星期六, 10月 20, 2007

Self Healing - 第二擊 (只係"得得地"咋)

星期一開始大脾生左一粒大毒瘡,開始都唔係點痛,亦都唔係第一次,上一次粒瘡兩日就自己拜拜左,所以都無話特別點做d咩,亦都無諗住睇醫生。到左星期二已經覺得唔多對路,事關粒瘡開始痛,而且腫左,同上一次有d唔同。於是就開始rei吓佢,都唔係rei好長時間,大概一日半個鐘咁上吓。


到左星期三,開始覺得佢無比星期二腫多到,於是都係照rei返半個鐘就算,諗住佢應該差唔多會自己謝。到左星期四,粒瘡都無大到,但係亦都無細到,都仲係咁痛,本來諗住睇醫生,可惜一早約好左同老婆同外母食返餐勁嘅,多謝佢幫手take care阿B咁耐,所以睇唔到醫生。當晚開心囉,仲學人食左四碗蟹粥添,真係無有識死。


到左星期五就知錯喇,粒瘡發到阿媽都唔認得,當然痛嘅程度亦都勁左好多啦,就連企直個人都係一個好大嘅問題。真係知錯喇,於是唯有馬上去睇醫生,可惜睇開果個醫生而家發左,星期日同公共假期都唔開工,唯有去左近求其搵一個睇啦。呢個醫生其實都好似好勁架,事關診所入面有兩張佢同前港督楂手嘅相,所以咪揀佢囉。但係點都估唔到我行住入去診所,竟然差d行唔到出診所。唔好誤會,並唔係有咩咁大件事佢唔比我走,而係佢叫姑娘同我打一枝分幾鐘嘅針,你地無睇錯,我知一般嘅針並唔會用時間去做measurement嘅,但係今次我覺得唔用時間就話唔到比你地聽我受左幾多痛苦,其實姑娘一"吉"我已經知大獲,因為真係好痛,我仲即刻忍唔住"shue"左一聲出嚟添,唔怪得醫生係咁問我怕唔怕打針啦,等我仲好英咁話梗係唔怕啦,最怕你唔幫我打添,而姑娘都有warn我架,佢話"拿,而家幫你打喇,不過枝針比較多",我仲諗多?打完枝針我個人直情坐都坐唔直,唔好講話行添。不過無辦法,點死都要死到返屋企先得,一路行我似一個重病嘅人,一路上個個都仲當我係怪物一樣添,因為行得實到太衰喇。

返到屋企就係咁Rei,仲Rei足一日,就係咁我就知道Reiki嘅energy係兩邊一齊出嘅。意思係當你左手rei梗,右手就算無嘢做梗都有energy出嚟架,咁我就梗係亂rei一通,又rei吓胃,又rei吓肝,又rei吓腎,Rei最多就係膝蓋(因為就手)。Rei嘅時候都好有feel架,手感係"吉",仲要係好"吉",Rei到夜晚問始覺得無咁"吉",以為好返好多,點不知落地行左兩行又痛過。唉!

訓之前突然醒起Quantum-Touch本書入面提過冥想係可以醫病,只要一路冥想,一路諗住個傷口/病,亦都一路諗住點樣好返。我咪一路冥想,一路諗住推粒瘡向下,又諗住粒瘡爆開,等d膿可以自己流出嚟,最後就諗住粒瘡變平。一路冥相到訓左我都唔知,但係隻腳一路都有感覺,當然係痛,我就知道即係有反應,因為粒瘡唔掂佢係唔會痛,無啦啦痛即係有反應。

到左第二朝,一睇粒瘡就成個人都開心哂,因為佢真係細左,亦都爆左。即刻自己拍返粒止痛藥,之後就去按d膿出嚟,好痛,不過按完之後隻腳好似已經賣左比人咁,痛到無哂感覺。。。。之後果晚亦一樣照冥想,不過就無諗過粒瘡會爆(因為都已經爆左囉),只係諗d膿繼續流出嚟同佢繼續平落去。

到左星期日,我差唔多可以企直哂個人添。冥想真係好work,本書仲教過我一定要有信心,你諗住得就會得,如果你唔夠信心個效果就會無咁好添,真係無後悔睇完果本書,亦無後悔跟住嚟試。

0歲潛能開發

呢本係一本翻譯自日文關於ESP嘅書本,我借呢本書嘅原因本來就唔係想點樣訓練阿BB學d咩ESP,主要係因為一次等人嘅時候,響書局見到咁嘅一本書,又覺得嘅得意,所以先去圖書館借返嚟睇吓咁啫,不過真係幾失望。

ESP其實係Extra Sensory Perception,即係中文嘅心電感應。睇左呢本書嘅最大得着就係知道開發右腦係有好多好處,首先,原來右腦係一個好快嘅processor,當然係同左腦比啦,呢樣嘢佢唔講我真係唔知。其次,開發左右腦除左可以幫助創意之外,原來仲可以開發ESP能力。

書入面又有教點樣用催眠嚟開發ESP,不過睇落似用催眠開發氣功多d,因為主要係導引氣嘅流動,將氣導引至全身流動,最後直上到頭,從而令到腦電波達到α嘅狀態。另外亦有教映像訓練法,但係都係從引導氣嘅流動再進入冥想嘅狀態。詳細點做我就唔會響呢度講。

但係簡單d講就係練氣功同冥想係可以幫助右腦開發嘅,我諗我無時間跟住佢嚟練。如果有人試過work嘅話請留個言吧。

失望嘅原因係本書落筆響成功嘅case太多,訓教嘅過程太少。

星期日, 10月 14, 2007

七輪咒音

自從跟Alan上左無尚瑜珈之後,耐唔耐都會練習一吓,坦白講都真係幾"耐"唔"耐"。可能就係因為太過耐唔耐,所以都無話有d咩感覺。終於尋晚因為實到太攰嘅原故,我終於訓到落張床先練七輪咒音,點不知竟然有意想不到嘅效果。

頭四個輪位都好似比我開左咁,直情著哂火咁,好有feel。不特止,仲feel到好似有股熱氣由底輪一路行到上太陽輪咁,感覺前所未有咁正。

呢d唔知係唔係叫懶人有懶福呢?

今晚我都會再用同一方法練一次,因為都仲係好攰,阿仔好煩。。。Anyway,希望今晚都咁有feel就好喇。

Terry師兄果然無介紹錯,Alan真係有好多嘢教,希望快d上完level II之後再跟佢上埋個心經就好喇。起碼有好多嘢可以開始做。

哈,唔知可唔可以send心經比仔仔,叫佢唔好咁煩呢?哈哈。

聖竟香格里拉

終於都睇完詹姆士‧雷德非嘅聖竟香格里拉。應該係終於都比人迫,睇完呢本書,本來仲有成個cheapter都未睇完,但係有人排隊book左呢本書,好慘。

講返本書。嘩,呢本書其實好睇過之前果四本,真係好爽。

講返呢本書,想知多d入面講d咩,去書評 睇睇就知,我亦唔想copy and paste 或者 reinvent the wheel。

只係有一樣嘢想特別提吓嘅,就係本書講到如果你身邊有一d人,你成日都覺得佢好衰,好唔得,好煩,咁你其實你同你嘅「禱告能場」,希望佢會好衰,好唔得,好煩。應該唔好有任何負面嘅想法,咁先係化解嘅辦法。。。

聽落真係幾有道理,但係點先可以做到唔咁諗呢?你覺得一個人係咁衰,係咁唔得,又係咁煩嘅話,你地之間一定發生過好多好多唔愉快嘅事,好似我之前忍佢唔到而鬧左佢一輪果條友仔咁,佢都係不下數十次唔客氣煩左我一輪然後多謝都無一句都不特止,仲周圍話係因為我搞到佢個project delay,我先會咁對佢。老實講,我真係見親佢都諗起佢d衰嘢,所以話有時d嘢知易行難,真係一d都無錯。

星期四, 10月 04, 2007

手印真係有料到

同師姐傾開先發覺原來自己真係咁懶,師姐佢真係幾忙都做meditation又有練習無尚瑜珈,我呢?Meditation勉強都有做到,但係次次都未夠數就已經訓著左。

後來我終於下定決心要練習,亦都唔想比師姐覺得我太過懶散。初初想練樹式,但係我自己都未做到個動作,點練?諗足一日。最後都係決定練開肺,點解?咪因為最快最簡單囉。哈哈,真係好鬼死懶。

到左夜晚,一結完個手印,即刻覺得有d唔對路,點解我呼吸咁大聲嘅?

做完先發覺原來自己用左副氣管,你話係唔係好神奇?我竟然唔記得要用副氣管,但係結完個手印就自自動動咁用啱副氣管,証明個手印真係有料到。