星期六, 12月 22, 2007

西藏生死書

其實老早就睇完,不過真係唔太明,所以就再去借多幾個唔同嘅版本嚟睇,好可惜我悟性原來真係唔高,所以所得有限。。。

我第一本睇嘅係1996年由鄭桭煌譯索甲仁波切1992著嘅西藏生死書(The Tibetan Book of Living and Dying),睇完都明明地,亦覺得好震撼。入面有幾點都好得意架,例如:

1。佢入面講到原來生男仔嘅話,個靈魂原來係鍾意媽媽而唔鍾意爸爸,咁我個仔仔咪。。。而如果係生女仔嘅話,個靈魂就鍾鍾意爸爸唔鍾意媽媽,真係幾得意。因為你地造佢出嚟嘅時候,原來佢一直都响左近睇住架。。。
2。佢又講到亡靈响中陰身,係要再次經歷同一樣嘅死亡過程七次,每七日一次,而中陰身嘅忘靈,敏感度係比生前强七倍,亦即係如果死嘅時候本來已經好痛嘅話,在中陰身就會再要痛多七次,每次就要痛多七倍。真係好金,所以真係唔好亂咁輕生,死真係唔可以解決問題架。
3。佢好簡單咁講原來個個人都可以超脫輪迴,不過要生平好好修練先得,meditate係其中之一,最好都係要打通中脈,所以我都真係唔可以再偷懶唔meditate喇。如果唔係嘅話就要請上師幫忙。不過以我嘅理解,都要睇你生平嘅業力,如果你作得太多惡業,死後就會被你作嘅業影响得好勁,試諗吓如果得一個人追你同比十九幾個人圍你嘅分別,邊個會易甩身d?
4。佢成日都話要搵一個朋友幫手念中陰聞教得度,不過佢就無講過呢編嘢係點,即係要自己去搵啦。。。

睇完之後就仲想知多d,於是就去借左本1993年由李毓昭譯河吧厚德同林由香里寫嘅大轉世--西藏度亡經(The Tibetan Book of the Dead),睇完真係無嘢寫,因為佢真係太短,唔明嘅就仲唔明,不過當係introduction都OK。

之後當然無放棄,繼續去借第二d版本啦。最後就比我借左2005年由張宏實歸納所有唔同嘅版本,再用上簡單易明文字輔以圖表說明,真係易明好多。

真係好值得花時間一睇再睇(不過我無咁嘅心機),裡面實在係教得太多有用嘅嘢喇,例如:-

1。佢好清楚咁講述左死亡嘅過程。
2。附錄入面有哂成編中陰聞教得度,淨係呢樣已經值得一睇。
3。除左死亡嘅過程,佢仲教你响唔同時候,用唔同嘅方法,去得到超脫。
4。佢將你响中陰有機會見到嘅所有佛父佛母嘅樣同特徵,都寫哂出嚟,到你真係見到時候,都唔駛打個突(因為原來有d都幾嚇人架)。
5。佢將唔同版本嘅生死書,做左個summary,睇完呢個簡介,你可以知道邊個版本比較啱你睇。
6。原來頭七唔係死後四十九日咁簡單架,因為臨終中陰同實相中陰中間係有段時間昏迷,長短因人而異,實相中陰開始先計四十九日架。而臨終中陰嘅時間亦然,但係臨終中陰中間,醫學上已經話死亡架喇,所以真係唔知點計。

不過佢無講到陰身要再次死亡七次,但係無講到唔代表唔駛喎,而且佢話中陰身嘅敏感度係九倍而唔係七倍,所以都係果夠,唔好輕生啊。

5 則留言:

Yan 說...

我以前都聽過,如果bb係男仔,媽咪個肚會係尖,因為bb向內抱住媽咪。如果bb係女仔,媽咪個肚會圓,因為bb向外抱爸爸

冒險家 說...

唔講唔覺,講開又覺,又幾咁Match喎。

本來仲有少少嘢想講架,不過BB急Call,唯有草收筆,下次有機會再講過啦。

Martin 說...
此留言已被作者移除。
Martin 說...

索甲仁波切--西藏生死書
http://sm21.net/jing/tibat

另外,有圖解應該易明D
http://www.books.com.tw/exep/prod/booksfile.php?item=0010306919

冒險家 說...

係啊,我就係借左呢一本,亦都覺得易明好多,不過佢cover唔哂所有嘢。。。我覺得有時間都最好睇多幾本啦。