星期五, 4月 11, 2008

生命的答案,水知道

因為老婆要上網訂書,我就忍唔住同佢一齊出血,加單訂左一批書。其中一本係叫做生命的答案,水知道。好彩真係幾抵睇,佢裡面影左好多唔同嘅水結晶,全部都係用d好靚嘅彩頁,真係好抵。

本書as expected,都係講水嘅特性,例如:-


  • 水其實係會比周圍嘅環境(包括聲音同文字???)影響到。

  • 最靚嘅水結晶應該要係六角形

  • 水原來係有記憶,that's why比唔同環境影響嘅水結晶,係會有唔同嘅形狀。

  • 作者就大膽假設,細胞記憶其實係由水做主導,亦即係主因係水嘅記憶特性而引發。

  • 波動係响高層次傳播,好似當波斯灣戰爭開始嘅時候,作者响東京灣攞到嘅水嘅成份,即刻唔同哂,理論上物質嘅傳遞無可能會咁快,所以作者認為係波動將水嘅成份改變左。好可惜作者無幫果日攞到嘅水影水結晶相,如果唔係就可能會有更大嘅研究成果。

  • 原來科學家已經証實,有唔少嘅外太空隕石,其實係冰塊嚟嘅。而當呢d外太空嚟嘅冰塊遇上大氣層,就會馬上被熱力溶化,變成水蒸氣,之後就會變成雨水降落到海或者陸地。亦即係話,原來有唔少嘅水係來自外太空,所以水並唔係我地所諗咁簡單。。。



作者就花左好多心機同時間去補足受到唔同對代嘅水結晶。好似:-


  • 聽左交響曲之後嘅水結晶,原來係會好靚,當然唔同嘅交響曲會令到水結晶會有唔同嘅形狀,但係都好靚。

  • 見到唔同嘅字嘅水結晶之中,最靚係感謝,最差係混蛋。。。。不過如果我有份參加呢個研究,情況可能會有少少改變。。。 XDDDDDDDDDDD

  • 竟然無被注意(理會)嘅水結晶,比見到/聽到混蛋嘅水結晶仲要差,真係估唔到,就算只係望下,都已經有唔同嘅結晶。即係我就算鬧你都好過望都唔望你,等我第時鬧人嘅時候同佢講呢個道理先。哈哈。。。 XDDDDDDDD

  • 原來瑞土同廣島嘅自來水結晶都好靚,反而香港,澳門同日本嘅自來水結晶都好差。。。 美國近洛磯山嘅自來水都好靚,果然係世界其中一個能量好勁嘅地方,真係好想去添。

  • 我真係估唔到,原來願望池嘅水結晶,係一個個硬幣嘅樣,而响寺附近嘅泉水造成嘅水結晶,就同寺嘅門口好相似。。。

  • 見到命令式嘅字句,水結晶就會唔靚,就算只係加一個"不"字,都足以影響到水結晶嘅樣,所以我地以後講說話,真係要多加留意用字先得,原來一個唔好嘅字,都已經可以有負面嘅影響力。。。

  • 成本書最驚嚇嘅一張相,就係911嘅時候拍到嘅水結晶。。。

  • 除左睇字,比水睇風景相都有相當好嘅效果,呢樣我諗大部份人都估得到。我最估唔到嘅係,最靚嘅水結晶,並唔係見到邊一度靚風景,而係睇到一張只有太陽嘅相,真係好靚。果然係萬物能量嘅來源。



我覺得作者真係花左好多時間同心機,先影到咁多咁特別嘅水結晶相,所以呢本書雖然唔係太多資料,不過真係值得一睇,而且佢當然仲有講唔少其他水嘅特性添。。。

2 則留言:

匿名 說...

我曾經係以前買開水晶嘅店做個一個實驗, 同水嘅結晶好相似. 就係用"飯"來做同樣嘅測試. 去街買一盒白飯分三盒, 跟住我地一班大約十幾人每日上去對住三盒飯講嘢:
第一盒: 讚美佢
第二盒: 鬧佢, 踐踏佢
第三盒: 忽畧佢
經過7日,結果係三盒都發霉,但顏色氣味就差好遠, 第一盒顏色七彩鮮艷,臭味不大,第二盒就好臭同黑色,第三盒比第二盒仲惡臭核突,
結果同水嘅測試差唔多.....
所以亦解釋咗忽畧是最大的傷害, 所以啲小朋友專登做曳嘢引人注意....

Lisa

冒險家 說...

唔...好難可以忽略佢喎...一行轉半佢就已經係咁叫...而家基本上係7x24都有人同佢玩...

反而我覺得之前唔記得邊個website幫佢check過,話佢前世得唔到嘅今世會攞返。。。唔通我前世真係次佢好多,所以而家要還返比佢???

哈哈,唔緊要啦,我不斷都還梗喇,多一個唔多啦。。。。