圖解榮格心理學

有一次去APM買書送比人，一早心裡有數，所以好快就搵到目標。見有時間，咪打吓書釘囉。睇睇吓比本圖解榮格心理學吸引住，於是就直情買左佢返屋企慢慢睇。越睇越發覺榮格好利害，佢並唔係一般嘅心理學者。

• 佢主張唔好亂咁否定未知嘅事情。


• 佢雖然係基督徒，亦係基督教家庭長大，佢都無排斥過其他宗教。


• 佢竟然仲可以用唔同嘅角度，去分析練金術。講真，就係今時今日，初初睇完鋼練，我都覺得呢個只係一套卡通片，我諗唔少人都同我一樣。。。不過榮格就用一個心理學嘅角度，去分析練金術呢樣嘢，搞到我都有d想搵佢嘅書嚟睇添。。。


• 佢醫人嘅approach真係值得我地學習，就係無論病人講咩，我地第一件事唔好話佢有問題，無可能咁。因為好似佢不嬲嘅主張咁，無任何証明之下，我地係唔可以相信任何事，同道理，我地亦唔可以否定任何事。。。


• 原來每一個人都一定有第二性格，而且往往都會同第一性格有好唔同嘅特性，不過原來咁先可以組成一個完整嘅我。因為第一性格係由我地嘅意識主導，而第二性格就係由我地嘅潛意識主導。


• 雖然我地可能並唔太認同我地嘅潛意識嘅諗法，但係我地千其唔好打壓佢，因為其實第一，潛意識係唔迫得，太過壓抑反而可能會搞到有心理病。第二，其實潛意識都只係我地日常被壓抑嘅表現。


• 一般人係可以分成八種唔同嘅性格，包括外傾思維型，內傾思維型，外傾情感型，內傾情感型，外傾感覺型，內傾感覺型，外傾直覺型同內傾直覺型。同九型人格嘅分類方向上都好唔同，不過我都覺得佢嘅分類嘅啱聽，只係佢嘅focus同九型一格唔一樣啫。


• 佢已經有好早期嘅前世記憶嘅concept。。。


• 原來我地對人嘅投射，其實係將自己嘅陰影，投射响人地身上嘅行為。。。

其實仲有好多好多其他事跡，都可以令到睇書嘅我，幾咁嘖嘖稱奇，好似：－

• 佢竟然同鬼溝通過。


• 佢竟然靠直覺，劃到mandala出嚟。勁！


• 佢仲試過預見未來發生嘅事（WW I)，真係勁。


• 佢竟然好相信同精通易經啊，命理咁。仲會幫病人占卜。。。

佢其實可以話係new age嘅先驅，因為：－

• 佢一早就已經肯定心念係有力量。佢仲試過用心念嘅力量，去令到一個櫃發生聲音，好勁。


• 佢已經對同時性，有初步嘅研究成果。亦因為咁，佢都相信命運。


• 佢竟然身為一個基督徒，會確信本我（The One？）嘅存在，真係唔簡單。

原本諗住本書都唔會有太多information，但係睇完就發覺呢個係一個錯覺，唔好以為本書薄就等於無咩嘢睇，仲有其他資料我都無辦法加入我呢編blog入面。對心理學有興趣嘅你，一定要睇吓榮格嘅書，絕對會有收穫。Overall，我都幾滿意呢本書，真係要多謝我嘅潛意識提醒我有一本咁好嘅書。。。