星期四, 7月 12, 2007

靈氣生BB法 - 1

上回講到我學左靈氣之後就係咁練係咁練,不過多數都係自己玩自己啫,事關我老婆大左肚,仲要已經到左三十七周添.真係anytime都會生,而阿alan仲話有d師兄可以用reiki令到個BB早成個月生添,我老婆咪唔係好敢比我rei佢囉.不過Alan話一般Level I仔最多都係可以令到個大肚婆早一兩日咁啫,我老婆最後都肯o係見醫生果日開始比我rei佢.

不過要一早就要見醫生,所以都只可以rei小小咁啦.見到醫生,佢仲話個胎盤老化情度只係得二,一般生得嘅係四,即係未生得,而且阿B個頭仔都仲未落去,亦即係話有排都未生得,佢仲話唔洗心急,下次都係返嚟診所見吓佢先啦,即係都幾firm未有耐生得咁話.咁我老婆返屋企之後就開始放心比我rei佢.一來,佢都想快少少生,因為天氣太熱,大肚真係好辛苦,二來,佢聽到rei吓rei下,有人可以減到肥,有人又可以去到水腫,有人又會皮膚靚d,咁佢咪係咁叫我日日都要rei吓佢囉.你咪話唔信啊,佢隻腳勁水腫,仲有好多紅色嘅印添,連醫生都話佢勁水腫,我rei左一晚d印就消咁d喇,再rei多一晚佢就差唔多唔見哂添,水腫嘅情況就唔係有太過明顯嘅幫助,但係佢本人都覺得好似無腫得咁勁,仲要晚晚都好訓得添.雖然佢個三陰交都好紅又勁腫,但係我讀中醫同推拿嘅時候,阿sir都叫人唔好掂大肚婆嘅三陰交,所以我都唔敢亂掂,唯有等佢生完先啦.

估都估唔到,佢今晚竟然”卜卜”兩聲,就穿左水添.說時遲,那時快,我地馬上帶埋預備左好耐嘅走佬袋,出發飛的入醫院.搭緊的士嘅時候,我老婆就好緊張,因為都係頭一次,亦都比預期早左少少,三來醫生話佢未有耐生得,事出太過突然,仲有原來穿水係流好多架,所以佢就係咁震添.我二話不說就幫佢做吓七輪呼吸,做左兩輪(即係六次),佢就無咁震喇,再繼續做多一陣(大概由麗港城上到觀塘繞道頭,佢就唔再震喇.一路都唔記得講個cute的士司機添,我地一上車佢就知道我老婆作動,係咁叫我地慢慢嚟.上左車之後又問我地緊急情度去到幾多級,洗唔洗飛車定係安全車速都得,真係幾搞笑架,可能都幫到我老婆放鬆.我地其實都知道有排都未生得,所以就叫佢最緊要安全,用快嘅路去就OK.

去到醫院搞完一輪之後,我老婆就入左病房聽胎心機,o係果一個鐘裡面,我試吓rei佢同唔rei佢,睇下有無分別.嘩!比我發現我rei佢嘅時候,陣痛嘅情度頻密左一倍,但係我都想confirm係唔係真係work,所以最後我就放手,觀察佢半個鐘,點不知陣痛即刻疏返哂,另外無rei到嘅陣痛時間亦都長過有rei嘅時間,無rei就1-2分鐘,rei梗就1分鐘.我本來諗住繼續幫佢rei吓,點知有個姑娘叫我返屋企,因為佢有排都未生得,仲要可能隨時都會有新client嚟,我男人一個唔係好方便咁話喎......無辦法啦,唯有返屋企,順便洗吓衫比老婆入院著,鬼叫我都有d緊張到訓唔到咩....洗梗衫嘅同時咪blog吓囉,希望快d同大家分享一下我嘅經歷.

同時亦都馬上MSN左大師兄,叫佢幫手rei吓阿醫生大人,等佢精神d,接起生上嚟都快手d又醒神d.我知道可以咁rei都係佢一早就提左比我,最衰我都仲係Level I仔,如果唔係就唔洗煩到人.阿大師兄,真係唔該哂喇,遲d有需要幫忙即管同我講,我幫得到嘅話一定唔會Say No.同時間我亦都好多謝佢,唔係佢,我都唔會有機會學到樣咁勁嘅功法.今次嘅經驗再加强左我對Reiki同自己嘅信心.希望快d天光我可以去醫院rei吓我老婆啦,佢啱啱又打電話嚟話好痛喇.

沒有留言: