舊夢 ＋ 灘牌

N日之前，發左一個夢，夢嘅背境係公司，人物就全部都係同事。為左保障佢地嘅個人私隱，我將會全部用代號。個夢係咁嘅：－

話說，有一個貍貓人，佢要求上等人，要佢安排兩個人坐入一架，原本係比一個人坐嘅火箭。上等人當然就唔知點算啦，粒聲唔出就行開左，但係呢個project其實應該係佢跟嘅，因為全公司嘅火箭都係佢嘅item。响呢個時候，形男竟然叫我出手幫拖。原本我同上等人本來係同team，但係佢同我所做嘅嘢，係風馬牛不相及嘅，唔知點解形男會提出咁嘅要求。不過我一般都甚少失手勢，當然唔係話高唔高級先咁，而係比較friend嘅同事開到口都好少say no。

事件發展到最後竟然比我搞掂左，就連一架原本只係坐一個人嘅火箭，都比我搞多一個坐位出嚟，真係夠哂誇張。Anyway，貍貓人同形男就係咁多謝我啦。咁多謝我除左係真係唔該我幫左佢一個大忙之外，就梗係身有屎啦，因為佢就好似一般叫我地做嘢嘅人一樣，好鍾意一早唔諗定d嘢係要點做，求求其其講住d嘢比我地聽先，到最後就係咁改，好多時都要我地搞到太陽由西邊升起比佢先得，我地話做唔到佢地就一定唔會收貨。最後當然都係escalation收場啦，咁你都估到上大人嘅一般Response會係點啦，所以我今次個夢先會係幫佢搞啫。。。

一路我都唔見上等人參與過，但係到最後搞掂左佢就出返嚟，但係講咩就已經唔係好記得喇，早知早d寫低佢啦。。。

碰巧最近，當然係講返現實生活啦，有樣嘢成日都死，我同上等人同型男都收到通知。不過佢一般都唔會郁，所以我多數都會加一個通知比佢，而佢亦當然無咁順灘啦，亦繼續佢自己嘅要務（咩就唔好响呢度講啦）。我就唔知係責任感太重定係咩，多數我都會好主動咁親身埋去叫多佢一次。當然佢嘅反應都係好串啦，不過同事嘅嘢，我都唔想見佢死都唔出聲，佢死亦會連累到老闆，甚至成team人。呢幾次事故，佢每次搞完一輪都係唔知咩事，只係一句＂無事喎＂就算，有時我話比佢聽＂唔係喎，真係有d嘢呢，你搞搞佢啦＂，佢嘅反應多數都係出奇咁串＂你想點？＂？？？喂！！！我想點？而家關我事咩，我好心提一句啫，你唔做咪算囉，當然以上嘅一句，只係响我心裡面出現啦。。。

就係咁，我近來次次都比佢激到生蝦咁跳，而且面都紅哂，不過今次嘅我，竟然做到唔埋佢就算，真係進步左。而且我心諗，要講嘅我都講左，你做唔做真係唔關我事。不過到左今晚，形男突然call我話又死過，我就開始control唔到d火。我真係同佢講，＂大佬，話左我果邊無事架啦，你搵阿邊個check下佢果邊先啦＂。But佢都係insist叫我check吓我果邊，當然我都照做，然後先好火咁同佢講＂講左唔關我事架啦，下次你見到呢種通知，唔該你自己同上等人講啦，我唔想佢問我想點嘅時候我唔識答。再者，見到呢種通知十次有九次都係果舊嘢有事架啦。＂。其實我好唔明，個通知真係好清楚咁話左比佢聽係邊度出事，但係佢次次都先搵我？唔通我好蝦d？定係我次次都唔出聲又幫佢手搵問題，所以佢就次次都搵我先呢？但係加人工又唔見加我多d？？？

Anyway，我真係忍無可忍先咁同形男講架咋，平時我都會比面佢嘅，始終佢都係大時我係細。不過事後我諗諗吓，都覺得係自己唔啱，衰在太多事。通知就大家都收到，佢做唔做checking and fix up唔關我嘅事啫。但係究竟我同佢，今世要修嘅嘢係咩課題呢？我真係想解決左同佢嘅呢種karma，唔想下世再同佢有任何嘅關係。可能真係要花d腦汁，諗吓點先係最好嘅處理方法先得。。。各位師兄師姐，如果睇完有咩諗頭，不訪send張email提點吓細佬我啊，真係十萬個唔該。。。