細胞記憶

好快咁睇完左頂頂有名嘅Sylivia Browne－蘇菲亞，果本細胞記憶喇。睇得快嘅原因，並唔係唔鍾意睇，而係真係好精彩，搞到我係咁煲，煲到唔停得手。蘇菲亞老師將佢用前世療法，醫人嘅精彩經歷，全部放哂入呢本書入面，最後佢仲教我地點樣做前世療法。真係得一個字可以形容呢本書，就係＂正＂！

裡面有唔少知識，我睇呢本書之前，簡直係諗都唔敢諗。睇完覺得真係好神奇，又覺得原來好多事情，係同前世好有關係。亦即係間接話比我地聽，活在當下嘅重要。

唔睇唔知，原來：－
１。身上嘅胎記，係同前世點死有直接嘅關係。
２。有d不解嘅毛病，原來又同前世，或前N世做過嘅事有關。
３。不過佢所介紹嘅死後世界，同我响佛教所知返嚟嘅，又覺得好似唔係好一樣。不過可能呢本書主力唔係介紹死後世界，所以我只能睇到少少嘅description，搞到我好鬼想睇哂佢所有書添。
４。差d唔記得最重要嘅point添。就係唔好以為小朋友唔會明白我地鬧佢d咩，就起勢係咁鬧。原來雖然我地嘅意識身未必明白，但係原來我地嘅真我係會收到架，蘇菲亞就介紹過一個case，個細胞負面記憶，原來係佢七個月大嘅時候中落架。。。所以唔好以為BB咩都唔識，就响佢面前亂講嘢，可能你害左人地一生你都唔知啊。

除左佢之外，我仲响序上面見到有個勁人，叫Bruce Allen。佢真係好勁，透過把脈就可以睇到人嘅前世。而佢所睇到嘅前世，同蘇菲亞一樣，都係好詳細，好似睇梗故事書咁。等我得閒d果時，搵吓佢有無出過咩書都好。