星期日, 10月 15, 2006

2006年五月北海道遊記

哈哈,

我終於都完成左我今年五月尾六月頭去北海道嘅遊記喇, 其實今次已經係小弟第三次去日本喇. 可恨嘅就係呢份竟然係我弟一份遊記.......

其實我做呢一次遊記係有幾個原因係: - 喺我Plan行程嘅時候真係好辛苦,因為一來北海道其實都好大吓, Plan錯行程就會令到個Trip好唔順,亦都都浪費好多時間. Plan呢個行程嘅時候我都睇左好多好多嘅書, 但係都未可以好好咁掌握到點Plan個行程. 好彩比我睇到好多人地嘅遊記分享, 我喺嗰啲遊記分享上面真係可以話獲益良多. 所以我就想學吓人地嘅分享精神, 睇吓可唔可以幫到其他人咁. 而亦都係咁嘅原因, 我喺寫呢份遊記嘅時間都比較著重細節上面嘅時情, 距離同時間上面嘅陳述都係會比較多. 為左令到份遊記唔好咁悶, 我就: -

第一, 用左比較口記嘅方式,
第二, 加入一啲比較誇張嘅對話.
第三, 盡量加入一啲比較有趣嘅情節, 必要事仲有啲抹黑嘅成份.....(所以Partner睇完都有啲唔係好Like, 但係冇計啦, 冇理由自己寫衰自己架.... 叫佢自己寫佢又話唔得閒)

除左希望幫到其他網友之外, 其實都係想將我同我老婆嘅一啲美麗嘅回憶記錄低, 等第時老左都可以睇返開心一吓, 如果將來有下一代亦可以同佢分享一吓, 等佢更加清楚我地後生嗰陣係一啲點嘅人. 可恨嘅時我地喺之前嘅旅行影得唔夠多相, 所以有好多細節已經係好模糊..... 所以唔能夠補寫返啲遊記.... 真可謂係我一生中一個都唔細嘅遺憾...

其實我本身係一個IT人, 亦都做過好多大大小小漑Project, 之但係從來都冇做過一樣屬於我自己嘅事情係有用到我所識嘅Technique, 所以今次呢份遊記, 小弟就特登搵左一個用左Ajax嘅Library, 希望可以用呢個Library同呢份遊記証實我經常講嘅Flash係太Heavy, 而且只要用HTML加Javascript都用得好嘅話, 亦都可以做到一啲比較Eye Catching嘅網頁咁.

星期一, 10月 02, 2006

女王的教室

終於都睇完喇.個人覺得都幾有新意,比GTO更進一步,而且仲要係用女主角,所以有更多嘅新鮮感. 雖然都仲有少少GTO嘅陰影,不過都睇得出佢地比左好多心機,加入左唔同嘅新元素,令到部戲精彩左好多,真係值得一看再看.

睇完仲要係有少少”梗”動添,點解香港拍唔到呢啲咁好嘅電視呢?

仲記得以前中四,五時代,我咁啱都遇到一個真矢同一個天童老師.而我遇到嗰個真矢就仲勁,佢鬧人嘅能力,無論係用詞嘅激烈情度,或者係保持連續一”輪”嘴係咁鬧嘅持久力,又或者係長氣嘅能力(堂堂都係講啲咁嘅嘢,冇嚟新意),都係比真矢勁上十倍有多.可恨嘅係佢就係咁就將大部份嘅時間都花哂喺呢一方面,兩年嚟都好似冇咩點真真正正咁教過書,差不多堂堂都係咁鬧足大半堂時間.我的而且確喺佢身上面學到啲做人嘅道理,但係我嗰科嘅會考成績都係麻麻地,仲要係比佢教之前唔係咁差,反而比佢教之後仲差左添.不過佢就唔夠真矢咁型,最後比學生讚嗰陣都仲係咁鬧啲學生,可能係因為我地喺最後一堂都冇人讚佢呱.唉!點讚得落吖. 雖然我睇得出佢係有料之人,因為有時我地問佢問題,佢都答得出都不特止,仲講到背後嘅含意添.不過可能佢見到我地呢班生番,冇哂心機教咁姐.

相反,我遇到嗰個天童就比較冇咁Friendly喇,雖然佢大部份時間都好鬼Nice,不過有時都會鬧吓我地咁.但係佢就好比心機咁唸方法幫我地提升我地嘅學習興趣.我地個個比天童老師教嗰科嘅成績,大部份同學都有進步,而且我地畢左業之後,竟然真係同呢個老師Friend左添...

不過我可能都係比較黑仔,之後Repeat嗰陣,比我遇到叧一個老師又係有啲似天童老師,我就叫佢做天童2號.不過佢就似天童老師嘅叧一面,就係百痴!問親佢啲嘢點解,佢就好似人地教中醫咁話”呢啲係咁冇得解嘅..先死後活.背左先遲啲你地就會知道點解架喇..”.吓?唔係吖嗎,而家叫你教英文喎!就係咁,我科英文,亦即係之前比真矢教嗰一科,就冇咩點進步過喇.唉,所以話適當嘅教改係真係有必要...不過都希望佢地真係唸清楚點改先可以真正幫到啲學生,唔好搞到好似而家咁天奴人怨得嚟,都係唔可以點幫到啲學生咁姐...你話係唔係無謂吖.