藉口

我前晚幫我老婆做 healing ，我幫佢貓爪嘅時候，幾實在．而我掃佢個氣場，就發覺佢係外圍氣場比較需要，所以我主力係幫佢做外圍氣場．我做完之後，佢就話好放鬆，好想訓，問我點解．．．其實我真係唔識解，不過就同佢講，好多人都會咁，好似外母都係啦，而且可能你訓得唔好，係需要訓多d，所以比我做完咪好想訓囉．我聽過最過癮嘅形容係”你d咩邪功嚟架？ 點解次次幫我做完都咁眼訓嘅．．．”．Anyway，佢其實都唔完全信，仲話坐左咁耐，梗係想訓啦，不過佢自己後來都講：”又唔係喎，好多時坐响度好耐都唔會想訓到咁架喎”，我一路幫佢做，佢仲問我：”你係咪做梗架，咁遠都得？一唔係就停左响度，郁都唔郁咁，係唔係响度吞pop．．．”．其實我見佢咁辛苦，咪幫佢做哂咁多層嘅小周天囉，梗係郁都唔郁啦．．．不過唔緊要，最緊要係幫到手，我信有咪得囉．其實佢唔信都唔怪得佢，就連我自己有時都信心不足，又點可以怪人呢．．．

再者， 一路以嚟，師兄其實都不斷重複，level 1同level 2學嘅嘢好重要．當時其實唔係太明白點解，仲要比藉口自己，話”始終都未上過高level，又點會體驗到呢？”上完level 3之後無耐，開始有少少同意．事原係我上次sit-in level 1，師兄都話我底輪好塞，要多d清，當時就覺得師兄好勁．後來先發覺，原來其實自己都應該要識，唔係要贊人勁，反而要問自己點解學唔識．．．當然，師兄亦真係好勁，不過只係有d基本嘢我地應該係要識．

之後嘅日子，竟然仲有少少懶添．淨係一個星期幫自己清三次，仲係只用七輪經脈嚟清，貪佢夠快吖嗎．但係一路以嚟，都係無咩進展，所以之前先至話，開始無咩信心．

前晚同師兄再三double check，先知原來自己真係好懶．其實應該晚晚幫自己清，七輪經脈當然要做啦，但係最好都要加埋貓爪，集中底輪同塞得勁嘅地方．於是的起心肝，先玩七輪經脈清，之後就掃下自己氣場，其實都係信心唔大．不過竟然比我有發現．發現原來自己下三輪個氣場真係好實，特別係底輪添．知道左就梗係要做嘢啦，試吓用貓爪係咁爪，由喉輪開始落，每個輪位起碼爪三幾分鐘，塞嘅就做耐d．做完其實都無話有咩感覺，不過做完meditation就發覺．第一，個人易左靜落嚟．第二，一路meditate，一路覺得個身慢慢放鬆， d骨係咁咯咯聲 ．第三，meditate之後，隻腳竟然有鬆左嘅感覺添，好正．

其實，掃氣場啊，貓爪咁，都係level 2已然學左．以前自己唔做，係因為成日覺得無feel，搞到都唔知點做好，好似老鼠拉龜咁，失去哂信心．於是就當然係將學左嘅嘢，放埋一邊就當學唔識，仲要比個藉口話自己唔識，好似理所當然咁．．．經過前晚之後，就發現唔識先要練多d．好似尋晚咁，開始掃到自己個氣場，邊度實，邊度鬆．貓爪仲勁，開頭同老婆做已經覺得爪到少少嘢，後來同自己爪，越爪越實在，爪到太陽輪開始，一路到底輪都好實在咁爪到 d 嘢出嚟添，果種滿足感，真係好難形容．

經過前晚，又好似有少少進步，比到多dd信心自己，再加倍努力，希望早日學有所成，真係可以幫到親朋戚友啦．