星期六, 5月 31, 2008

人生?目的?

我諗有一個問題大家都一定諗過,亦大部份人同我一樣係搵唔到答案,正確d講係大家都响度搵梗個答案。

尋晚同舊朋友食飯,咁啱有一個朋友剛剛升左職,响大陸半間公司都係佢管,於是我地傾吓傾吓就傾左做嘢嘅事。開頭大家都話內地嘅同事多數好準時收工,但係我嘅兩個朋友都對佢地呢個做法好有意見。其中有一個朋友佢做左老板十幾年,佢就好似好不滿咁。於是我就講。

我:"其實咁又有咩問題呢?你請佢返嚟都係想佢幫你做到你要佢做嘅嘢啫?好似我地以前做細嘅時候都係咁諗架,唔係咩?點解我唔開OT就係錯?"

十幾年老板:"無錯,其實而家香港新一代都有同一個諗法。"好明顯係話梗我。佢又話:"但係你有無諗過你嘅人工係大陸嘅幾多倍?如果你同佢地一樣,駛咩請你?請幾個大陸員工頂唔到你一個?"

無啦啦講到香港?仲要講埋我?都知以前跟佢嘅時候已經想話我架喇,不過無機會。正好,有個機會同佢2口6面講清楚,而家仲唔駛就住就住講添。於是我就話:"如果你咁計,公司最上面果班蛋散,個個都十幾廿萬一個月,唔通請十個我咁嘅人工嘅人又頂唔到佢地?公司會即刻摺埋?"

十幾年老板無言左好一陣,因為我記得佢好耐以前同我講過番說話。。。於是我再講:-

我:"講返轉頭,如果我真係唔駛OT,又做到哂嘢,咁有咩問題先?公司比錢都係請我朝九晚五啫,我做得哂d嘢就OK啦。"

十幾年老板:"你唔駛OT又交到貨?咁咪即係可以做多d囉。"

我:"咁加到幾時先停?要晚晚開OT?幾點收工先叫滿意?我試過晚晚朝九晚十二都做唔哂,結果就搞到星期六同日都要開工,但係都做唔哂d嘢,之後個人就覺得壓力好大,身體越嚟越差。。。係唔係個個員工都要做到咁先合格?為左咩?"

十幾年老板無言左好一陣,因為我講嘅case係佢。。。

新大老板:"咁又唔係話要做到咁,只係想當公司有需要嘅時候,同事可以拍難當幫手開OT啫。"

我:"但係你地頭先講到明話準時放工係有罪喎。"

新大老板:"又唔係話有罪嘅,只係想佢地唔好日日準時收工,一個星期比一兩日開吓OT咁囉。"

我:"又返嚟老問題,如果schedule set得好,點解一定要開OT?"

十幾年老板:"又唔係咁講,你都有讀過Project Management架,好多project failure都係開頭schedule manage得唔好,食哂d slack time,所以why not開頭push得勁d?"

我:"以小第嘅見解,好多project失敗嘅原因,咪就係因為requirement不斷轉,user又無commitment,老舊又唔橕啫。再講,好多時sales接嘅job係好唔reasonable,但係出聲都無人聽,佢地只會話個環境係咁,你唔做就無嘢做。。。但係還記得PM鐵三角,Time-Cost-Quality。如果個project timeline太tight,只會影響到Quality或者Cost。我就試過做過唔少mission impossible,三個月寫個POS連requirement taking加implementation,唔係講笑。同老板講話無可能,佢只會同我講比人我,話我地bare個cost咪得囉。。。最後搞到一team三十幾人,我真係唔識做,每人同我講一句一日都無左,點做嘢。。。雖然係層層疊,我只會同幾個core嘅team leader講,由佢地再dispatch出去,但係始終係用communication嘅問題。萬一幾個sub team都出問題要人決定,我一個人幫得邊個,我可以好以我老板咁,好聽d就叫delegate比個sub team leader自己決定,唔好聽就係叫佢自己死掂佢。但係話得一個project,如果你死左去東,佢又死左去西,咁最後個product咪會甩甩漏漏囉,到最後Quality咪出事囉,點會單單搞到個Cost啊。。。"

我再講:"其實人係要休息,唔可以長期咁做法,而寫program係arts,有時真係要講靈感,唔係話迫就寫得出,你咁迫法,我又無時間慢慢諗慢慢plan,咪即係叫我求求其其交d嘢出嚟比你囉,你地以前唔係未試過架。"

十幾年老板:"而家就係要機械式,唔可以好似以前咁做嘢。。。"

我:"人係有情緒,有高低潮,唔可以話成日都top performance架嗎。係唔係一定要OT到咁先得?先叫做合格先?"

十幾年老板:"我明你講咩,而家嘅後生又話要收工拍拖,又話要睇戲。"

新大老板:"咪就係囉,咩Quality Of Life。"

我:"唔關Quality Of Life事。但係咁,你有無諗過做人係唔係就要做到機械人咁,唔係返工做嘢就係返屋企瞓覺?如果第時你個囡囡出嚟呢個社會,你係唔係expect佢都要用呢個模式做人?"

但係佢地似乎唔係好想放過我:-

十幾年老板:"你咁講,做份幾千蚊嘅工,比你準時放工,你生唔生活到?好似我咁,我唔做點供樓?點養屋企?"

我:"咁你覺得你以前一家人,住响三百幾尺嘅屋開心d?定而家住過千尺嘅屋開心d?"

十幾年老板又再無言左好一陣,因為我知佢有幾唔開心,我亦好好彩認識以前好開心好開朗嘅佢。。。

記得我以前有個客,佢又係大老板,有一次佢同我講:"我覺得好對屋企唔住,因為無時間比到佢地,屋企人感覺好疏離。"。我就咁話:"你都係為左屋企啫。"。估唔到佢竟然話:"生活其實可以好簡單,唔一定要發到好似我咁先生活到。再講,其實好多時我地都係為左自己先會搞到無哂時間陪屋企人,但係有d嘢過左去就無得返轉頭。"。我聽完之後有好深嘅感觸。。。亦因為我啱啱開始想搏命工作(失戀係咁架喇。。。),我亦好好彩,正好有一個比機會我嘅老板,但係聽完佢呢一番說話,搞到我好想轉工,轉返一份無咁忙嘅工。。。

Anyway,我同朋友嘅conversation仲未完:-

我:"好似你咁啊,你咁搏,做到咁高級,幫左公司咁多忙,到後來公司咪又係起你飛腳。。。而你自己就做到隻嘢咁,所以先搞到身體咁差,搞到你屋企人咁擔心你,咁你又對佢地負責任咩?"

十幾年老板今次亦只有再無言,因為我又講中哂佢個case。。。

本來我想講我响書睇到嘅關於靈修啊,開悟嘅嘢,不過最後我都無講到,最後我用一個問題結束呢個topic:-

我:"咁你地有無諗過做人係為左咩?"

坦白講,我仲搵梗答案,有人知就話我聽啦。。。

5 則留言:

Honey Monchichi 說...

好似我老細,每逢review的時候都會同我講,叫我唔好準時收工。
我心諗我完成手頭上的東西才放工,有咩問題。坐晌度OT唔代表做緊野,好多人返工時間都晌度發緊夢,拖慢來做,慢條思理咁做,就梗係放唔到工啦。

自己做管理行業,連自己的時間管理都做到咁差,何來勝任呢?

冒險家 說...

實在太過多謝你花左咁多時間睇哂我呢編blog post。其實我一方面都幾明白佢地點解要咁做,但係另一方面就唔太同意咁解啫。我亦明白佢地有佢地嘅難處,不過總係覺得個世界發展得唔係咁好,所以我點都想出吓聲,希望可以叫到幾多個老板一齊思考吓都好。

匿名 說...

始終老細同下屬企的角度唔一樣。企係老細個位,佢出錢,當然希望cost efficient,員工有咁盡用咁盡,而且會覺得員工越OT得耐,貢獻得越多,公司的生意會越好。其實做老闆自己的壓力都好大,風險全部由他承擔,亦即係食得咸魚抵得渴。

至於員工,就當然係準時收工好,公司出錢請佢係朝9晚6,做多一個鐘都叫蝕鐘比公司,當然大前提係工作時間可以完成所有工作啦。

其實兩邊的想法都無錯,只係大家身處的位置唔一樣。

冒險家 說...

哈哈,真係估唔到咁多人會花時間睇哂呢總咁長嘅blog喎,早知我就一次過將成個故事寫哂佢啦...

不過唔緊要,等住睇埋下隻啦...哈哈...

Chan 說...

我都係打工仔,搵緊工,想睇下有咩係唔駛ot咁多的工作,我剛結婚,父母退休,父親有病,真係唔想除左工作,斷六親。我最近見工,interview會問我平常幾點收工,有次個interviewer聽到我話7:00-7:30收工,話好早,我心諗我已經ot左個半鐘,返到屋企都8:30,食飯沖涼,處理自己+家庭事後,已經沒有私人時間,每日都唔可以relax下,想讀書做gym約朋友食飯,一至四唔駛諗,唉,依家又多agency contract,無福利又俾agent刻薄,真係好灰,好同意你講出打工仔心聲