中醫collection

一路以嚟，我都係信中醫多過西醫好多，主要係唔完全認同西醫嘅方向，當然係唔認同多過認同啦。唔認同佢地嘅頭痛醫頭，腳痛醫腳。唔認同佢地嘅治標唔治本。唔認同佢地嘅病症分類。唔認同佢地嘅殺傷性療法。只係認同佢地响檢驗上面嘅精神，但係仲係覺得有好大好大嘅改善空間。

中醫方面，當然我個人係非常之咁相信。佢嘅理論，博大精深。治病求於本嘅精神，更加係做人做事原本就應該有嘅精神。佢地對身體嘅分析，更加係後人／西方到現今都仲未追得到地方。例如，中醫嘅心，並唔係單單一個心臟，而係一個系統，所以中國人成日話咩心想事成／心知肚明，而呢樣嘢鬼佬只會笑話＂心唔會識想架＂，佢地笑係因為佢地都唔明咩先至係中國人講嘅心。又例如好簡單嘅一個便秘，西醫一定幫人瀉就算，但係中醫就會幫你搵出原因，便秘除左可以瀉之外，其實仲可以用補氣嘅方法，而究竟係補定瀉就要視乎病因。更唔好講我地成日見嘅咳，原來中醫嘅咳有N種原因，佢嘅理論係每一個臟腑都會搞到你咳，要醫就要先睇吓到底係邊個臟腑出事，之後仲要睇果個臟腑究竟係出左咩事先可以醫到。就算搵到哂咩原因，亦都再要細分究竟係點醫。因為中醫都有好多唔同嘅派別，有d派別係主將用瀉／下，有d就主將用補。就算補都有分溫補，定唔知點補（我真係唔知，哈哈）。再難d講，就算同一樣補法，响唔同嘅地方或者唔同嘅季節，响用藥嘅份量，甚至用藥嘅組合，都會有少少唔同。真係好難一概而論，一定要倚靠經驗。你問我／或者好多現任嘅中醫，佢地都好難答得出，到底有幾多唔同嘅派別。

呢個亦都係點解好多人話中醫唔得嘅原因，因為中醫辨症之難，真係唔係講笑。其實好易會辨錯症，就算辨症無錯，都會因為各人體質唔同，而用錯方向。我所指嘅錯，其實唔係話用錯藥果d，而係用左一d無咁有效嘅方法，以至影響到醫療嘅成效，亦即所謂嘅同個中醫夾定係唔夾。

我個人都試過唔少嘅中醫，當中有一至兩位我都覺得幾勁，想响呢度同大家介紹吓：－

羅輝
診金$60，响天后流離街。
佢最出名就係醫cancer，好多楂benz，甚至見過楂rolls嘅嚟搵佢睇。你問佢佢就會話你聽佢嘅威水嘢，好似話以前有個出名嘅風水命理大師，本來西醫話佢得返幾個月命，點知經佢手，當然係幾年都唔死得啦。

尤方圃　
診金$60
佢除左係用藥粉（which我真係覺得好方便）之外，仲識針灸。唔講你唔知，用針灸醫感冒真係好effective架，針完之後，個頭果d症狀差不多馬上消失。佢醫婦女PMS嘅病亦真係幾得架添。另外佢亦會幫人做三伏天，香港我個人就唔係識好多地方有得做（浸會有得做，不過一定唔係咩professor幫你做，有個friend做完個comment唔係咁好）。想知三伏天係咩？上google或者yahoo search，大把資料比你睇，簡單d講就係用全年最熱嘅三日，幫你處理一d好難搞嘅病。有一樣嘢要知嘅，就係想做三伏天要早少少make appointment，因為真係幾full，而且三伏天果幾日，尤醫師一般都係比較忙，如果想搵佢睇病（唔係做三伏天），可能就要打個電話問吓佢仲睇唔睇症先得。

另外，我亦不斷响唔同嘅朋友，得到唔少有名亦佢地試過幾work嘅中醫，想响呢度向大家分享一吓：－

馬漢洲　
佢收$100診金，執藥就在樓下
只睇星期一至五，四時至七時，三點半至四點要去登記先
好多人去睇，好勁！有個鼻咽癌嘅friend去睇，佢話佢識個人仲嚴重過佢，不過睇完三次都開始有信心唔去做化療，亦見唔少有cancer嘅病人比佢醫好返嚟多謝佢。我個friend極力推薦，因為馬醫師就連過度活躍症嘅小朋友都醫得好，呢樣嘢無論對中西醫嚟講都係一個挑戰。醫得方面亦絕對無問題，見過有個人去睇吓點解訓得唔好，佢把完脈就覺得無理由，因為從脈象上去睇，點都唔會訓得唔好，於是馬醫師就問吓個病人睡房嘅環境，竟然佢連風水都識，仲要幫個病人執完之後連診金都無收到。以前佢仲教埋氣功添，不過見太多病人無恆心，搞到佢心都灰哂，所以而家佢都無再繼續教。

秦鴻教授
有兩個診所，最好打過電話去先
彎仔31885588
油麻地23846242
好似話135响油麻地，246响彎仔
聽講有個case係，佢用針灸成功令到一個唔識行嘅人行得返。

鄭啟明
裕民大廈九樓c,北京國際針灸診所, 2790 4282
診症時間：星期一至五 （09:00～13:00，14:00～18:00）
　　　　　　 星期六 （13:00～17:00）
　　　　　　 星期日 （13:00～16:00）
聽講話佢醫好左鄭海泉，仲成日去外國嘅seminar講嘢添。佢亦有開氣功同針灸班，價錢都唔係貴，不過我學左reiki就唔駛啦，哈哈。


希望以上嘅資料，可以幫到大家。如果有咩錯或補充，請email我或留comment啦。