星期六, 8月 25, 2007

Distant Attunement

自從跟左Alan學完Reiki之後 ,開始對Linage有少少興趣。之後仲一路都有睇開William Lee Rand個site,今日竟然比我發現左佢話distant attunement原來仲係有少少問題,始於都唔夠in person做嘅attunement好。

星期五, 8月 24, 2007

七月.....真係有嘢架.....

尋晚我訓到半夜突然全身都唔郁得,就連個口都唔郁得,本來我每隔一排都會發生,無咩特別。但係今次我開眼想睇下咩事,點知比我見到一個好似紙牌(2D),黑色,塊面無咩detail架,好似係卡通公仔頭,之後仲聽到"唔"一聲。當然有d驚啦,話哂都係第一次,又無expect會見到,係咁心裡面諗叫佢唔好搞我,又諗起師父,好想有人救,當然隻嘢無理我繼續搞我啦。

之後我試郁睇郁唔郁到,發現我兩隻手腕都郁到少少,我就係咁兩隻手一齊做chokurei,心裡面都係咁諗chokurei,但係好衰唔衰,我隻左手方向錯左,之後就覺得兩隻手好似比按得好實咁,仲實過之前。

之後就難郁左好多,但係我無放棄chokurei,因為佢似乎唔係好鍾意chokurei。今次右手先做chokurei,做左五六次左右,隻右手就開始郁得。即係有效,咁就梗係左手都做啦,可能單手會做得好d唔會錯方向,又係做左五六次左右就全個人都郁得返哂。

唔好講笑就梗係馬上吹幾個波波保護吓先啦。

其實之前都發覺阿B耐唔耐都會有少少好似比人嚇一跳咁,而家就少左好多。仲有幾日前,我想返房關門,點知我都未掂度門,度門就自己好快咁向住我咁郁,我一手就捉住度門,之後就感覺到有d風(?)經過我個身。我仲以為係有風,不過我都無開窗?仲不以為意添。

其實咁多次夾夾埋埋,係唔係話我間屋即係有啊?

同師兄師姐請示,佢地就教我點香清下場咁,可惜我無香。。。好彩mondi師姐話下個星期一會讓d香比我,真係唔記得講多謝添。emily師姐就叫我唔好交流同埋唸吓心經。。。吓,佢"唔"左我,所以我叫佢唔好搞我,都算同佢交流左添。。。

Terry師兄仲話七月有機會返嚟討債??唔係呱,唔好嚇我先得架。佢就叫我rei下角落頭,同埋買d sage開水洗屋。死喇,都唔知咩係sage,不過等我rei下d角落先。

Elaine師姐就教左我同佢傾吓,叫佢唔好搞我,等我如果今晚見到佢同佢傾下講下數先。唉!大吉利士。

不過諗返轉頭,尋日唔知點解突然好想嘔,成日都係咁,仲以為今日會好返,點不知一返到屋企就頭痛添。。。

又比我搵到個Resonance Site,竟然有d怪聲(沙沙聲),聽左之後就唔痛,可惜一聽完又痛過。

星期二, 8月 21, 2007

靈界大覺悟-2

本書另外仲有提起費城實驗,唔睇過wikipedia都唔知原來費城實驗咁勁,竟然連愛因斯坦都有份參與。個experiment好似做到teleport嘅效果,可惜之後船上面所有人都出事。

嘩,如果件事係真嘅,咁就真係好勁,話唔埋第時我地可以玩悟空果招"舜間轉移",到時你都唔好話唔勁。但係都有arguement話個碼頭根本就未起好,都唔知信邊個講好。但係我覺得搞到咁大鑊,政府一定會用盡所有辦法去否認。

呢件事o係一九八四年仲比人拍成電影"消失的1943",搞到我真係搞到我好想睇吓套戲添。

星期日, 8月 19, 2007

靈界大覺悟

終於都睇完本靈界大覺悟,原來成本書都係想講第十覺悟:"世界憧憬",當然入面係有講其他嘢,例如:夢,直覺,Past Life,等等。不過始終落筆寫第十覺悟比其他多十倍都唔止。

佢入面講,原來夢同直覺係比我地今世嘅啟示,如果你好記得你個夢,即係話你已經打開左你個心空,準備好接收呢d信息。唔知係唔係咁啱得咁Q,我睇完果個chapter之後,一連三日都有發一d好詳細嘅夢,可惜第一日個夢我已經唔記得喇。講你都唔信,一般我都唔會記得夢境入面講咩,而夢中嘅detail都唔會太多,但係睇完呢本書之後發嘅夢都好詳細。好!等我一於將我所有記得嘅夢都放入我個Blog入面先。

第二日個夢係咁嘅:-
我去左一個唔知係買舖定係租舖嘅Open Day,個舖好似一間私人會所咁,中間有一個大廳serve嘢食嘅,周圍有好多間房,其中一間係桌球房。間舖好似有兩層,但係已經唔係好記得樓下有咩喇,而門口係樓上,仲要好似係有一條樓梯通去海邊。地點應該係外國,如果唔係邊有咁正。

入面我見到我同Terry師兄同埋一個舊同事(但係唔係好記得係邊個)一齊去睇,我仲遊說Terry師兄頂左嚟做"你咁有錢,不如你頂左佢啦",我竟然仲記得佢講"痴線架"。Anyway,我地一路行,竟然見到佢地有一疊Reiki嘅咭片,但係一攞起d咭片,張咭片就變返係間餐廳嘅咭片,再放低又變返做Reiki嘅咭片,如是者試左幾次都係咁。Finally比我地見到主人翁,可惜當我想當面問主人翁嘅時候,我就比我老婆叫醒左,因為又輪到早更嘅我餵奶,就係咁,我嘅夢就完左。

第三日:-
第一個夢係咁嘅:-
其實我對呢個夢有一個好熟識嘅感覺,裡面係講我其實係住o係一間半山嘅屋,屋入面有一塊全海境嘅落地玻璃窗,我就同老婆一路源住條斜路行落去海灘,路程都好近吓,唔洗幾分鐘就落到去,但係落到去之後嘅Detail我就已經唔係好記得喇,之後仲比BB喊聲嘈醒左。

第二個夢係咁嘅 :-
裡面講我好似入左三國誌咁,總共有四個國家,成個版圖係一個長方形,每一隻角有一個國家,而中間就係一個海,我係成個Game入面最强嘅國家,但係版圖就最細。我上面嘅國家唔敢向我做咩,而我右面就有一個中立國(連埋佢就係五個國家),即係對任何一方都無敵意,完全中立嘅意思。內容大概係我深入中立國,遊說佢成為我國嘅一部份,當然無用過武力,而係以德服眾,好似係幫手救一個人咁,詳細唔太記得,根住發展係又比老婆叫醒左,因為又係早更嘅時候,做阿爸真係唔係咁易。

唔知我呢d夢係想話比我聽d咩信息呢?唔通我真係會發達?哈哈哈,要努力d買六合彩先得。

題外話:終於都睇完聖境預言書套DVD喇,都係覺得本書好睇好多,可能套戲時間太少,不能cover得太Detail,但係就比到我到喉唔到肺嘅感覺。

星期一, 8月 13, 2007

聖境預言書

啱啱在一個關於Reiki嘅site見到有d書賣,好奇心大又無咩多餘錢嘅我就即刻上左library度借,又咁好彩比我借到.

第一本睇嘅就係 詹姆士‧雷德非 一九八九年寫嘅 聖境預言書 .其實我都無咩話expect本書係講d咩,不過都以為係一d比較學術嘅而且同Reiki多多少少有d關係嘅.點不知一睇先知原來係一本小說,而且都唔exactly係講reiki,係講成個New Age嘅Concept.不過對我嚟講係一個驚喜多過失望,因為真係無咁悶.

見到佢話原來係可以train-up到人人都睇得到能場(即係氣場),於是我梗係照住佢講嘅方法去練習,睇吓得唔得啦,唔知係我太過蠢定點,學來學去都唔識,唔通真係流料?Anyway,佢話只要用兩隻食指嘅指尖對指尖,然後一齊指向天,跟住兩隻手慢慢分開,一路到一吋咁上下先停,全程用對眼望到實,再試下out focus,應該會眼到咁話,但係我試左幾次都唔得.

另外,佢講到人生九個覺悟,詳情可以買佢嘅睇,或者睇吓其他人嘅comment(http://www.books.com.tw/exep/prod/booksfile.php?item=0010034564&).不過都講得幾真實架.


竟然命運就係第一個覺悟.第二個覺悟我就唔係太過明.第三個就係能場,好可惜睇唔到.第四個就話爭吵同戰爭嘅原因係左於人人都不斷爭奪別人身上的能.

第五個就話人人都可以吸收宇宙嘅能,都講得幾好,Reiki同外氣功都係咁嘅concept吖.第六個話人要清理自己嘅過去?唔通就係師兄話心經同karma?我就覺得第七個同第六個差唔多.第八個就同第四個差唔多啫,只不過係講梗愛人咁解啫.至於第九個我都係唔太明.


後來仲比我search到原來有DVD(http://www.dvdspring.com/Soft_Show.asp?SoftID=276)睇添,本書咁精彩等我都睇下套戲先.

其實我一口氣借左五本佢嘅大作http://blog.robin.idv.tw/index.php?load=read&id=144,真係估唔到學New Age嘅嘢都咁Funny,等我睇完都寫下讀後感先.

星期五, 8月 03, 2007

原來病氣真係唔可以輕視架

上星期五返屋企食飯果陣同阿哥傾開,知道佢而家學梗氣功,之前學站功,而家學太極,可惜未有氣感。於是我就同佢講我而家學梗臼井靈氣-Usui Reiki,當然佢同我第一次聽到靈氣嘅時候一樣,都係唔知靈氣係乜東東。

講多無謂,比佢試下最實際,於是就rei下佢個勞功穴,點知rei左成分鐘佢都無感覺,仲諗住練氣功個勞功穴會比較敏感添,於是就轉rei佢個湧泉穴,因為我rei我老婆同外母嘅時候,佢地都覺得湧泉穴最大感覺。嘩,rei左佢一陣(一定唔夠一分鐘),佢就開始感覺到熱。之後就梗係停啦,因為主要都係想比佢試下個感覺係點啫。

點不知唔洗五分鐘我就感覺到個人勁攰,係真係好似幾晚無訓到咁。我諗我中左佢d病氣,仲以為試下唔洗做事前事後嘅準備功夫添。於是一走我就即刻做grounding,希望快d將d病氣排返出體外,好彩一路做grounding做到返屋企就覺得好返好多。

之後同返師兄講先知唔做事前事後準備功夫係真唔得架,連試吓都唔好。等我之前仲比我d家姐同我嘅同事試下添,好彩果幾次因為佢地好快就感覺到我rei梗佢,所以我就好快停左,亦都可能因為咁,所以我就乜事都無。搞到我以為試吓無問題添,點不知真係中左招。

其實之前學中醫個阿sir都同我地講,無論係推拿定針灸,都會感染到過程中病人排出嘅病氣,所以最好都要練氣功咁話,如果唔係就會好似深圳果d師父咁,好快就有病唔可以繼續再做咁話。而Alan都有提我地做healing嘅時候,一定要做足事前事後功夫,只係唔知連試下都要啫。

不過咁就更加比到我信心,因為我知道原來真係好快就可以令到病人排出病氣,亦即係話好有用。而且亦都話比我聽呢d功夫真係唔少得。

星期三, 8月 01, 2007

脫離黃色世界

尋日健康院終於都Announce BB唔洗再嚟check黃喇,當係係因為佢個reading已經退到(頭83,身85)好低喇。連陪月阿姐都話佢退得快,我心諗”梗係啦,咁多勁人幫手”,佢仲話佢另外一邊個BB出院都無我地阿B咁黃,但係而家(講梗尋日)佢都仲有黃,仲要返健康院度check,個B仲足足大個我地個B一個月添。

其實自從各大師門嘅介入幫忙,我都覺得阿B有明顯嘅變化。

第一,佢呵屎真係勁左好多,好多時媽媽抱抱吓都比BB搞到一身都係。不過我地都唔知點解BB淨係搞媽媽?
第二,佢呵屎嘅frequency亦都密左好多,初初一日一至兩次.而家?一日起碼四次,有時仲多d,真係差唔多每一餐都有咁濟。
第三,佢精神嘅時間多左,以前一日只有一段少少嘅時間係精神自己玩(都唔夠兩個鐘)其餘都係訓多。而家?佢起碼有兩個鐘精神,有時仲三四個鐘添。
第四,連陪月阿姐都話佢多左鬼靈精怪添,例如:扭玩,扭笑,扭傾,真係花樣百出。

o係呢度我想再次多謝咁多位有份出過力又或者祈過禱幫手嘅所有人,無你地咁幫忙,阿B唔會咁快就好返,多謝哂。

真係唔係我懶架,其實我想尋日就出Post架喇,不過真係好唔得閒,而且又有一份做到一半嘅所以都係完成左佢,第二日先再出Post。

再者,我想一個Post淨係講呢樣嘢以表謝意。好多謝哂咁多位嘅幫忙。