星期一, 6月 30, 2008

雨過天晴

婆婆已經好返好多,龍精虎猛,仲好好胃口添,於是我前晚就用師兄教的方法,send完最後一次心經。


其實本來我不嬲都無插手,今次的介入主要都只是不想婆婆去得太辛苦,所以先會出手。袖手旁觀是有原因的。第一,其實以前試過有相似情形,已經同外母講可以試下幫手,但是她似乎未太相信。第二,我覺得有些事情都是她們的功課,若果她們沒有把自己功課做好,我就茂茂然出手,她們的功課不會完,若然今世都未有把功課做好,只會令到她們下一世也要完成今世未完成的功課。

好似尋日外母同我講,話婆婆隻手都仲有少少痛,於是我就話其實心有事隻手有機會會痛,當然我只係估估下。不過外母就不太相信,當然未必係事實,但係似乎佢都仲對經胳中醫等等未係太過接受,只是對我說醫生有幫佢醫。。。我絕對無估錯,西醫只是開了止痛藥,那算得上是醫呢???可惜我的中醫情度,只是一知半解,未能幫上任何的忙。

只有希望她們及早了解她們的功課,並把它做好。

星期日, 6月 29, 2008

吉人天相

今天中午二時許收到老人院電話通知,說剛剛打電話叫救護車,送了老婆的婆婆入廣華醫院,因為婆婆呼吸困難。其實已經不是第一次收到這樣的電話,但是心裡總是覺得有點奇怪。之後老婆個姪仔仲問我去玩具返斗城的計畫有沒有變,一般的我是會等外母話事,但是今次我就好快咁拒絕左姪仔。因為我總覺得今次應該不太簡單,誰不之半小時後,老人院陪阿婆入院的姑娘,就轉達醫院護士的口信,說婆婆好有機會過不了這一關,叫我們所有屋企人都最好盡快到醫院。

此時心血來潮,記起師父曾經說過心經在這等情形,應該是很管用,於是就藉詞去換衣服,其實馬上send了一編心經給婆婆。send完只覺自己的呼吸急速,個心亦有少少涼冰冰的感覺。其實我都未知婆婆出了什麼事,只知道呼吸困難,所以有少少不明白。一路搭的士個心仍是不太好,可能之前send完心經的反應不太好,所以心裡不好受,此時老婆問我是否很累,為什麼平合起雙眼。因為老婆未知我做了什麼,亦不想她們胡思亂想,所以我唯有隨便說了個藉口了事。

去到醫院,因為不是探病時間,所以只有外母進去病房了解情形,我見外母都只是企在病房外同姑娘打探,似乎情形未許樂觀。而且她們是在心臟加護病房門外。於是我又藉詞去買點小食,實質馬上又左send一次心經。到我回來,知道婆婆危險期未過,醫護人員剛剛說搶救無效,現在等驗血結果,若果情形不變,不排除會幫婆婆插喉幫助呼吸,而且醫生仲話,婆婆情形不太樂觀,因為婆婆原來是心臟病,同時間肝同腎功能衰竭,婆婆年齡亦不少。。。眼見他們個個面無人色,可能因為插喉差不多等於等死,我正在心裡盤算,是否應再send一次心經,等婆婆去得安落好?

正在此時輪到我去探婆婆,一去到婆婆床前,馬上向外母打探,因為她和醫護人員談了很久,亦有機會同老人院來的姑姑見面,先知道之前婆婆呼吸真的十分困難,個頭仲要兩邊轉,直情好似食了軟性毒品一樣,但是她就說婆婆情形無變過,似乎仍是不太樂觀,可能醫護人員未有update,所以她未知婆婆真正情形。不過我一望之下,就發覺婆婆呼吸雖然有點吃力,但是已比外母形容的情形好了一點,於是我又打八卦,望望婆婆床邊儀器,發覺婆婆血壓原來一直在下降,已由剛剛入院的177下降到155,於是我馬上暗暗比energy婆婆,再心唸心經一編,之後就馬上走,因為怕energy太多。臨走前仲同外母大派定心丸,說婆婆情形一路轉好,一定吉人天相,不用擔心。

去到大堂我亦同大家派定心丸,此時他們仍不太相信,因為血壓仍不低,而且醫生剛剛一句話,實在等於判了婆婆死刑。之後我仲帶了老婆個姪仔去行街,一個小時後回到醫院,見他們個個臉帶笑容,亦知道我的估計無誤。於我們臨離開醫院前,我亦再次去到婆婆床邊,一心看看床邊儀器,因為他們似乎不太知道,看看這個儀器比起問醫護人們更有用。看完後個人就更加肯定,知道婆婆今次一定吉人天相,因為血壓已經降到108/65,而且見到婆婆睡得很甜。

今次的經驗,又再驗証,中國醫學真的博大精深,因為老人院知道婆婆出事的時間,是大概下午二時左右,所以我估計婆婆有事的時候,實際上應該係一點或之前已經開始,因為婆婆是痛苦了一段時間才叫姑姑的。而根據子午流註裡面講,十一點到一點應該是心經的時間。在此亦要再次多謝師父,若果不是師父教我心經及其用法,我亦不知道此時應如何是好。

星期五, 6月 27, 2008

人體復原工程

剛剛問朋友借左本人體復原工程睇,裡面基本上同上一本講的都相差不遠,比起上一本,我覺得這一本更適合作為系列的第一本書。原因乃是這一本反而比上一本有更多的中醫基本概念,例如五臟六腑,子午流註,養生之道等等。

我都幾同意作者所講的中西醫分別,其中有一句講到:"中醫是研究活人的科學,西醫則是以死人為基礎的科學。"。

我更同意作者所講的病由心生,作者仲借佛經裡的一句話:"這個世界由心所造,這句話用在慢性病上確實如此,大多數的慢性病都和情緒有密切的關係,都是自己的心創造出來的。"。而其中一章講到生氣的機制,裡面提到生氣的時候人體的變化,而不同的處理方法亦會帶來不同的效果。而作者亦提到避免的方法,就是每有小不滿,只要適當的溝通,最多小吵兩句,就能化解。但若是把小不滿積壓,到不發作出來不可的時候,就會一股腦地全倒了出來,那便會對身體造成大傷害,所以應該避免。

另外,作者仲提到一種叫便秘的性格,就是不滿的意見不會輕易說出來,情緒上的垃圾就會開始在心裡累積,這樣的性格多由少就已經形成,所以當一些聰明的孩子,很懂察色,父母就要小心。。。

作者仲講到其他情緒生成的病,例如十二指腸及脫髮多由生悶氣生成,而生性伴侣悶氣多會生成乳癌。

除了情緒之外,作者竟然仲教我地相人,佢講到男生左邊臉和女生右邊臉,都是比較不開心的。而且左右臉可以說會顯現一個人的顯性和隱性,亦即係意識臉和潛意識臉。而左右臉相差越大,性格愈不穩定,整體而言生活得並不開心,人就愈難相處。千萬不要覺得這是扯遠了,其實正如書裡面較前章節所講,情緒係會影響到健康,所以教人觀形察色絕對有幫助,起碼我地知道睇人開心的笑容要睇左右兩邊臉,若然一邊笑一邊有另一個表情,就代表那人真正的情緒不是開心,亦對於了解及開解別人有莫大的幫助。

除了以上精彩的內容以外,我最欣想都係作者終於都有講到幾時一式三招不適用,我覺得這樣才比較全面,不會老是給人硬銷的感覺。

總括來說,這一本人體復原工程真的比上一本更出色,絕對值得一看。

星期四, 6月 26, 2008

不斷幸福論

睇完這本不斷幸福論已經有大概一個星期的時間,一路都提不起興趣寫讀後感,原因是我並不是太認同這本書的方向,不過圖書己過期,所以最後只好在還書前草草寫下這一編讀後感。

作者其實節錄了很多不同的科學家對如何達至幸福做了的實驗結果。眾所周知,西方不少的科學家對身心的實驗,多數都會選用西方醫學角度作為主要思想,而西方醫學多以單一物質作為研究對象,這一點就是我不太認同的地方。除此之外,其他章節亦不見得對"如何達至幸福"有很大的幫助。

不過得著總會有,例如:-
1。原來德國係一個不少人會自殺的國家,亦即係國民對生活的滿意情度未如理想。難怪他們生小朋友的時候,夫婦二人都會享有一年有薪大假,而且政府亦會派錢,果然事出必有因。
2。好多發展中國家的國民滿意情度竟然比起不少富裕國家更為好,亦即係金錢同幸福係沒有成正比。
3。原來一個人真正開心的時候,是會郁動到面部所有肌肉,其中有一些是不隨意肌,所以真正開心的笑容,跟不是發自內心的笑容是有分別的。但是如果訓練到可以自由控制到那些肌肉,人亦可以因為肌肉傳送到腦部的信號而感到開心。
4。科學家門對腦部做左一次詳細的研究,發現人其實可以同時接收到開心與痛苦的信號,但是最後是開心或者痛苦就是取決於他自己的選擇,不過多數人都會偏向選擇痛苦,原因乃是苦痛的信號是會比開心的信號來得強烈。科學家門亦有大膽作出估計,就是痛苦的感覺係叫生物要馬上作出反應,從而作出作戰或逃跑的決定。亦即是痛苦的信號比起其他信號都大的原因是求生的基本意識。
5。科學家做過一個實驗,就係每當餵狗狗的同時,先讓節拍器發出滴答聲,過了一陣子,狗兒一聽到滴答聲就會流口水。。。亦即係就算係本能,亦可以經由被訓而改變。
6。有一個好爆笑的實驗,用左前美國總統柯立芝做名稱。故事是這樣的:柯立芝夫人走進一座雞舍,看見一隻公雞生龍活虎地與母雞開心快活。夫人印象深刻,並詢問這公雞多久交配一次。得到的回答是一天十二次。於是她就說:"請把這件事告訴總統先生"。稍後柯立芝也來到雞舍。聽完這隻公雞的英雄事積後,他問:"牠每次都跟同一隻母雞嗎?"。得到的回答是:"噢,不,每一次都跟另一隻母雞。"。總統先生當然要求傳話給夫人。於是科學家就把對於同一個伴侣興趣逐漸減弱的現象稱為:"柯立芝效應"。雖然實驗是針對雄性生物,不過作者就推想女性的慾望不比男性低。原來人類足足有十五個巴仙的爸爸會用基因檢測來證明他們的孩子不是自己的。這數宇的確是驚人。。。

本書另一個我不太認同的地方,就是很多實驗對象不是老鼠,就是狗,或是猴子。但是每當用在人身上,往往會有不良的效果。

星期三, 6月 25, 2008

啟動神秘療癒能量:古代神秘學院進階療癒技巧

同朋友講開先知呢本啟動神秘療癒能量:古代神秘學院進階療癒技巧 原來已經出左,於是就叫朋友幫手買左返嚟睇。買到返屋企日煲夜煲,終於都睇完,感覺無第一本咁好睇。

Anyway,呢本書主要都係教我地點樣開啟我地嘅七輪,而佢教左我地一個好簡單嘅冥想方法去開啟我地嘅七輪,呢個方法仲可以由我地帶patient做,等療愈能量自己幫patient解決佢嘅問題,真係幾方便。

除此之外,佢仲有教我地一d咒音,去加強我地嘅療愈能力,亦有教我地點樣開敫第三眼。

另外佢都有講到點樣訓練我地嘅潛意識,同師父教嘅有d似。佢就教用一句好簡單嘅句子,去令到我地平靜,健康同快樂。

不過我最有興趣都係佢提到有一本書,書名叫"The Secret Doctrines of Jesus",內容講咩我就唔太知,不過睇到個名已經好想睇,可惜仲未有中文版。。。本書都已經出左十幾年,點解仲未有中文版嘅呢?

雖然無第一本咁好睇,不過我覺得都值得一睇,單單睇個冥想果一part已經值回票價啦。

星期一, 6月 23, 2008

MBS後感

剛剛上完MBS一個星期左右,之前channel太多energy搞到自己周身好攰嘅問題好似無左,可能自己開始適應左?而家我多數healing都係用MBS幫人做頭,因為一來人地多數都有feel,二來連我自己塊面都覺得郁郁地,亦即係幫人sure亦幫到自己,最緊要係好多人個頭都需要MBS多過個身,仲要做頭只係做身嘅一半時間。。。呢樣我知其實係我偷懶啫,但係用一半時間做頭就已經有feel過用兩倍時間做身,而我而家真係好需要攞返多d信心,多d人嘅feedback絕對有幫助,如果幫人做完佢無feel,佢又點比feedback我呢???講真,如果佢個身體有事,我用reiki都幫到佢,只不過耐d又慢d仲要攰d咁啫,而個effect亦當然無用MBS咁好。但係幫人做頭我就真係覺得,就算點用reiki做healing,都真係好難做到MBS一半嘅效果,當然係話以我而家所知嘅方法同功力咁計啦。


自從用MBS做頭之後,個人真係好似好feel左少少,有時搭地鐵都feel到d經胳好似收到人地個問題咁,有少少比人壓住嘅感覺,不過真係唔太sure,因為多數人唔係脾就係胃經,真係?又可能其他經胳我自己都未太sure位置响邊?定係我嘅其他經都唔太通?定係我只係feel到人地嘅體溫,所以一定唔係脾就係胃,因為係我最前面嘅經胳?


最奇怪嘅都係早幾晚,阿仔係咁揰自己個頭仔玩,我竟然覺得自己個痛都無啦啦痛起嚟。。。我都唔太肯定係feel到?定比佢影響到?定係我自己channel太多energy block死响個頭度?但係又咁啱佢揰完一輪我先痛喎。


怪事仲接二連三嚟添,之後我無啦啦個後腦又痛,問我老婆,佢就話佢都有少少頭重重咁,不過就唔太覺得頭痛。問佢嘅原因,其實係我同佢响房用電腦用左一陣,所以我先估會唔會係比佢影響到。於是我就馬上行動,幫佢用reiki做healing,起初佢都有少少抗拒,但係佢點都估唔到,我竟然會發佢老皮,馬上收工。。。哈哈,竟然又work喎。。。點解發佢老皮?咪就係一幫佢做,佢就話唔舒服。吓?我只係比energy又無幫佢清喎,咁即係佢要散嘢啦,講比佢聽佢又話唔鍾意,又話係唔係架,又話我好唔同佢講有咩反應先幫佢落手。。。我如果一早就知我就實同佢講啦,當然亦有同佢講,但係佢似乎都仲係唔太like。Anyway,我其實都唔係話點發老皮,只係好輕描淡寫咁同佢講:"既然你都唔信我,你自己出去比錢人地幫你做啦,我以後唔搞你喇,你都係要比錢人地駛先安落架喇。。。"。我語氣仲好好架,人面帶笑容添架。


Anyway,幫佢做healing嘅時候,我發現自己右邊淋巴有少少痛,但係問佢佢就話自己左邊淋巴痛,真係考起我。。。點解會咁嘅呢???


就係咁,三次我好似feel到人地嘅嘢之後,個feel都無走到,亦即係無啦啦痛左我成晚,所以我先好唔肯定究竟係feel到?定係咁啱自己都有d咁嘅問題?定係我唔係feel到,只係比佢地影響到呢?似乎最後個原因又真係機會大少少喎。。。


講返同佢用MBS做頭,佢好搞笑咁話:"嘩!咩咁似做梗機嘅?又係好似有少少電流,流過塊面咁。早知就搽定d精華先啦。"。哈哈,我聽到之後好有衝動想同佢講:"五百蚊吖唔該。。。"!哈哈。。。

集體意識

响1998年,國際成立左一個叫做"The Global Consciousness Project (GCP) "嘅項目,中文譯名應該係叫”集體意識項目”。佢地响五十個唔同地方,放左一個同樣嘅隨機數生成器,每一秒鐘,每一部生成器就會從電子噪音嘅量子層面,取得隨機數嘅種子,從而投擲兩百次銀仔(coin flipping),之後就每五分鐘會將結果發送到位於普林斯頓大學嘅伺服器進行數據分析。

無讀過電腦嘅你地可能唔太明白,其實電腦根本就無辦法可以生成隨機數,因為電腦根本就係一舊木一樣,你比咩佢,佢就會好有規律咁做到次次一樣嘅結果。所以好多嘅隨機數其實都係基於一個種子,用一d公式倍到個數超勁大,之後就响呢個數入面比出一個所謂嘅隨機數結果出嚟。以前(甘年前左右)睇過一本教寫遊戲嘅書,佢講到我地打機,呢個就係點解成日d怪獸,都會响相近嘅時間同地點出現嘅原因。似乎越講會越唔明,不過簡單d講,其實所謂嘅隨機數,係會因為種子而改變,所以隨機數其實係同種子有直接關係。點解我講得咁詳細,其實係想話比大家聽,如果種子係唔同,隨機數嘅結果應該會好唔同,而電子噪音嘅量子層面個範圍/空間,應該係好唔同吓。

其實個d圖我都唔係太睇得明,因為佢都無幫每一行做一個解釋。而且我讀書嘅時候,又唔太努力,特別係pattern classification呢一科,仲差d唔合格添。。。不過根據佢嘅文字記載,個實驗原來發現,每當呢個世界有大事發生嘅時候,果d隨機數係會好近似。亦即係話,有証據顯示,現實世界同人嘅思想係有關係。

PS. 如果發現我理解有錯就留comment話比大家聽啦

星期六, 6月 21, 2008

大戰阿哥阿嫂

今晚返屋企食飯,阿嫂比飯煲嘅蒸氣steam到,好彩無傷到,又無紅到,只係好輕微啫。為左搵多d實習嘅機會,於是我就叫佢比隻手我,開頭佢好hesitate咁話:"氣功???",因為之前都同阿哥試過,可能佢都唔太信啦。不過後來都肯伸隻手出嚟比我,於是我就一邊繼續食魚皮花生,一邊幫佢做healing。我知咁樣唔啱規矩,不過諗住只係比少少氣佢,等佢隻手無咁痛啫,所以就咩都無做。不過佢見我咁求其,於是就係咁問:"得唔得架?會點架?應該有咩感覺架?熱地凍架?你一路食嘢都得架?你咁求其嘅?????"。。。。下刪一千條問題。。。

而家我終於明點解阿師姐話:"如果你就咁幫人做,人地唔會信架。佢實問你係唔係得架???一定要整古造怪,又喊驚又呢又lu先會有人信。。。"。不過比左唔夠兩分鐘energy佢,佢就叫我幫阿哥做,原因我估佢都仲係唔太信,當然佢就話阿哥需要多d。不過佢一行開就話:"又真係唔痛喎。咦?但係會唔會係因為隔左咁耐,點都會好返啦???"。我而家又明白點解師父成日話:"有d人明明知道係得,但係佢自己都仲會比九萬幾個藉口,又話可能咁,又話可能咁,點都否認呢樣嘢,原因其實係佢地未ready。"。所以我都好化咁答佢:"唔知呢,可能啦。"。費事講咁多啦,還掂佢都仲未信哂,好似好hard sell咁。我總覺得,等佢ready自然會明白架啦。

到左阿哥,佢話成日膊頭痛,於是我就叫佢等一陣,因為我今次想用MBS幫佢舒緩一吓,所以我要Prepare吓Connect上面,調高返自己個頻率先。跟住幫佢做左半分鐘,佢就同阿嫂講話:"好熱喎,你無理由feel唔到架。"。我心諗:"梗係熱啦,你無見我成頭汗咩?",但係唔知點解我無咁講到,我諗左一陣就話:"梗係啦,開哂turbo幫你做吖嗎。",可能我都仲係有少少想說服佢地。做左三分鐘左右佢就話:"得喇,你都攰喇。"。吓?咁快?不過我見我都差唔多夠鐘走,於是就放佢走。阿嫂梗係問佢點啦,我見佢得個諗字,又無試吓郁吓個膊頭feel吓咁,即係都有少少唔信啦。。。無所謂啦,我都好Causal咁答佢:"你估食仙丹咩,係嘅就多d上嚟我幫你做吓啦,正常要做成個鐘一次架。"。心底裡都係想佢比個機會我幫佢,一來真係好想幫佢,二來都真係想有多d埋身實戰嘅機會。

之後,隔左一陣就發現自己又再大頭蝦左,一來又唔記得幫阿哥掃返個氣場,二來又唔記得幫佢read返七輪,三來仲唔記得幫自己掃氣場添。。。其實唔係記得,真正嘅原因係我又中左阿哥嘅病氣,今次除左感染到佢嘅勁攰之外,仲搞到自己舊疾復發添。唉。。。所以都話,真係要多d實戰經驗,先至會有進步。。。但係諗諗吓,一般嚟講,做果一陣仔,無理由搞到咁大件事架喎。。。唔通我嘅潛意識都真係幾咁想幫佢?直情想接收佢嘅病氣添?如果係咁嘅話,又比我明白多一個道理,就係血濃於水,唔怪得大師成日話,親人有事真係會幾影響到自己,我初頭都以為自己一早化左,已經唔會比呢d嘢影響到添。。。

諗返轉頭,唔怪得有次同朋友傾開,佢話幫我做healing嘅時候,見到有個小朋友喊住咁係咁搵書睇,好似好無助咁,仲問我有無咩事添。我好明顯自己唔知自己發生咩事啦。。。亦唔怪得玩send energy嘅時候,好多人都話send比我嘅時候,感覺好似send比黑洞咁,send幾多我吸幾多啦。。。定係只係咁啱得咁Q呢。。。

星期四, 6月 19, 2008

人體使用手册

呢本人體使用手册,主要係教我地一套好簡單嘅保健養生方法,佢裡面提到,原來好多病嘅主因,都係血氣問題引起,當然一定係有例外,如果唔係中醫古藉經典,都唔會咁嘅編排啦.所以我覺如果佢可以再客觀少少,提多少少唔同嘅病因,呢本書會好睇好多.佢仲提醒我地,原來有唔少嘅病因,都係因為我地經胳阻塞而引起,亦即係黃帝內經講嘅”經脈者,所以能決死生、處百病、調虛實,不可不通.”嘅道理相近.佢亦從新教導我地中醫基本四種治療方針係砭,針,炙,藥.亦即係先以砭法治病,之後先以針,然後先用炙,而藥返而係四種方法之未.無記錯我上中醫班個阿sir都好似咁講過,不過阿sir都話講真,如果真係用砭法嘅話,就算中醫師肯花時間同心力去幫病人做,好多病人都唔會接受到.因為砭法其中之一種刮痧,做完係會紅哂,有可能會有傷口...

本書講到嘅養生方法,我就唔會响呢度講架喇,不過真係好簡單,雖然我唔會跟嚟做.因為我覺得學氣功,或者練大周天都會有相同或者更好嘅效果.當然佢教嘅方法係比氣功同大周天更簡單啦.

另外,佢教左我一個好重要嘅概念,就係幫人做完healing,如果人地個病仲重過之前,有可能係同經過調理之後,身體有力排毒嘅道理相似都唔定.因為身體如果太差,就可能連正常嘅排毒工作都無力做,到你比夠能量佢,佢個身體就有力做返之前無做到嘅工作,咁你血液或者係身體入面嘅毒素可能會升高.而最開心嘅就係,原來我自己嘅身體狀況非常咁好,因為我試過幾次有作病嘅情況,到最後咩都無做(無做healing,無行小周天,真係咩都無做),之後去左一次toilet,就咩事都無哂,佢就話我呢d情況,係因為身體有力排出病毒,亦即係話我身體同腸胃都好好condition,Yeah!

除此之外,佢仲講到就算我地用左好多年時間攪壞自己身體,我地個身體原來可以用好短嘅時間就可以修復,我唔係叫大家放心攪壞自己身體,只係想話比有慢性病嘅大家聽,唔駛灰心,就算係有好難攪嘅慢性病,只要有恆心同決心去醫同調理,身體都可以有能量去修復.

呢本書另一個我覺得好勁嘅地方,就係佢用左好現代嘅觀點,去介紹中醫嘅概念我地聽,好似咩叫陰,咩叫陽,我未睇之前真係唔明架...

最後,我個人就唔太同意佢講糖尿病嘅果編,雖然可能真係會有佢講嘅情形引至糖尿.但係因為食得太多嘅情形絕對存在,中醫都一早有講到消渴病嘅起因同飲食係有關,亦即係連同佢講嘅原因在內,其實係會有唔同嘅起因引至糖尿病嘅,不能太過一概而論.不過用多d唔同嘅角度睇一件事幾時都係好嘅解決問題方向.

睇佢嘅後記,竟然比我搵到一本,專講西方醫學界黑暗一面嘅書,書名叫:”還我健康”,一本接一本咁搞法,真係有排忙睇書.不過見佢個介紹又好似講到唔係太正氣正念咁,我而家都比較少睇呢d書,因為怕比佢搞到我有投射,或是比佢影響左就唔好啦...

芒果味???

好勁啊,今日終於都上完哂個MBS,而家我周圍搵人比我試,因為覺得真係要好好practice先得,唔好浪費左呢一套咁好嘅healing方法。

今晚教左我地點幫人做頭,我比同學仔做嘅時候都有少少感覺,不過唔夠我幫佢做咁強勁,我直情感覺到我好似重新幫同學仔個頭組合一次咁,感覺都幾誇架。最可惜唔夠時間,因為我覺得佢個頭好似六神合體中,都仲未合好哂,再多d時間會合得再好d。。。返到屋企又搵師姐試刀,佢個feedback都幾positive,佢話:" 你幫我做時. 我肩頭會幾重. 有暈一暈."。佢仲話:"我覺得你每次幫我做時. 我全身會軟.之後洗完澡時.會坐在沙發上睡覺."。所以我每次都confirm佢响屋企得閒我先會開始幫佢做,以免有咩危險發生。而我搵佢而唔搵師兄做係有原因,其實師兄有上過MBS,佢又知道有幾勁,我唔想佢先入為主,影響到個結果。再者,師姐佢都好勁,我估如果我重手左佢應該都頂得住,而且我真係想得到真正嘅feedback,所以我就搵左師姐幫手比我練習喇。

其實學完MBS之後,除左搵人練習,都有幫自己做下咁,事原係我經常要抱一個極度活躍嘅BB,搞到隻手經常有少少痛。不過唔係次次做完都好得返,可能無打通返d經胳就開始,而且又唔係次次都咁專心咁做啦,又可能自己未學滿師,要多d練習先得。但係三幾分鐘就可以搞到隻手唔痛,最差果次都可以減輕少少痛楚嘅程度,都真係幾勁,可惜一抱返BB無耐又痛過。阿仔,你快d識行啦。。。話時話,都要幫老婆同外母做吓先得,睇吓對佢地有無效都好,因為佢地仲抱得BB多過我N倍,所以佢地對手一定有返咁上吓痛。。。

另外今晚比我發現,原來師姐真係好勁,佢今晚幫我開完竅問左我一個問題,佢問:"你今晚係唔係食過芒果啊?"。唔係啊吓?我今晚的的確確食左一件芒果芝士蛋糕喎。咁佢都知道?真係勁。都係唔好比老婆學喇,費事佢feel到咁多嘢,一陣佢亂咁用嚟feel我去過邊咪死。。。No Way!哈哈。。。

星期六, 6月 14, 2008

去馬

上個星期抽angel card抽到隻"Oceana",咁啱今個星期自己有個諗法,就係想幫自己屋企人做healing當practice,而咁啱今個星期又有朋友叫我要多d練習先會有進步。練習我當然想,只係第一無地方,第二怕做得唔好搞到屋企人啫。睇嚟真係要再諗諗有咩辦法先得。

星期三, 6月 11, 2008

高人

今日重遇高人舊同事,同佢食晚飯又傾左一晚,個人對能量/靈氣/佛學/宗教都有更深入嘅睇法。佢仲比我見識唔同靈氣能量嘅威力,原來真係唔係勁/大細力嘅分別咁簡單,唔試過真係好難明,真係要親身體驗先得。。。

最勁都莫過於佢駛出左,好似大唐雙龍傳裡面寇仲用到嘅"一指頭襌"神功,一發氣就知道我邊度經胳阻塞得勁,又比左建議我之後點同自己做healing,真係可以話獲益非淺。呢件事亦令到我對天眼有新睇法,以前嘅我都比較希望可以睇到氣場,原來仲有其他更有用嘅地方可以發展。。。

而亦令我明白成功非僥倖,無人可以唔駛付出就可以當大師。佢之所以有今日咁勁,原來佢付出左唔少嘅努力,佢對靈氣/能量嘅熱誠真係同我差天共地。不過而家比我知道,對我嚟講絕對係一件好事,因為可以警惕自己,如果真係想响靈氣/能量療法上發展,真係要再加倍努力先得。。。

星期一, 6月 09, 2008

選擇

終於都寫呢編"選擇",其實一早就已經係想幫自己呢編人生?目的?寫下集, 不過諗左一陣都諗唔到用咩subject好,但係睇完同學仔果編選擇, 我就叮一聲覺得好啱我用,於是就決定抄佢一次咁多。

其實我今日開工寫呢編blog,係因為啱啱今日比我睇到,東方新地果編封面故事:"靈芝店員工告上勞工處,數臭郭晉安",有感而發。裡面提到騎呢草姬十宗罪,其一有三條係咁嘅:-
1。水晶問卜 - 裡面講到,每星期會同同事進行水晶問卜,測試員工忠誠度。。。。咁都得???
2。迫做自然療法 - 內容有少少變態,有興趣自己買本嚟睇啦。。。
3。一定要OT - 公司並冇明文規定要OT,但係就日日check住員工有冇OT,唔OT即係對公司冇歸屬感,分分鐘被炒。。。

先唔好講佢地做得啱唔啱,我想講嘅係水晶問卜,原來真係有人上隱上到咁,唔怪得師父一早都話唔想教我地,怕我地亂咁用。。。

其實有時d嘢可能本質係好嘅,睇吓你自己點運用。好似自然療法咁,本來都係好嘅,我並唔係講梗佢迫人做果隻"自然療法",但係搞到要迫人做就點好都變唔好啦。。。亦講比我地聽,就算我地第時用能量幫人,學到幾叻都好,如果client唔願意你夾硬幫,就同迫做自然療法一樣,到時好嘢都會變左係唔好啦,如果搞到上報仲衰,到時連累大家就唔好啦。。。

講返OT,其實呢個topic就係我本來想講嘅topic,而東方新地正正講左我想講嘅問題,OT本來無問題,但係搞到要人老馮開OT,你唔覺得有問題咩?亦即係我想講嘅選擇。。。有人會選擇一日工作二十小時去換取高薪高職位,但係你唔可以要所以人follow你嘅做法。因為真係會有人想一日工作8小時,之後就用餘下嘅時間去做佢想做嘅事,可以係同家人一齊,亦可以係去學嘢,總之就係去做佢覺得應該做,又有意義嘅事,因為佢地可能對人生有另一種睇法。好似我咁,我就覺得人生苦短,點解要工作休息再工作?唔通無其他事可以做?比你搵到年薪百萬又可以點?

我覺得好似好多New Age書咁講,人生只係a matter of choice,你有你嘅選擇,人地亦有人地嘅選擇。既然大家嘅路唔同,好難話你啱我錯,或是係我啱你錯,因為根本就無對與錯,只係有選擇。我會尊重你嘅選擇,亦希望你都會尊重我嘅選擇。但係千奇唔好後侮,因為每一個選擇背後,你都一定有你嘅付出同收穫,無人會事先知道後果,最緊要係盡力而為,先至可以做到今生無悔,人生最後先可以有所提升。。。

星期日, 6月 08, 2008

銀座媽媽桑說話術

買呢本"銀座媽媽桑說話術"嘅原因,完全係比個書名吸引住,銀座媽媽桑喎。。。黑目瞳喎。。。梗係要買啦,連我老婆都話個書名好搞鬼喎,搞到佢跟一(即係我睇完要比佢睇啊)添。。。

其實未買都估未必啱睇,因為好明顯係一本女仔書,但係估唔到睇完都竟然有少少得著。

好似佢裡面講到:-

1。一定要自主地進行所有的工作,因為別人的命令才行動,就會有"這與我的意願無關,只是不做不行"的強烈排斥感。相反地,如果所有事都能由自己賦予它們意義,並自主地展開行動的話,就可以擁有不被義務感所支配的活力生活了。所以不要因為"Must"而做,要因為"Want"而做事,讓自己戴上積極進取的光環。
2。佢講到如果有兩間百元料理店,其中一間店的老闆抱著:"既然每道菜只賣一百元,所以就花一百元的功夫煮就好",另一間店的老闆則是充滿自信地抱著:"只要吃下去,就會驚訝於這道菜竟然只要一百元"的相法在經營。你會想去那一間店?

裡面都有d內容係幾搞笑架:-

1。男人本能會唔比到手的獵物吃飼料。。。。哈哈,我諗起成日有人講"七十歲前唔好比飽飯女人食一樣"。。。
2。佢教人將缺點轉換成正面嘅事物,例如:好色=這是英雄的本色,是充滿精力,擁有玫力於工作或是興趣的能量的人才有的特質。。。?哈哈。。。

而我最估唔到嘅,佢竟然有講能量嘅事:-

佢話:這是我的個人看法,每個人都具有他所發散出的特別波動。我認為,人與人之間是否能亙相吸引,就是靠這種波動來決定。而形成這種波動的,就是每個人所擁有的能量。

書如其名,裡面有教好多同人溝仔嘅嘢,包括:-
1。欲拒還迎。
2。投其所好。

不過佢有時都教得幾離譜:-

佢教女仔要提出任性的要求,讓對方進貢,隨心所欲地要求對方做越多事,男人就越會產生”都己經幫她做這麼多事了!我一定是喜歡上她了!她一定是個有這麼高價值的女性的相法。。。”於是變得更加喜歡!。。。

你試完無左個男人唔好喊。。。

基本上呢本書都幾好睇,不過佢講左一個好得人驚嘅事實出嚟,就係最紅嘅酒店小姐都唔係靚女。。。。。吓?咩原來無黑目瞳架。。。。早知唔睇呢本書啦,幻想破滅係最慘痛嘅事情。。。。

MBS感覺

搵左隻好feel嘅白老鼠試MBS,但係佢唔太feel到,不過都同我一樣,就係有少少無力感。。。

我仲衰,做完好鬼死肚餓,一定要食番d嘢補充先得,如果唔係差d暈添。。。

有一次我唔知係咁啱定點,我竟然做做吓聞到公仔嘅味。。。?果次我仲覺得睇嘢有d矇,眼前好似有d霚咁。。。唔係呱,用公仔都會搞到咁???

而我用公仔幫自己做都幾好feel架,我隻手放公仔唔同地方,有時身體果個地方都會有少少感覺,但係唔太明顯。個感覺真係同身痕嘅感覺有少少似,所以remote都幾難feel到,如果remote都做到hands on嘅feel佢一定都會話勁。。。

Anyway,我同朋友傾過,大家都覺得MBS攞到嘅能量都真係幾勁,佢就試過突然光一光,同埋有一股能量衝入佢個身度。我就除左身上感覺到果股能量之外,我仲覺得幫人做完個人會幾攰,個身有少少痛,可能我嘅身體未習慣到咁大嘅能量,所以我每次做完都要行返個小周天,散吓多餘嘅能量咁,唔怪得大師都話本來係諗住master先比上啦。。。

星期五, 6月 06, 2008

癌並唔係病

今日幫朋友上網搵一d資料,無意中比我搵到一個叫Natural News嘅website,佢裡面有一編文章叫做Cancer is not a diesease - It's a survival Mechanism,我覺得好有意思,雖然無人可以confirm佢講嘅說話係百份百啱,不過我個人就偏向相信。佢講到:-

1。一般嚟講,如果無能量供應比正常嘅細胞,果d細胞係會死。
2。為左生存,有d正常嘅細胞响唔夠能量嘅情形下,就會選擇變成癌細胞,目的就係唔想死,因為變成癌細胞,佢就可以响唔夠能量嘅環境繼續生存。
3。之所以細胞會變成癌細胞,除左第2點講嘅原因外,其實都想話比我地聽,我地嘅生活習慣係有需要改變。
4。殺死人嘅唔係癌細胞,而係引至癌細胞生成嘅原因。
5。衝突,內疚同羞愧好容易令到人嘅身體基本功能癱瘓,從而生成癌細胞。
6。癌症病人多數都係欠缺自重及生存價值。
7。呢一句說話我覺得好有意思:"癌症唔會引至人病,係人有病先會引至癌症。"
8。一個正常人其實身體不嬲都有唔少癌細胞,所謂嘅癌症只係癌細胞嘅數目比較多而己。
9。電療同化療只係將你嘅癌細胞殺死,同時間,療程亦會殺埋你其他器官無事嘅細胞,從而造成身體不可復原嘅傷害。
10。電療同化療就算殺死哂己經搵到嘅癌細胞,如果真正引至癌症嘅原因未搵到,正常嘅細胞會再次變成癌細胞。
11。每年有過十萬"成功"醫好癌症嘅病人死於感染,心臟病,喪失肝腎功能等病。原因就係電/化療嘅過大殺傷力,破壞左身體正常器官嘅運作。
12。被診斷出癌症,會令到病人震驚以至無助,從而令到病人個世界完全改變,其實病因一早已經响度好多年,只係病者唔知道而已。。。
13。其實癌症唔能夠令到我地死,除非我地生活上對於信念,態度,思想同感覺嘅選擇容許佢地長大。

其實編文章仲有好多好多嘢想講,不過我只係將我覺得最能夠觸動到大家嘅concept hightlight出嚟,有興趣嘅不訪去佢個site慢慢睇哂佢,你睇完絕對會話值得花時間慢慢睇。

星期四, 6月 05, 2008

MBS 半後感

啱啱上完兩堂MBS,亦即係仲有兩堂要上,但係已經感覺好勁。MBS係咩?就係Mind Body Soul Therapy,亦即係身心靈療法,Level 1好似主要都係掂個身體,去釋放積壓左嘅負面情緒。本來簡簡單單嘅幾下動作,效果真係大到我唔敢想信。原本聽過A班同學仔話好勁,好正,但係同生仔一樣,我只係識得"哦"左一聲回應,但係自己上去一半,但係感覺已經係"嘩"一聲叫左出嚟,原來都係一樣要經驗過先知有幾勁。

一開始教左一個好簡單嘅疏通經胳療法,短短三至六分鐘嘅療程,已經散到一房都係味。。。之後教嘅重新啟動身體自我復原療法,雖然時間就要耐d,成個療程大概都要做一個鐘頭。不過效果之勁,真係超出我嘅想像。同學仔一落手幫我做,太陽穴附近都有少少嘢"liu"下"liu"下咁,點不知做到一半左右,直情覺得頭嘅側邊好似有條發熱線咁,我估係條胆經撻著左。。。直情係熱到震,做完唔駛講都知間房大味到暈。。。

本來今日起身以為無哂事,點不知一返到屋企,同BB玩左一陣之後,就覺得自己成身原來都係好似無咩力水咁,睇怕今晚都要幫自己惡補先得。。。