禪宗與道家

啱啱用左九牛二虎之力（因為係用簡體宇寫嘅），先睇哂南懷瑾先生本＂禪宗與道家＂，真係令我眼介大開，南懷瑾先生對佛道兩家，以及中國歷使嘅認識，真係可以話係博學。

唔睇唔知原來孔子同老子係同時期嘅人物（當然係我見識比較少之故），亦唔講我唔知原來儒／道／墨响戰國時期影響中國文化咁大，點解睇墨攻無講嘅？而中國道家第一人原來就係老子，等我仲成日話老子咩老子乜咁，真係失覺哂。當然係人都知道孔子係好出名嘅聖賢，但係原來佢就係儒家嘅第一人。咁我都唔知添，真係羞恥。。。

先講佛教，我當然知道（其實都係啱啱知道無幾耐），釋迦牟尼佛就係佛教第一人，原來摩呵迦葉尊者就係禪宗第一人。事原就係釋迦牟尼佛在靈山會上，對住百萬人，默然不說一句話，只自輕輕手拈一枝花，當時大家都唔了解佢嘅寓意（我到而家都唔明），只有大弟子摩呵迦葉尊者會心微笑。就係咁，釋迦牟尼佛就當眾宣布，摩呵迦葉尊者為教外別傳第一人，亦即係而家嘅禪宗。而將禪宗傳入中國嘅，就係達摩大師。唔知道達摩易筋經，係唔係達摩大師所創嘅呢？Anyway，中國禪宗，就係由達摩大師傳比神光，亦係後來中國禪宗尊為第二代祖師，亦可算係中國禪宗第一人。

呢本書亦話比我聽，大乘同小乘佛教嘅分別。以我嘅理解，大乘比較入世，而小乘就重個人嘅修為，亦即係比較出世，當然當中嘅分別，點會簡單幾隻字就可以講得哂吖。

而道教方面，就比較多故事。好似有分支，將重點放落練精化氣/雙修大法/房術方面。當然同覆雨翻雲（唔係無記果套），裡面嘅雙修大法有出入啦。但係原來真有其法，亦同入面講嘅出入不太大，仲以為王先生吹水添，真係錯怪好人添。唔講我唔知，原來傳真教真有其教，而亦真係王從陽所創立，仲係集儒釋道之大成。

另一樣我唔知嘅就係原來太極／陰陽呢d concept並唔係道家所出，最早原來都係出自易經。不過道家都好勁，而家嘅風水／命理以及養生學說，原來係出自道家學說，真係為後世所用，惠及眾生，流芳百世。

南先生經常提到佛道之間，經常互相影響，不過落筆寫佛家影響道家思想比較多，差不多無提到道家有咩地方影響左佛家，呢樣亦係我比較有興趣嘅地方，不過可能係我睇唔明哂所有簡體字，所以miss左少少detail咁。不過呢本書要我睇哂已經幾辛苦，好難可以叫到我睇第二次。。。

睇完呢本書，我更加想睇關於密宗嘅書。因為密宗對我嚟講，就更加神秘。