沉迷？

上個星期當無記賣廣告，話當晚有一個關於沉迷打機嘅節目，因為當時老婆個姪就坐正我隔離，我馬上笑住口咁話好啱佢睇。。。但係我老婆一般都好鍾意買魚頭就搭魚嘴，問咁你呢？意思即係話我好叻咩咁。。。

無錯，响數年前，我比佢表哥更沉迷打機，一日打十幾個鐘都只係家常便飯。當然我即刻都講，＂無錯，以前嘅我的確係好沉迷。不過就係我已經覺悟，知道打機嘅問題，亦覺得打機幾無聊（除左winning。。。哈哈），所以我就痛改前非。＂。

不過估唔到佢咬住唔放，即刻再追問：＂咁而家又沉迷梗d咩啊？＂。哈哈，我估佢都忍左幾耐先開聲。我的確係每當去做一件事嘅時候，就會做得好投入。無錯，我只會用投入去形容（正氣正念好多）。比著係以前嘅我，實鬧鬼佢，不過而家嘅我，竟然可以好輕描淡寫咁答佢：＂咪就係睇書囉。＂。哈哈，佢一定估我唔到。。。

不過表哥就好似對我睇咩書有d興趣咁，我當然用激將法去對付佢啦，話＂我睇果d書唔啱你咁弱小嘅心靈睇架喎。。。＂。佢當然好唔服氣咁話＂你個心靈就弱小。。。＂，哈哈，我於是就打蛇隨棍上話：＂你真係咁想睇？好啦，咁我就比我d書你睇啦。其實都好啱你睇架，我睇果d書多數都係分析吓好似你果d case囉，好似話點解你會成日發皮四咁囉。＂。哈哈哈哈，點不知佢竟然玩認衰咁話：＂啊，係啊，我個心靈真係好弱小架，真係唔係好啱睇呢d書架。。。。＂。。。　＝＝＂

其實諗返轉頭，我而家最投入嘅，又真係並唔係睇書。睇書只係其中一種途徑，去逹到我嘅興趣，而我真正嘅興趣，亦唔係靈修。靈修亦都只係另一種途徑而已，我真正最投入嘅興趣其實只係。。。。。健康！！！係全個人，包括身心靈上面嘅健康。所以我就不斷睇書啊，上堂啊咁，去學識點先係可以達成我到健康人生路。。。