱。。。要早少少訓先得,唔係嘅話隻眼太乾,乾到睇唔到就唔好啦。。。

星期二, 5月 13, 2008

心壓

今日一路個心輪都有少少壓,真係唔知因為咩原因。。。會唔會係因為我放左張心經咭响我個mandala上面呢?定係聽到四川個news呢?

Anyway,都想做返少少嘢,師父話過唔好特別send energy去某一事件。所以我今晚就用左healing嘅時間,send左45分鐘energy迴响比地球。。。

星期一, 5月 12, 2008

能量轉移???

呢排見BB有幾聲咳,又知佢唔肯食保嬰丹,於是我前日就膽粗粗,試吓用camp學返嚟嘅technique,再改少少,同BB做左一次能量轉移,主要都係想接收引至BB咳嘅能量。做完本來無咩feel,不過幾個鐘之後,我慢慢就覺得喉嚨有少少唔舒服,仲見鼻樑有少少痛添。不過我開頭都不以為然,諗住鼻樑痛同喉嚨痛應該無關係。點知今日見BB鼻屎有血,唔通佢鼻樑真係痛?唔通我真係成功左?之但係佢仲有幾聲咳喎。唔通以上一切只係一d巧合?定要同BB再做多幾次能量轉移佢先會好返?

話時話,用camp學返嚟嘅technique幫自己喉嚨散病氣,似乎無咩反應,但係幫自己落手落腳做healing(貓爪,七輪經脈healing加小周天),真係會好快有effect,做左一次半個鐘就即刻好返好多,不過我都知時間上用多左好多。。。唔通就係因為咁所以BB仲有幾聲咳?即係我真係做多幾次就得?

之但係一路幫自己d心肝脾肺腎做能量平衡,又幾有feel喎。本來次次都係沖涼嘅時候做,所以都係無咩feel,但係有一次唔覺意,訓嘅時候响床度做,真係又覺得有病氣散出嚟。。。

我諗營後聚會要問下大師究竟幾時做咩好先得。。。

星期日, 5月 11, 2008

似曾相識

今日中午去左觀塘好彩飲茶慶祝母親節,阿伯父抱住仔仔嘅時候,突然同我講:"仔仔流鼻血啊?"。我聽到之後呆左,大家唔好誤會,呆嘅原因並唔係因為擔心,我並唔係咁嘅人。我呆嘅原因係我好肯定我發夢見過一模一樣嘅情景,仲要當我聽到嘅時候,我夢入面同真人都一樣係斟嘅茶,仲要都係一樣幫二姑媽斟梗茶添。。。

星期二, 5月 06, 2008

camp後感

啱啱完成一個三日嘅原生脈絡camp,一返到屋企沖完個涼,咁啱又做香港小姐,即刻就有一種由地獄上返嚟天堂嘅感覺。。。

一眾嘅婆娘門唔好鬧我住。。。其實我係話啱啱完成左個地獄式嘅訓練營,返到屋企,有屋企人(其實得返個仔仔,個個都散開哂。。。)陪住我睇電視,真係有一種好舒適嘅感覺,直情好似上左天堂咁舒服啫。。。

其實呢個camp真係好攰,日日都好攰,攰嘅原因並唔係時間長,亦無咩體力勞動。原因其實我唔係太知,有可能我地個個都太投入,所以先會感覺到果種攰,不過果種攰我又真係唔識點形容。返到屋企未到九點我老婆同外母就已經趕我走。。。唔好誤會,佢地並唔係趕我出門口,只係叫我快d去沖涼,因為佢地見到我個樣,真係攰到好似做左幾日苦力咁。。。攰到今日佢地問返起我尋晚一d事情,我竟然完全無印象,而且仲要沖左兩次涼都唔知。。。作為一個傍觀者已經如此,有份參與其中嘅師兄師姐當然會更攰,更唔好講師父,佢有幾攰就真係無法想像,真係要同師父講多一聲多謝先得。其實第一日,我已經覺得師父個樣好攰,到左最後一日,見佢隻眼直情打唔開咁,真係有幾辛苦無人知。。。

講返個camp,其實真係好多得著,每一樣得著都令我覺得個camp好值得,除左一樣。。。

就係多左嘅兩磅嘅肥豬肉~~~ 有無搞錯。。。

開頭我真係諗極都唔明,明明食少左嘢,又食清左,點解會肥左嘅呢???後來同師兄傾左一陣,佢話其實個camp經常都好多energy,唔通我吸埋吸埋都唔知道???唔通係我太八掛,成日開左個太陽輪嚟收?早知關哂七輪先啦。。。不過真係好值得一再回味,我尋晚九點半就訓,但係一訓著,camp入面嘅事情就再次响我個夢入面replay多一次,啱啱replay完最後一個case,我個人突然覺得好。。。。唔識形容,總知就醒哂,好精神,好有力,好想做d嘢。。。

見訓唔著又無事做,於是就將呢幾日無練到嘅功,加上無唸到嘅經,補做/唸返哂佢,一搞就搞左半個幾鐘,做/唸完哂之後就只係諗起一個字,就係"痛"。。。仲要係好勁痛果隻,覺得隻腳差d比左人添,金鋼坐果然唔簡單。。。但係真係好work,因為唔駛幾耐我又可以再次訓返,仲要一覺訓到大天光添。不過今日一路返工同放工都無睇書,唔睇書嘅原因並唔係因為攰,亦唔係懶,而係好想再次回味camp裡面嘅點點滴滴,需然我未之於好似有師姐咁陰陰笶,不過每一次再回味都有好深刻嘅感受。。。

講講吓又唔知講左去邊添。其實我呢編blog除左想係咁話"正"話"好"咁行嘅嘢之外,我真係想講吓少少個人感受。每一次活動完分享時間,我都唔係講太多,原因有唔少:-

一來其實我係慢熱形,一下子未必有太多分享,可能我要再三回味之後先可以有更深刻嘅感受。
二來係我想留返d時間比咁多位師兄師姐,想多聽其他人嘅感想同意見。
而最重要嘅係,想留返响呢個blog入面詳細分享,因為又唔怕太長或太短,亦可以吸引多d讀者,如果唔係無咩blog post咪無人嚟睇。。。哈哈哈。。。

講真完左今次camp,比我發現好多人,外表好似很平凡,其實內裡很是不平凡,psychic不知幾勁,有一d外表好似好軟弱好需要人幫,其實真人不知幾咁堅強幾掂,有嘅外表好似無咩特別,原來不之幾咁有內涵。亦越來越發覺,心念原來好勁,只係少少一句嘅肯定說話,竟然可以令到我散野散到坐都坐唔定,令到我同部份同學都覺得,第時教小朋友,真係唔好亂咁鬧,如果就咁就比你搞到你個小朋友有個心結嘅話,你點好意思。。。亦發覺自己成日都因為一d好似芝麻嘅小事而睇唔開,不過就真係點都放唔低,但係原來我並唔係畸形"coz I am not alone"。。。其實如果可以退一步嚟睇,感受可能唔同哂,咁就會易好多放低任何事。。。因為好多你覺得好重要嘅事,如果可以抽離,從第三者嘅角度嘅睇,可能只係一件芝麻小事,如果就咁退左一步就可以睇得開又放得低,咁唔係易好多咩?

好多事其實上天一早有安排,好似今次對功課,我因為私人少少嘅芝麻小事,點都抽唔到時間對最後一份功課,但係竟然有意外收穫。而今次入camp分組嘅時候,到我手上嘅時候,只係得返一張藍色,其餘四張都係一樣顏色,本來真係好想同未抽嘅人一組,點不知抽嘅時候唔知因咩原因,竟然抽左一張藍色。講得準確d,係攞左一張藍色,因為所有嘅紙都只係就咁放响我手掌上面。但係咁嘅分組安排,原來造就左兩個有相似經歷嘅同學仔一組,佢地做完左份功課已經解決左部份問題。。。

今次camp嘅最大得著,就係比"遇見未知的自己"更實在,發現平時嘅我原來真係唔係我自己。。。我一路都以為自己其實好開朗,點知check出嚟原來唔係,本來我都唔係信到十足,但係問返十個人,十個人都話我唔係。。。有見過一晚嘅同學仔,一早就話我响度橕梗。。。有同學仔就話從我嘅言行舉止亦同樣睇得出。本來想MSN叫一個同學仔加油,同佢再次講我對佢嘅睇法,竟然一路同佢MSN,佢話一路見到一個小男孩,係一間好黑的房入面,度門從內鎖住。。。???呢件事仲搞到我頭痛左個幾鐘,真係唔明,不過可能我真係再敏感左,今朝一早返到公司,感覺到一股氣,直入我頂輪,搞到我有少少暈暈地添,唔通有人。。。

又橕遠左添。Anyway,師姐出camp嘅時候亦同我講同一樣嘅說話,話我唔好橕到咁行。。。唔通係真嘅???雖然我本人都仲唔係太同意,不過有時真係傍觀者清,聽下人講又真係無壞,如果你自己搞左好耐都解決唔到嘅事,Why not聽吓人地嘅意見呢???不過一路返屋企,一路係咁諗,又發覺我有唔少時間,真係將其他人(包括屋企人同朋友)嘅問題背哂上身,响公司亦係。。。唔通我嘅真我真係一路都呃梗我自己???不過有問題唔緊要,最緊要正字。。。唔係,係最緊要正視先真。。。希望其他同學仔都一齊努力,唔好浪費左師父今次嘅一番苦心同大家嘅努力,要再組返咁多人入多一次camp真係唔係咁易。。。