大感冒

上個星期日因為日頭食左好熱氣嘅炸雞翼，再加上要陪我個仔仔訓左兩晚覺，即係等於無得訓咁上吓，因為佢成晚都會醒，又著得唔夠衫訓，所以病左。開頭都係得個喉嚨痛啫，同自己做左一輪（成日）healing之後都有少少成績。星期一一早個喉嚨開始無咁痛，不過就多左幾聲咳，但係去左一日雪房做嘢之後，其他感冒嘅症狀就響夜晚食飯嘅時候，一一咁開始出現，包括周身骨痛，鼻涕，痰，忽冷忽熱（並唔係發燒）以及個人有少少滾滾地。

於是我夜晚返到屋企就插到自己一身都係針，包括：－

風池，天突，合谷，足三里，三陰交（好似唔關事）同埋太沖。

我取穴嘅方法係好有學問吓架：－

就係包括：　－
估估吓
亂咁嚟
再加埋以前睇中醫嘅時候果d中醫幫我針過嘅穴位（當然都係睇感冒嘅時候啦）

可惜好似唔係好work，不過個人已經唔再忽冷忽熱，亦無再滾滾地，骨頭亦唔痛，就連個喉嚨都一d都唔痛，只不過仲有好多鼻涕，痰同咳得幾勁，連把聲都變埋。可能放錯穴位，又可能支針唔係好得自己都唔知。星期二起身都係頂唔順要去睇醫生，事關要幫手take care BB，如果病左就要被迫免疫，順便攞返一日病假休息一吓。但係醫生好奇咁問，你無理由喉嚨唔痛喎，因為真係好腫，亦都損哂。我都唔知點解架，但係我真係一d都唔痛喎。

夜晚當然都係一樣咁亂針一通啦，取穴就同尋日一樣，事關都叫做有少少成績。可惜星期三病狀一樣無變過，不過鼻涕就少左好多。星期二果時去睇醫生到返屋企用左三包紙巾，到左星期三成日都係用唔夠一包，不過把聲都仲係變哂，而亦仲有痰，所以耐不耐想咳d痰出嚟而引起幾聲咳咁。但係我d同事個個都話我扮病，事關佢地話我好精神，一d都唔似病咁話喎，好彩我把聲都變埋啫，如果唔係我老闆一定話唔信我病。

到左星期三晚，一心諗住都應該差唔多好返，所以就無再針喇，因為針完又要等半個鐘之後先訓得。點知星期四起身都仲係一樣，咩都無變過，只係覺得少左dd痰，不過見仲有少少藥，所以就無去睇醫生。但係星期四晚就再次同自己亂針一通，可惜，到左今日（星期五），都仲係一樣，唯有好唔願意咁睇多一次醫生，睇吓可唔可以好得快d啦。

等我今晚試下改用下面嘅穴道先：－

風池，天突，合谷，足三里，三陰交（好似唔關事），太沖（其實都好似無關係），中府，巨闕，俞府，不容，尺澤。

因為本本書都講唔同嘅嘢，唯有自己試試吓啦，希望有用啦。