星期日, 3月 02, 2008

補充

其實因為之前實在太懶,所以好多書評都有唔少嘅遺漏嘅地方,在此我想為各書評遺漏嘅地方做一d小小嘅補充:-

我的能量書
佢有幾個地方我覺得如果佢再further elaborate,呢本書會好睇好多:-

直覺嘅訓練:書入面有提到如何訓練直覺,不過真係皮毛得很。
從氣場提高感應力:書入面提到可以從人嘅氣場,得知好多重要資料,但係從來無深入探討。

相反地,後半part比前半part悶得多,可能都有唔少有用資料,不過我真係無咁多心機,慢慢從一d咁悶嘅chapter入面搵一d有用嘅資訊。如果可以減少後半part嘅落筆,反而再响前半part唔同嘅地方(好似上面提到果兩點),再詳細作進一步嘅探討,我會比較鍾意睇呢本書。

家密宗與東方神秘學
唔講唔知,原來印度嘅方言係有唔同嘅發音標準,我地出生响香港嘅真係無辦法理解,因為都唔會有香港音同九龍音。。。亦即係話要諗標準嘅梵文咒音,如今已經係天方夜譚,因為你根本唔可以追溯返,個咒音原本係用南印定係北印嘅發音做標準。。。

坦白講,睇完呢本書,我對密宗就覺得更加神秘,莫講話起原,就連有幾多種唔同嘅密宗,我都唔係好知。不過佢提到密宗嘅身口意,呢樣嘢都對我呢d門外門漢有唔少嘅幫助,起碼我知道唸咒嘅時候,意識原來會影響到個效果,而且原來意密係好重要架添。

細胞記憶
原來身邊嘅親戚,朋友,甚至係同事,都有可能响前世,係同佢有相似嘅關係,可能只係角色唔同左而已。而人出生嘅目的,原來係要為左做好,自己出生前所定下比自己嘅功課,好似做好呢份功一樣。唔怪得生命密碼都幾準啦,唔好講話紫微斗數添,差不多每一日嘅日程都原來係早有編排。真係唔好浪費光陰,唔係到畢業(死)嘅時候,唔合格就唔好啦。等我當年後生嘅時候仲話自己有大把光陰添,原來不知不覺間,我已經搞到自己嘅成績表通通肥佬都唔知添,而家要急起直追先得喇,唔知攞得高份有無奬品呢。。。

其實之前都同一d會通靈嘅網友傾過,佢地都有相似嘅形容,只不過都未係好相信咁啫,知得當時就問吓佢地啦。不過諗諗吓,做人其實都真係要be humble,扮勁真係無jet so,好似spider man個case,能力越大,責任真係會越大架。例如有d人成日眼紅人地,當其他人都勁贊其他有缺憾嘅偉人嘅豐功偉業嘅時候,又話我都得啦,講吓講吓如果下一世真係輪到你有d咁嘅缺憾嘅時候先後悔就真係太遲喇。相反我真係更加希望平平淡淡咁過一生就算,唔駛話家財萬貫,才高八斗,只要日日有一餐溫飽,同屋企人生活得開開心心,我就心滿意足喇。

遇見未知的自己
佢裡面有講到,叫我地要多d留意自己嘅身體,對於唔同嘅情緒,作出一d咩嘅返應,其實果d就係身體想比我地嘅signal,收得signal就梗係有嘢要話比我地聽啦。如果我地成日唔理佢,身體就會慢慢出現更大嘅問題,所以有時唔好話唔知自己點解咁多病痛,又唔好問點解成日病極都唔好,原來係自己一路做左好多唔應該做嘅事。相返咁講,想身體好d,就多d留意自己個身體,就算係好細微嘅返應,都應該多加注意。

沒有留言: