靈俢＝撞邪？

近排響其他靈俢嘅forum見到其他人嘅家人對佢地靈俢嘅comment竟然差唔多係：＂你痴架？＂，同同學仔講開，原來佢家人都有問佢：＂你近排係唔係撞邪啊？＂。哈哈，估唔到原來個個嘅靈俢路都有咁相似嘅經驗，當然我都唔少得啦。

事原近排開始學梵文心經，我咁好學（都要贊吓自己先），當然會響網上面搵下資料，又比我搵到有免費嘅梵文心經online聽，咁我梗係晚晚都聽住訓，睇吓可唔可以搞到自己唔洗背都識啦（真係懶）。點不知夜晚太靜，比我外母聽到，佢走去同我老婆講話：＂咩佢聽埋哂果d咁嘅南毛架＂。。。

我老婆尋日又走嚟問我：＂你仲咩晚晚都係咁南南毛毛啊。。。＂。可能因為我近排晚晚都係咁念大悲咒，我話：＂咁你都聽到，勁唔勁先？＂，佢只係笑吓就無答我，哈哈，唔知佢會唔會當我痴左呢？好彩佢都無咩點理我，只係咁樣講兩句啫，唔知我第時攞幾本天使嘅書返嚟佢又會講咩呢？

靈俢嘅路真係唔易行，特別係你平時＂蛇王＂上網睇靈俢有關網頁嘅時候，又咁啱比你d同事睇到，佢地就會甪好奇怪嘅目光咁望住你，又成日係咁問你＂點啊？你d咩靈氣練成點啊？識飛未啊？＂哈哈，唔知點解我就無嬲過，只係繼續同佢癈話落去就算。可能知道以前嘅我都會有咁嘅返應，可能做IT嘅人就係咁，無咩科學根據嘅多數都唔會信，直情連了解都費事。。。

可能就係因為咁，我對呢本書＂嗨! 我是和尚: 東大IT僧侶修行日記＂特別有興趣，等我睇吓搵唔搵到先，如果搵唔到都無辦法，唯有＂恨＂吓啦。